Se queredes ver un dos números anteriores da revista escolar do C.E.I.P. "Nosa Señora dos Remedios", pinchade no seguinte enderezo:

http://issuu.com/esther.prieto/docs/pita

  RADIO FALADORA

Para este curso que comezou a súa andaina, unha das actividades para o uso do galego, propostas polo ENDL e Biblioteca,  era a creación dunha emisora de Radio Escolar.

Pois, ben esta emisora xa está funcionando dende o pasado día 8 de outubro; e aínda que estamos aprendendo e facendo probas xa levamos 4 programas, nos que ademais de levar a cabo un concurso para elixir o nome (a gañadora foi unha alumna de 5º: Vérónica Vázquez Pumeda, que nomeou a nosa radio como RADIO FALADORA,este será o nome polo que se recoñeza de agora en diante), xa fixeron a súa intervención os alumnos de 1º B e 4º B.

Da emisión destes programas de radio, que se emite nos mércores alá polas 12 e cuarto da maña, encárganse  catro alumnos-locutores de 6º que van rotando, neste primeiro trimestre.

Os programas constan de novas do colexio, actividades (adiviñas, monográficos, resumo de saídas...) que os alumnos xunto cos seus titores/as propoñen e música que os alumnos elixen.

Animádevos a  deixar a vosa opinión proposta, así como a participar.

Arquivos adxuntos dos programas emitidos até o de agora.

RECUNCHO GALEGO

               Outra das actividades propostas polo ENDL para este curso a nivel de linguaxe escrita é o Recuncho Galego. Tratase de dous murais que permanecerán cada un nunha entrada do colexio para que os alumnos vaian deixando escritos.

Neste trimestre a proposta é  deixar adiviñas, refráns, trabalinguas ou cantigas que se refiran ao outono escritas en papeis con forma de follas, cogomelos, landras, castañas...

Agardamos axiña se enchan, logo recolleranse e confeccionaranse libriños para a Biblioteca.

PROXECTO DE FOMENTO PARA O USO DO GALEGO

DO EQUIPO DE NORMALIZACIÓN E DINAMIZACIÓN LINGÜÍSTICA

INTRODUCIÓN      

  Para potenciar o uso da lingua galega no centro constitúese o Equipo de Normalización e Dinamización Lingüística, tal e como dispón o actual Decreto 124/2007,do 28 de xuño, no artigo 18; que actuará baixo a supervisión da Dirección do centro e está composto por mestres/as dos distintos ciclos educativos, 1 mestra titora de E. Infantil, 1 titora do 1º Ciclo de Primaria, 1 do 2º Ciclo de Primaria, 1 do 3º Ciclo de Primaria, 1 especialista de Música, e 1 especialista de Audición e Linguaxe, que exerce como coordinadora,  asemade poderán incorporarse ao traballo de equipo outros membros da comunidade educativa para tratar temas puntuais.        O Equipo de Normalización e Dinamización Lingüística, reúnese con carácter ordinario unha vez ó mes, e con carácter extraordinario, todas aquelas veces que sexa necesario para dar cumprimento as súas funcións.       Neste proxecto incluímos as actividades e material que o Equipo de Normalización e Dinamización Lingüística considera necesarios para o curso 2007-2008, para poder dar cumprimento dos obxectivos propostos por este equipo e que figuran na Programación Xeral Anual.      Hai que salientar  que a pesares de que unha boa parte do noso alumnado provén do rural con fala galega, unha gran maioría, agora que se está a revisar o estudo sociolingüístico do centro, é castelán falante. Polo que o noso obxectivo fundamental é acadar unha correcta competencia comunicativa no uso do galego tanto a nivel oral como escrito, ao abeiro da Lei 3/1983 do 15 de xuño, de normalización lingüística, en desenvolvemento das previsións dos artigos 3.2 e 148.1º 17 da Constitución española e mais do artigo 5 do Estatuto de autonomía de Galicia, onde se establece a obriga de garantir o uso normal do galego e do castelán , así como que o galego é lingua oficial no ensino en todos os niveis educativos. Igualmente o Plan Xeral de normalización da lingua galega, aprobado por unanimidade o 22 de setembro de 2004 reitera a necesidade de promover e apoiar aquelas medidas que axuden a incrementar o uso da lingua galega, quedando regulado o seu uso e promoción no actual Decreto 124/2007, do 28 de xuño para a súa aplicación en todos os centros docentes que imparten as ensinanzas reguladas na Lei orgánica 2/2006, do 3 de maio, de educación (DOG nº 125, do 29 de xuño).
1.- DATOS FÍSICOS DO CENTRO   1.a) SITUACIÓN DO CENTRO E GRAO DE DISPERSIÓN.            

