Skip to Content

Espazo Lectura

Para grandes lectores/as

Dispón de toda a información sobre as diferentes actividades e eventos organizados por esta Asociación para o Formento da Lectura facendo clic nesta imaxe

Dar de ler coma quen dá de beber

Estimadas socias e socios:

Espazo Lectura está a preparar a décimo cuarta edición da actividade Dar de ler coma quen dá de beber, a sesión de lecturas en voz alta que celebramos anualmente con motivo da conmemoración do Día do Libro e que se enmarca na Semana do Libro e a Lectura.

Como sabedes, esta actividade consiste nunha lectura colectiva na que, as persoas que o desexen, escollen un texto moi breve dun libro que queiran compartir cos demais.

O acto terá lugar o venres, 23 de abril, o mesmo Día do Libro, cumprindo as medidas sanitarias vixentes, na Praza da Paradela (e no caso de mal tempo no Auditorio Lois Tobío), entre as 19:30 h e as 21:30 h aproximadamente, aínda que non é necesario estar presente durante todo o acto.

Como en ocasións anteriores, gustaríanos reunir arredor de 25 ou 30 persoas nun espazo público para ler. Espazo no que podemos escoitar, compartir e recomendar as lecturas que nos gustan e celebrar así o Día do Libro facendo da lectura un acto de socialización.  

A idade mínima para participar é de 14 anos.

 Que teño que facer se quero participar?

- Escolle un fragmento dun libro, preferiblemente en lingua galega, cuxa lectura non exceda os 3 minutos (é moi importante cinguirse ao tempo).

- Comunícanos que queres participar respondendo este correo electrónico ou chamando ao número 655 553 930 e indícanos o título e o nome do autor ou autora seleccionado.

- Para organizar máis facilmente o acto, dinos tamén se prefires ler entre as 19:30 h e as 20:30 h ou entre as 20:30 h e as 21:30 h. Tentaremos, na medida do posible, aternos a esa elección e evitar en todo caso que haxa cambios con respecto á orde fixada.

 

Agardamos poder contar coa túa participación e quedamos á espera das túas novas.

Unha aperta.

 

Coordinadores do XIV Dar de ler coma quen dá de beber

Retomamos a actividade

 
Prezados socios e socias:
 
Informámosvos da decisión de adiar a Asemblea Xeral Anual que estaba prevista para o mes de marzo. Isto é debido a que preferimos agardar algunhas semanas máis para poder celebrar a asemblea cunha maior seguridade sanitaria e poder así distanciala da anterior asemblea, que se realizou no mes de setembro. 
Enviarémosvos a orde de convocatoria con dúas semanas de antelación cando teñamos unha data pechada. 
 
Por outra banda retomamos as actividades infantís e o empréstito da Casa da Lectura, que comezará a realizarse mañá e continuará todos os mércores de 17:30h a 18:30h. 
 
Un saúdo,
 
O equipo de Espazo Lectura.

Reformas na Biblioteca de Gondomar

Prezados socios e socias:
 
Enviámosvos un enlace á web de Espazo Lectura na que explicamos os últimos acontecementos en relación á mellora da Biblioteca Pública Municipal de Gondomar e á Casa da Lectura de Donas. Podedes ler esta información premendo aquí
 
Saúdos
 
O equipo de Espazo Lectura

Nota informativa

Achegámosvos a nota informativa coas actividades do mes de novembro, que tamén podedes consultar no apartado Axenda de eventos da páxina web de Espazo Lectura.
 
Por mor da COVID-19 haberá que adaptar tanto espazos como algunhas actividades á nova situación sanitaria e adecuarse aos protocolos impostos polas autoridades sanitarias en materia de limitación de aforo e de distancias de seguridade, hixiene e ventilación. Loxicamente, a necesidade de manter o afastamento vai condicionar extraordinariamente o número de participantes nas diversas actividades. 
A Casa da Lectura, debido ao seu reducido tamaño, non poderá albergar as actividades infantís polo que moitas acividades celebraránse no Auditorio Municipal Lois Tobío, no Centro Neural de Gondomar e na carpa da Praza da Paradela.
 
Agardamos que a programación sexa do voso interese.
 
Saúdos
 
O equipo de Espazo Lectura


Estamos de volta

Boas!

Logo deste parón obrigado a causa dunha pandemia e sumado ás vacacións estivais, a Casa da Lectura da comezo de novo a algunha das súas actividades. 

Aínda que vai ser moi difícil polo de agora retomar as actividades infantís na Casa da Lectura, en Espazo Lectura si que estamos argallando o comezo dunha nova tempada. Este mesmo mércores 7 de outubro da comezo o servizo de empréstito de libros e outros fondos da biblioteca da Casa da Lectura a todas aquelas persoas interesadas. O horario será de 17:30 a 18:30 horas, será obrigatorio o uso de máscara e haberá un aforo máximo limitado a 5 persoas.
O catálogo dos fondos bibliográficos pódese consultar no seguinte enlace: 
 
Para outras actividades teredes novidades moi pronto. 
 
Distribuir contenido


by Dr. Radut