HISTORIA DO COLEXIO
O noso Colexio comezou a súa andadura no mes de setembro do ano 1.989. O primeiro solar que ofreceu o Concello para a súa construción non lles parecía idóneo ós veciños de Peitieiros, polo que tiveron que buscar a actual situación.
O Colexio Público Comarcal de Peitieiros –foi o seu primeiro nome- empezou o curso 89/90 cheo de ilusións e coas carencias propias dun centro novo. Conservamos a notificación do Concello de Gondomar de data 27 de setembro de 1989 sobre a potabilidade da auga. Foi construído para 16 unidades de E.G.B. (Educación General Básica), o tramo educativo anterior ó Ensino Primario que se estuda agora. O alumnado estaba no colexio entre os 6 e os 14 anos, aínda que algúns e algunhas quedaban un par de anos máis con nós, ata os 16.
Non sería inaugurado ata o 18 de novembro polo Conselleiro de Educación D. Aniceto Núñez García, sendo Alcalde de Gondomar D. Ramón Sestelo Fernández. Conservamos no colexio as invitacións que enviou o Director D. Luis Carballo Moure para que asistisen as familias ó acto. Acompañaban ó director no equipo directivo o Xefe de Estudios D. Manuel Jario Rodríguez e o Secretario D. José Luis Fernández Álvarez.
O cambio a Colexio “Xosé Neira Vilas”
Na clase de lingua galega de 8º curso do ano 91, enviaron unha carta ó escritor Xosé Neira Vilas que naqueles momentos vivía en Cuba coa súa dona Anisia Miranda. Desa carta naceu unha bonita relación – polo momento só por escrito- que se estreitou máis unha vez que eles deixaron o país caribeño para establecérense definitivamente en Galicia, primeiro en Santiago e despois en Gres, Vila de Cruces.
Na contestación de Neira ós nosos alumnos comentáballes que en Cuba existía o costume de “apadriñar” colexios por parte de escritores ou persoalidades destacadas, polo que fomos dándolle voltas á idea de pedirlles que fixesen o mesmo aquí, co noso colexio. Propuxémoslles a idea e callou. En adiante, a nosa Biblioteca chamaríase “Anisia Miranda” e o noso colexio “Xosé Neira Vilas”. O acto do “bautizo” fíxose o 21 de maio de 1993 coa presenza dos nosos padriños.
O colexio “Neira Vilas” pasa a ser de Primaria
Coa entrada da nova Lei de Educación de 1990 o noso centro transfórmase en colexio de Ensino Primario, con clases de 1º a 6º. Con todo, e mentres non se rematou de construír o Instituto, demos clases do primeiro ciclo da E.S.O. durante dous anos.
Aconteceres
Nos dezanove cursos que leva o colexio funcionando pasaron moitas cousas, coñecemos a moitos alumnos e alumnas, a moitas familias. As nenas e os nenos coñeceron a outras moitas nenas e nenos que eran doutras parroquias do concello. Aprenderon a ler e escribir –que non é pouco-, a pescar, a achegarse ós periódicos na clase, a facer a revista “O arco da vella”, a collerse da man para celebraren xuntos moitos días da Paz.
As profesoras e os profesores tamén aprendemos moito de todo o alumnado que estivo con nós no colexio. Procuramos seguir educando persoas para que se comporten como tales no seu barrio, na súa parroquia, no seu concello e no mundo enteiro.
Se queres ver documentos e fotos históricas do colexio preme aquí .