O C.E.I.P. “A Nosa Señora dos Remedios” está situado no centro urbano da vila de Ponteareas na rúa Azorín, s/n. A este colexio acoden alumnos e alumnas das parroquias de Padróns, Ribadetea, Pías, Nogueira, Moreira, Bugarín  e Cristiñade, así como parte do alumnado do centro urbano de Ponteareas. Hai escolas de educación infantil en Ribadetea e unha escola de educación infantil e 1º ciclo de E. Primaria en Pías. O alumnado destas escolas sigue os estudios de E. Primaria no C.E.I.P.  “Nosa Señora dos Remedios”.  Tamén acoden ao Colexio alumnos e alumnas de E. Infantil que viven no casco urbano de Ponteareas, segundo a distribución feita pola Administración. A poboación nestas parroquias é moi dispersa e funciona o servizo de comedor no Colexio. Xeograficamente estamos incluídos na Comarca do Condado.      

1.b) TRANSPORTE            

Algo menos da metade dos alumnos e alumnas deste Colexio veñen no transporte escolar por mor das grandes distancias que hai entre as súa vivendas e o Centro (nalgúns casos máis de 10 quilómetros). Os alumnos/as transportados xantan no comedor do Colexio.      

1.c) SERVIZOS E ASOCIACIÓNS            

Dentro da zona á que pertence o alumnado deste Centro hai que diferenciar entre os servizos que existen no núcleo urbano de Ponteareas e os que existen nas outra parroquias.             No casco urbano de Ponteareas podemos dicir que existen todos os servizos propios dunha vila que, polo seu número de habitantes en constante aumento, non tardará moito en ser cidade. Hai catro farmacias, un pavillón deportivo, Piscina Municipal Climatizada, tres colexios públicos e dous privados concertados, biblioteca, Museo, Auditorio, Taxis, varias librerías... Hai tamén un centro médico da Sanidade Pública ao que acoden todos os veciños do concello incluídos os das parroquias. Tamén hai tres Institutos de Ensino Secundario ( o IES Val do Tea e o I.E.S. Pedra da Auga e o Centro de Formación Profesional Agrícola A Granxa, hoxe convertido en I.E.S. mantendo as especialidades que tiña).             Nas parroquias son moitos menos os servizos cos que contan. Nalgunhas hai Comunidades de Montes, Asociacións de veciños, Casas culturais, campo de fútbol e pouco máis. Teñen servizo regular de transporte moi restrinxido, polo que ás veces non é fácil facer que os pais/nais poidan vir ao Colexio a non ser por medios propios de locomoción. En todas está xeneralizado o teléfono.      

1.d) SERVIZOS DO CONCELLO QUE INFLÚEN NA NOSA COMUNIDADE ESCOLAR.            

Como se sinalou antes hai un Centro de Saúde na capital do Concello ao que acoden todos os veciños tanto do centro urbano como das parroquias. Neste Centro de Saúde hai un servizo de urxencias, aínda que todos os casos un pouco graves son enviados ao Hospital do Meixoeiro de Vigo. As especialidades médicas están en Vigo. Hai así mesmo, un servizo de ambulancias.             O Concello conta con asistenta social e con algúns servizos de apoio escolar (psicóloga, logopeda,...) que están concentrados en ASPRODICO, unha entidade creada para atender a nenos/as con graves problemas. Trátase dunha entidade semiprivada.             No auditorio municipal fanse algúns dos festivais organizados polo Colexio. Tamén hai unha Biblioteca Municipal e unha ludoteca que ofertan algunhas actividades para o alumnado da zona. Os alumnos do CEIP Nosa Señora dos Remedios fan uso deste servicio unha vez por trimestre.             Hai recollida de lixo diaria de luns a sábado no centro urbano do pobo e nas parroquias tamén hai recollida do lixo pero non diaria.       

