Skip to Content

A MOCIDADE DO FARO PRESENTA AS SÚAS PROPOSTAS AO CONCELLO

Este martes 19 de decembro os mozos e mozas que participaron nos encontros organizados por Arousa Moza achegáronse ata o Concello de Vilanova acompañados polos representantes desta asociación xuvenil. Alí foron recibidos polo alcalde, Gonzalo Durán, que escoitou atentamente as súas propostas para mellorar a oferta de ocio saudable e doutras actividades de interese para a xuventude de Vilanova. Esta iniciativa de Arousa Moza supuxo unha interesante aprendizaxe para os mozos e mozas participantes, xa que non só tiveron a oportunidade de seren escoitados e tidos en conta, senón que ademais puideron empezar a comprender as diferencias entre as distintas administracións públicas.

(Premede aquí para acceder ás fotos e vídeos da actividade)

ENTREVISTA EN "HOY POR HOY AROSA"

Onte 7 de decembro no programa Hoy por Hoy de Radio Arosa Cadena Ser​ emitíuse a entrevista realizada por Montse García aos nosos intrépidos integrantes do Club de Radio. Dende o minuto 57 ata o 01:12:03, Aroa, Rita, Mateo, Adriana, Manuel e Iria contestan ás preguntas de Montse e vannos debullando os seus intereses e inquedanzas, as súas opinións e expectativas para o futuro, incluso os pequenos choques xeracionais no seu día a día. Non vos perdades o broche musical que nos agasalla Adriana para rematar a entrevista!

(Premede aquí para descargar a entrevista en arquivo de audio)

SAÍDA A LUGO

Por iniciativa do EDLG, o alumnado de 2º ESO asistíu este luns 4 de decembro á conferencia titulada "Mulleres, ciencia e tecnoloxía: unha historia interminable", que se celebrou na Deputación de Lugo e que foi impartida por Mari A. Lires, doutora en Química, premio UVIGUALA da Universidade de Vigo (2017), profesora de  Didáctica das Ciencias Experimentais na Facultade de Ciencias da Educación e do Deporte da Universidade de Vigo. 

Como sabedes, novembro foi o mes da Ciencia en galego, e ademais é un mes no que a reivindicación da igualdade de xénero se fai especialmente relevante, tamén no eido da ciencia. A doutora Lires conxuntou ambos aspectos nunha charla moi interesante e reivindicativa, amosándonos a contribución de mulleres científicas de todas as épocas e continentes sen as cales a ciencia non sería hoxe o que é.

Aproveitando que nos atopabamos en Lugo, o alumnado puido coñecer a muralla romana, percorrendo o seu perímetro nunha chuviosa mañá de decembro.

FORMACIÓN DO PROFESORADO

Como cada ano, o profesorado do IES Faro das Lúas participa en cursos de formación para mellorar a nosa práctica docente e trasladar o aprendido ás aulas. Este curso estamos a formarnos no emprego do material do proxecto Polos Creativos:  Da man de Magdalena, a nosa antiga profesora de Tecnoloxía, estamos aprendendo a manexar a impresora 3D, a cortadora láser, a máquina de coser e a máquina de chapas. Esperamos poñer en práctica o aprendido nas nosas clases para que o noso alumnado poida realizar interesantes proxectos.

ÍNDICE DA PAZ

Así vai a clasificación do Índice da Paz coas puntuacións de outubro. 1ºB e 3ºB van gañando!

1ª ANDAINA DA SENDA DAS LÚAS 2023

O noso IES está participando no programa Polos Creativos da Consellería de Educación co proxecto "A Senda das Lúas". Deseñamos unha ruta de sendeirismo circular que percorre os puntos máis significativos do Concello de Vilanova, con punto de partida no noso centro e destino no Faro das Lúas, a escultura de Manolo Chazo que dá nome ao noso instituto. Polo de agora o proxecto está aínda en fase de realización, pero o pasado xuño puxemos a primeira pedra do camiño: alumnado e profesorado do centro fixemos a 1ª Andaina Senda das Lúas.

A experiencia foi recollida nun vídeo elaborado por Élite films que vos deixamos a continuación (tamén podedes acceder desde o bloque Senda das Lúas na columna esquerda da nosa web)

  

Distribuir contido


by Dr. Radut