Complementarias

As irmáns Mirabal, as tres bolboretas violetas

Xov, 03/12/2020 - 14:34 — admin

O alumnado de 4º ESO D e a súa titora, Menchu, sumáronse ao 25N reinvindicando as tres bolboretas, Patria, Minerva e María Teresa Mirabal, asasinadas baixo as ordes do ditador Trujillo o 25 de novembro de 1960 na República Dominicana. Esta reivindicación foi iniciada polo movemento feminista latinoamericano en 1981 e logo asumida pola Asemblea xeral das Nacións Unidas o 17 de decembro de 1999 na que se especificaba o que se entendía por violencia contra a muller:

«Todo acto de violencia baseado na pertenza ao sexo feminino que teña ou poida ter como resultado un dano ou sufrimento físico, sexual ou psicolóxico para a muller, así como as ameazas de tales actos, a coacción ou a privación arbitraria da liberdade, tanto se se producen na vida pública como na vida privada».

Dende a Concellaría de Igualdade de Soutomaior fixéronnos chegar ao centro diferentes materiais da campaña deste ano, Ultraviolenta. dando luz ás violencias invisibles, coa que se procurou poñer o foco sobre as violencias menos visibles pero igual de perigosas e presentes no día a día no noso contorno.

blogue de admin

Xornada de Formación do III Torneo de Debate Académico de Galicia

Lun, 30/11/2020 - 16:35 — admin

Esta mañá o alumnado de 1º de Bacharelato que cursa a materia optativa Obradoiro de Habilidades Comunicativas recibiu a formación preparatoria do III Torneo de Debate Académico de Galicia, no que o IES de Soutomaior contará con dous equipos.

Alba Formoso, profesora de oratoria, fundadora e presidenta da Escola de Debate e Oratoria TALKK, foi o encargada de impartir a formación, que se desenvolveu a través de videoconferencia debido ás restricións e medidas de seguridade obrigadas pola actual crise sanitaria. A pesar das limitacións do medio, o alumnado participou activamente nas propostas feitas por Alba Formoso, que introduciu as claves de iniciación ao debate, activou dinámicas que fixeron reflexionar o alumnado e deus a coñecer as características e a estrutura do torneo, que convocará na Coruña a 48 equipos e máis de 240 alumnos e alumnas entre o 25 de xaneiro e o 6 de febreiro.

Estes mesmo mércores publicarase a pregunta desta edición e a partir de entón comezará unha intensa fase de investigación sobre o tema proposto, a elaboración do argumentario e os discursos dos equipos e a súa posta en práctica. O camiño cara ao III TDAG aínda acaba de comezar.

blogue de admin

O Plan Revitaliza volta ao noso centro

Ven, 27/11/2020 - 14:33 — admin

Esta semana o Plan Revitaliza achegou ao alumnado a problemática dos residuos para seguir afondando na conscienciación da súa xestión e da responsabilidade que temos todos e todas na súa redución e separación a través de alternativas necesarias como a compostaxe.

No marco deste programa educativo impulsado pola Deputación de Pontevedra, o Departamento de Bioloxía e Xeoloxía organizou dúas charlas orientadas ao alumnado de 1º ESO e 1º BACH.

Da man de Teixugo S. Coop Ambiental, os máis cativos e cativas coñeceron máis polo miúdo quen son os "intrusos no composteiro". Nesta actividade analizáronse os residuos impropios que se poden atopar nos composteiros, a súa orixe, composición e os seus efectos sobre o medio. O principal obxectivo da charla foi identificar os microplásticos e coñecer o seu impacto ambiental.

Por outra banda, o alumnado de Bacharelato conseguiu, a través de sinxelos capturadores de fauna e material de aumento e chaves dicotómicas, realizar a identificación de invertebrados presentes no composteiro, sinalando a súa función no proceso da compostaxe.

blogue de admin

Boleto premiado no Sorteo Pro-Excursión París 2020

Mar, 30/06/2020 - 11:10 — admin

A alerta sanitaria decretada en marzo de 2020 truncou a ilusión do alumnado de 4º ESO, que ía celebrar a fin de etapa cunha viaxe a París para a cal estiveron traballando durante meses, tanto para financiarse como para coñecer e gozar plenamente da visita á capital francesa a través do Proxecto París.

A suspensión das actividades lectivas adiou o último sorteo organizado para acadar cartos para a viaxe, consistente nun programa para 2 persoas no Balneario Mondariz (aloxamento de 1 noite, almorzo buffet e unha actividade termal: Palacio da Auga ou Circuíto Celta).

Unha vez rematado o Estado de Alarma, procedeuse a facer o sorteo. O boleto premiado é:

Número 1109, vendido pola alumna Adriana Barros.

No caso de non aparecer antes do venres 10 de xuño a persoa gañadora, que debe presentar a rifa, o boleto suplente corresponde co:

Número 1740, vendido polo alumno Adán Piñeiro.

Para retirar o premio é preciso poñérse en contacto co centro no teléfono 886.159.801 ou no correo ies.soutomaior@edu.xunta.gal.

blogue de admin

O que Adriana Eugenio viu dende a súa xanela

Mar, 02/06/2020 - 10:59 — admin

Adriana Eugenio, alumna de 1º ESO B, vén de ser premiada no Concurso O que ves desde a túa xanela (categoría 12-14 anos) que convocou a Deputación co obxectivo de "descubrir a paisaxe que vemos desde a nosa xanela: as rúas, as árbores, o mar e o campo", mais tamén para "abrir unha xanela aos lugares aos que nos gustaría regresar e que partillamos coa familia e as amizades".

En palabras do xurado, o traballo de Adriana destaca "pola súa calidade artística amosando destreza na técnica da acuarela, a beleza dos trazos e o seu realismo".

Moitos parabéns, Adriana! Estendemos a nosa felicitación ás familias e ao profesorado de Plástica por animar e acompañar estes traballos de expresión artística dos rapaces e as rapazas durante o confinamento.

blogue de admin

A Xeración da Igualdade protagoniza o 8 de marzo no instituto

Lun, 09/03/2020 - 17:36 — admin

O Comando Igualdade organizou unha pegada de lemas a prol da igualdade e un photocall para que miremos o mundo con ollada violeta. Ademais, ao longo desta semana aparecerán máis textos en diferentes espazos do instituto. Non deixedes de ver as fotos e coñecer as demandas da que sen úbida ningunha vai ser a Xeración da Igualdade nesta ligazón.

Así mesmo, a Biblioteca sumouse a esta data de reinvindicación preparando unha selección de lecturas que podedes coñecer entrando no seu blogue.

blogue de admin

Pompidou no Proxecto París

Lun, 09/03/2020 - 17:24 — admin

A experimentación, a creatividade e o traballo en equipo rachou moitos tópicos que existen sobre a arte contemporánea grazas ao obradoiro que se desenvolveu o pasado mércores na Biblioteca.

O alumnado anticipou a visita ao Centro de Arte Georges Pompidou que terá lugar a finais de marzo e coñeceu, aprendeu e gozou coas propostas dos Jeff Koons, Duchamp, Joseph Beauys, Louise Bourgeois, Matisse, Delaunay, Yves Klein, a escola da Bauhaus..., e coas súas propias creacións, xa que por un día exprimentaron con materiais, formas, cores... como ben se pode ver na crónica da sesión e nas súas caras de curiosidade, paixón e felicidade.