1.e) NIVEL SOCIOCULTURAL         

 Unha boa parte da poboación pertence á clase media-baixa. Nas parroquias hai bastantes familias con dificultades económicas importantes. O nivel de estudios non é moi alto na maioría dos pais e nais destas parroquias, aínda que pouco a pouco van sendo máis os que seguen estudando despois do ensino obrigatorio. No casco urbano hai de todo, pois tanto veñen alumnos/as de familias cunha boa situación económica como outras con dificultades moi importantes que incluso teñen que pedir axudas para compra-lo material escolar.             Comeza a ser importante a presenza de alumnos/as estranxeiros e minorías étnicas que requiren dunha atención especial para que se integren axeitadamente co resto do alumnado.                                              
  1.f) LINGUA MAIORITARIA 

            A lingua maioritaria no alumnado do Colexio é o Galego. En case todos os alumnos e alumnas que veñen das parroquias do rural o Galego é a lingua empregada e é a lingua na que aprenden a falar. Nos alumnos/as da capital do Concello unha boa parte falan a lingua castelá, aínda que na maioría dos casos, con estruturas propias do Galego e incluso con palabras galegas (castrapo).              Hai influenzas do portugués pola proximidade que hai entre a nosa zona e a fronteira con Portugal. Nótanse estas influenzas moito nos numerosos casos que hai de alumnos/as e incluso de pais e nais que teñen rotacismo, así como nalgunhas das palabras que empregan.       

1.g) RECURSOS DO CENTRO      

1.g.1) PERSOAIS                     

Este colexio consta de 15 unidades de E. Primaria e 7 de E. Infantil, segundo o catálogo de postos de traballo.Neste catálogo figuran 14 postos de E. Primaria, 7 de E. Infantil, 2 especialista en Pedagoxía Terapéutica, 1 especialista en Audición e Linguaxe, 2 especialistas en E. Física, 3 especialistas en Filoloxía Inglesa, 1 especialista en Primaria Francés, 1 especialista en Música e un orientador.           Este curso ademais hai a maiores 1 mestra especialista en Apoio a Estranxeiros, dúas mestras de apoio a  E. Infantil  nesta etapa e un mestre PROA, contratado pola Consellería especificamente para esa función. Para impartir a Relixión hai dúas mestras nomeadas pola Consellería e compartidas con outros centros. Como persoal non docente, hai unha conserxe que pon o Concello de Ponteareas e que ten vivenda no Colexio, 1 cociñeiro, 2 axudantes de cociña. O servizo de limpeza está feito por 2 limpadoras a cargo do concello.Por outra banda, para atender o comedor hai un grupo de nais/pais que vixían o comedor e o tempo do xantar. Non contamos con persoal non docente administrativo.         1.g.2) RECURSOS ESPACIAIS           

