O 22 de novembro de 2017 o IES de Chapela a través da alumna Carme Castro Viaño, e dos alumnos Rubén García Oliveira e Pablo Pérez Melón, participou nun pleno celebrado en Redondela, presidido polo Sr. Alcalde do Municipio, dentro do programa Cidades Amigas da Infancia. Dito programa quere contribuír a mellorar as condicións de vida dos nenos, nenas e adolescentes, mediante a promoción e a implantación de políticas municipais eficaces que garantan o seu desenvolvemento integral cun enfoque de dereitos.
Outros centros como o CEIP Quintela, CEIP Igrexa, CEIP Alexandre Bóveda, CEIP Laredo, CEP Santa Mariña e institutos como o Illa de San Simón, participaron na xornada deste 22 de novembro. Son os primeiros pasos na elaboración dun futuro Plan da Infancia e Adolescencia que determinará as medidas prioritarias ou actuacións concretas que se porán en marcha os próximos anos.
O IES de Chapela, con Carme Castro como voceira, apostou por rexenerar espazos naturais e urbanos degradados, mellorar as instalacións deportivas e a comunicación dentro do Concello, facendo do lugar onde vivimos un espazo seguro, de convivencia, pensado para as súas cidadás e cidadáns.
Parabéns ao alumnado que nos representou e ao profesorado que apoiou a iniciativa.
O IES de Chapela co pobo saharaui A comunidade educativa recadou 1236,60 € para o programa Vacacións en Paz.
Desde o pasado 9 de maio o IES de Chapela está desenvolvendo unha campaña de sensibilización sobre as condicións de vida dos refuxiados saharauis que levan desde 1975 en campamentos en territorio alxerino e o seu dereito a regresar á súa terra, ocupada polo goberno de Marrocos.
A campaña tamén ter por obxecto recadar fondos para o programa Vacacións en Paz, que organiza todos os anos a Asociación Galega de Amigos do Pobo Saharaui. Grazas a ese programa as nenas e nenos refuxiados entre 7 e 12 anos poden pasar dous meses do verán con familias galegas. Dese xeito evitan as altas temperaturas dos campamentos nesas datas (ata 50 ºC), acceden a revisións médicas e tratamentos (se os precisan) a través dun convenio co SERGAS e teñen contacto coa nosa cultura mentres aprenden as nosas linguas castelá e galega.
O custo de manutención das nenas e nenos é asumido por cada familia acolledora, pero o custo da viaxe e seguro (890€ por cada nena/o) debe pagalo a Asociación grazas ás achegas dos Concellos e a campañas como a desenvolvida no IES de Chapela.
En Chapela puxémonos como obxectivo que poida vir este verán unha nena ou un neno saharaui máis, para o que se precisarían 890€. Polo tanto acadamos con creces o obxectivo da campaña. Profesorado e alumnado voluntario do Ciclo de Integración Social percorreron as aulas de diurno e de nocturno para sensibilizar sobre esta situación.
Foto do alumnado de 4º ESO co reconto final de euros acadados
Vídeo realizado por unha alumna do Ciclo Superior de Educación Infantil que describe a historia e a situación actual do pobo saharaui
Documental La vida loca, sobre a Mara 18, e colateralmente, sobre a súa enconada rival, a Mara Salvatrucha, bandas creadas a partir de modelos xurdidos na cidade de Los Ángeles que sementan o terror no Salvador. Unha historia dunha imaxinaría contemporánea creada nun mundo globalizado e que describe as orixes dun dos probables mitos fundadores do crime organizado. Por último, como dato tráxico e arrepiante, o seu director, Christian Poveda, foi asasinado dun tiro na cabeza en setembro do 2009 por un membro das maras.
Desde a habitación dun motel na fronteira entre Estados Unidos e México un asasino a soldo, experto na tortura e o secuestro, relátanos os seus 20 anos de vida ao servizo do narcotráfico. Durante anos o sicario foi comandante da policía estatal de Chihuahua. Mesmo recibiu un adestramento da FBI. O sicario asegura que membros da policía e do exército están ao servizo dos cárteles e chega a escenificar o modo en que torturou ao último dos seus secuestrados. O protagonista do documental vive como un fuxitivo e o prezo pola súa cabeza é de 250.000 dólares. [Fonte: Teledocumentales.com]
O 20 de marzo de 2012 o alumnado de 1º, 2º ESO e PCPI asisitiu a unha charla impartida pola ONG Solidariedade Galega co Pobo Saharauí co fin de coñecer a realidade do Sahara e participar na campaña solidaria de recollida de alimentos, produtos hixiénicos, roupa, lentes... Os grupos de 3º e 4º ESO asistiron á charla o venres 23. Aínda que as charlas se centraron na ESO e PCPI, a campaña de recollida de alimentos fíxose extensible a todo o centro, sendo importante o grao de achegas realizadas por parte de toda a comunidade educativa: persoal non docente, alumnado, profesorado, e pais e nais. A todas e a todos grazas por contribuir, e por compartir a idea de que outro mundo máis xusto e solidario é posible.
O noso compañeiro Abel Gil, propúxonos subir este documento para activar as nosas conciencias e comprender a necesidade de derrubar barreiras nacionais, eliminar a ambición, o odio e a intolerancia. Todos e todas podemos contribuír a crear un mundo mellor onde a vida, esa marabillosa aventura, pague a pena vivila.
