Ed. infantil

Chegou a primavera á aula de infantil! E como non podía ser de outra maneira démoslle a benvida sementando unhas flores moi especiais, os xirasois! Queredes ver todo o que fixemos? pois estade moi atentos!

O primeiro paso foi investigar o que hai que facer para plantar os nosos propios xirasois. E foi moi sinxelo, só tivemos que fixarnos nas instruccións que pon no paquetiño das sementes. Nas instruccións descubrimos que os xirasois teñen que sementarse na primavera, polo que estamos no momento perfecto! 
Xa sabemos que as prantas precisan terra, auga e un chisquiño de sol para nacer e crecer pero non sabíamos que as sementes do xirasol... son pipas! Que sorpresa levamos! 

Esta semana foi o cumpreanos do noso benxamín do cole, Dilan !!

Pero mirade como o queren os seus compañeiros e compañeiras...

E coma sempre, levou para a casa un mural cun simpático debuxo:

Pero que sorte verte medrar xunto a nós Dilan !! Que cumpras moitos máis e que nós o vexamos !!

Na aula de infantil levamos un tempiño traballando un conto de Eric Carle que non nos pode gustar máis "A Eiruguiña Comellona". A historia explícanos o ciclo vital dunha bolboreta pero non é o único que traballamos con el: os días da semana, os números, a importancia dunha alimentación saudable... Nesta entrada ensinámosvos algunhas das cousiñas que levamos feito, pero estade moi atentos que aínda nos quedan moito por contarvos!

Nesta imaxe podedes ver como os encargados son os que nos len o contiño antes de comezar a sesión de traballo, neste caso son Lucas e Dilan. E tamén podedes ver como durante os momentos de xogo libre Mireia e Valeria decidiron realizar as ilustracións do conto nas pizarras individuais, a que o fixeron xenial!

Estamos de aniversario! Na aula de infantil temos unha chea de celebracións durante o mes de abril e comezamos cunha moi especial. A nosa compañeira Mireia acaba de cumprir 6 anos, moitas felicidades!

Como xa sabedes este curso as celebracións son un pouco diferentes pero o que non pode faltar é un agasallo compartido para a homenaxeada: un cadro feito con moito agarimo entre todos! A Mireia encantoulle.

No trimestre pasado pasámolo xenial con contiños como Aurelio, Te quiero casi siempre, Iriña bailarina, Coelliño branco e Polo Camiño. Este último axudounos a traballar a seriación ata o 10 para o que empregamos tamén outros materiais de escritura, manipulativos e ata musicais, xa veredes!

Ademais de traballar o concepto de número, a lectoescritura, as seriacións, o conteo e os diferentes trazos co material impreso, fixemos varios xogos cos bits de intelixencia dos números ata o dez. Algún destes xogos ata os fixemos ao aire libre... que sorte temos no noso cole... poder gozar da natureza e dunhas vistas tan bonitas fai que todos os retos sexan máis sinxelos de afrontar! 

Hoxe queremos ensinarvos unha peza moi importante dentro da aula de infantil, importante porque é moi necesaria e importante, e tamén porque foi feita con moito agarimo por Ángeles, a coidadora do cole.

Durante moitos días Ángeles estivo traballando coa súa máquina de coser, xuntando telas con fíos de cores e fixándose moito para que todo quedase perfecto.
Non sabíamos nada, pero un día, entrou na nosa aula e... sorpresa! Fixera para nós un panel para as máscaras! Canto nos gustou e que faciliño era de usar! Mirade, mirade.

Xa comezou a primavera e estamos moi ilusionados porque xa estamos iniciando un novo proxecto cheo de cores e animaliños misteriosos. pero como vos decíamos a semana pasada queremos ensinarvos as últimas actividades sobre o mundo polar que realizamos fai xa un tempiño: Folerpas absorbentes e iglú xeométrico.

E seguimos de festa! Esta semana celebramos o aniversario de Mateo que xa cumpliu 5 anos! Parabéns!!!
E aproveitando o bo tempo que fixo esta semana, coa axuda da profe Carmen de psicomotricidade, fixemos unha foto xuntos no areeiro! 

Tamén, como cada vez que temos un compañeiro de aniversario fixemos un agasallo moi especial para que lembre todo o que o queremos. Moitos biquiños Mateo!

A semana pasada ensinámosvos algunha actividade que fixemos na aula de infantil relacionada co proxecto do mundo invernal. Hoxe continuamos con dúas actividades coas que o pasamos moi, moi ben! A primeira que queremos que vexades é un mural co que experimentamos coas texturas e as cores do inverno, mirade!

Como non podemos traer a neve á aula decidimos crear a nosa propia neve empregando espuma de afeitar, era suave desfacíase nas mans igual que cando as folerpas nos caen no nariz ou no pelo. Primeiro manipulamos este especial material artístico cun depresor pero... non tardamos moito en empregar as nosas mans. Foi divertidísimo!

Na aula de infantil comezamos o segundo trimestre cun novo proxecto moi invernal no que descubrimos moitas cousiñas relacionadas co Mundo Polar: os animais polares, os fenómenos atmosféricos, os esquimós, as vivendas polares... e para comezar este achegamento empregamos o conto "Os mil brancos dos esquimós" de Isabel Minhós Martins e Madalena Matoso, editado en galego por OQO.