O Colexio foi construído para 16 unidades. Pero hai dous cursos comezou a funcionar unha ampliación na que se instalaron  7 unidades de E. Infantil. Quedando na edificación antiga 15 unidades de E. Primaria, e as aulas anteriormente habilitadas para a E. Infantil repartíronse para aula de Inglés, vídeo, material e instalación dun canón coa súa pantalla para as sesións de Estimulación da Linguaxe en Infantil levadas a cabo pola mestra de Audición e Linguaxe; a outra aula de infantil pegada ao pavillón quedou para a Psicomotricidade en Infantil, aínda que non é moi axeitada.                        Hai unha aula que funciona como aula de informática e outra como aula de música. Tamén temos un local onde está a Biblioteca Xeral do Centro,  que basicamente funciona como un servicio de préstamo.             A aula de apoio e a aula de audición e linguaxe están en dependencias en principio disposta para outros usos. O despacho do Orientador está no local antes destinado ao Gabinete Médico. Non hai aula para laboratorio nin unha aula de usos múltiples adecuada. Hai dúas pequenas dependencias para titorías, unha sala de profesores/as, un local para a Dirección, outro para a Secretaría e outro para a Xefatura de Estudios. Non hai un local axeitado para poder facer os festivais ou actividades nas que participe todo o alumnado do colexio.Tampouco hai unha dependencia que poda ser ocupada pola ANPA. En canto a instalacións deportivas a situación non é moi boa. Non hai unha pista cuberta, polo que cando chove (e isto sucede nun número moi importante de días do curso) non hai un lugar onde poidan xogar os alumnos/as; a dependencia que funciona como ximnasio cando chove está impracticable pola humidade e a condensación que ten, facendo perigoso face-la Educación Física na mesma. Hai unha pista con cemento descuberta e un terreo de terra con dúas porterías de fútbol para xogar os nenos/as. No patio hai algunhas zonas achegadas ao muro con importantes desniveis que poden resultar perigosos para o alumnado. Aínda que recentemente se investiron unhas cantidades importantes de diñeiro por parte da Consellería, son moitas as deficiencias que segue a ter un Colexio que se fixo hai case corenta anos, cando se puxo en marcha a Lei Xeral de Educación de 1970.                     

1.g.3) RECURSOS MATERIAIS            

O Centro conta cos recursos materiais sinalados no inventario do mesmo. Ademais tamén se utilizarán os materiais propios do alumnado.       

 1.h) RATIO            

A ratio de alumnos/as por grupo é de 25, seguindo a lexislación vixente.

 2.- IDENTIDADE. 

A) LÍNGUA DE APRENDIZAXE            

 Partindo de que a lingua maioritaria dos/as alumnos/as do Colexio é o Galego, propoñemos que a aprendizaxe das técnicas instrumentais se debe facer en lingua galega. Polo tanto, en E. Infantil e no 1º ciclo de E. Primaria, usarase o Galego como lingua de aprendizaxe, sen excluír a Lingua Castelá nas horas legalmente establecidas. No segundo e terceiro ciclo de E. Primaria, respectaremos a legalidade vixente tanto con respecto ao uso da Lingua Galega como ao uso da Lingua Castelá, tentando que ao remate da E. Primaria todo o alumnado do Colexio domine por igual as dúas linguas. Ao remate da E. Primaria avaliarase mediante as probas axeitadas se se cumpre ou non este obxectivo. Tamén se respectará, claro está, a legalidade vixente en canto ó ensino das linguas estranxeiras. 

B) LIÑA METODOLÓXICA            

 A metodoloxía a aplicar adaptarase á diversidade que existe entre o alumnado do Centro. Aplicarase a metodoloxía da aprendizaxe por descubrimento e da aprendizaxe significativa. Ademais, utilizaranse aquelas estratexias metodolóxicas que sexan de utilidade para acadar os obxectivos que sirvan de apoio e complemento ás citadas anteriormente. Basearémonos polo tanto, nos seguintes principios:             *Globalización.            *Socialización.            *Individualización.                 *Actividade.            *Dificultade progresiva.            *Interese.            

En todo caso, sempre se partirá da realidade inmediata do/a neno/a, abarcando os tres ámbitos do coñecemento (cognitivo, afectivo-social e psicomotor). Toda aprendizaxe partirá dos coñecementos que teña o/a neno/a, así como das súas características psicoevolutivas, indo de menor a maior dificultade.  Na liña co dito anteriormente, dende o intre no que o/a neno/a acode ó Colexio por primeira vez, non recibirá soamente un volume de información máis ou menos alto, senón que o/a mestre/a dirixirá os seus esforzos cara a relaciona-la aprendizaxe significativa e por descubrimento co ensinar a aprender, potenciando en cada caso as técnicas de traballo e de aprendizaxe adecuadas. A presentación das aprendizaxes será motivadora e buscando sempre espertar o interese do/a neno/a. Esta liña metodolóxica irá enfocada cara á formación e respecto dos valores humanos, democráticos e á educación para a igualdade sen discriminación por razóns de sexo, raza, relixión, etnia, nivel económico,. O material educativo elixido non deberá ir contra destes principios, e será labor do profesorado que a presentación de contidos manteña esta liña metodolóxica.Os grupos na clase faranse sen utilizar como criterio ningún tipo de discriminación de sexo, familia, raza, crenzas,... 

C) CONFESIONALIDADE           

  Por ser o C.E.I.P. “A Nosa Señora dos Remedios” un centro público, neste aspecto seguiremos a lexislación vixente, respectando todas as confesións relixiosas. Impartirase Relixión Católica a todos os alumnos e alumnas que os seus pais/nais así o desexen e os demais ocuparán este tempo con actividades alternativas á Relixión dirixidas por un mestre/a. Seguindo a normativa, os pais/nais asinarán un impreso ao comezo de curso manifestando se desexan que o/a seu/súa fillo/a reciba clases de Relixión ou non. Os pais/nais de alumnos/as de novo ingreso farano cando se matriculen.   O Colexio controlará todo tipo de actos que poidan afectar a este apartado.

 D) PLURALISMO E VALORES DEMOCRÁTICOS    

 Tentarase que o alumnado deste colexio tome conciencia da igualdade das persoas sen distinción de ideoloxías, razas, relixións, sexo, clases sociais,..., fomentando actividades de respecto e sabendo escoitar e rebater ideas dos demais con espírito crítico, pero sempre dende normas de convivencia democráticas. Fomentarase o respecto polas persoas maiores e polas que padecen discapacidades de calquera tipo. 

E) COEDUCACIÓN            

As clases serán mixtas e nunca poderá utilizarse como criterio para agrupar ao alumnado o sexo. Non existirá ningunha actividade lúdica, docente,..., que estea especialmente dirixida a un sexo determinado. Nas actividades e servicios complementarios, como o Comedor, non existirán tarefas diferenciadas segundo o sexo. A educación será integral, non habendo ningún tipo de diferenciación en canto as materias, charlas, conferencias, ou calquera outro aspecto referente ao ensino. 

3.- relacións entre os membros da comunidade educativa A) RELACIÓNS MESTRES/AS-PAIS/NAIS           

  No comezo de cada curso os/as mestres/as manterán contactos cos pais e nais dos seus alumnos/as. Para isto poderán utilizarse os seguintes medios:            *Reunión colectiva con tódolos pais/nais do seu grupo.            *Entrevista individual con cada un.           

En todo caso, estas reunións e entrevistas faranse durante o 1º trimestre de curso.  Ao longo do curso poderá recibirse ós pais/nais, segundo o horario de atención ós pais/nais que se estableza e que deberá ser comunicado a todo o alumnado. Sempre que sexa posible, a atención ós pais será previa cita.             No caso de que os pais/nais non acudan a unha chamada do mestre/a, volverá a producirse a convocatoria por algún medio polo que quede constancia de que a citada convocatoria lle chegou ao pai ou á nai do alumno/a en cuestión.             Cando algún alumno/a teña faltas de asistencia, estas deberán ser xustificadas polos pais. No caso de que haxa un número importante de faltas de asistencia sen xustificar, o Colexio porase en contacto con quen corresponda (asistencia social, Consellería de Familia,...) para que adopten as medidas oportunas.

 B) RELACIÓNS CENTRO – A.N.P.A.          

   O Centro manterá todos os contactos que se estime oportunos coa A.N.P.A. naqueles temas nos que sexa importante contar con ela. O Centro estará sempre en boa disposición para tratar as propostas que faga a A.N.P.A., mantendo todas as reunións que sexan necesarias. 

C) RELACIÓNS CENTRO – CONCELLO           

  O Centro participará naquelas actividades que promovidas polo Concello, sexan aprobadas polo Consello Escolar do Colexio e sexan consideradas de interese para o alumnado do mesmo.             Do propio Centro poderán partir propostas nas que pode participar e colaborar o Concello. Serán utilizadas dependencias propiedade do Concello para levar adiante algunhas das actividades de Colexio, como por exemplo os festivais que se fagan en local pechado procurarase que sexan no Auditorio Municipal. 

D) RELACIÓNS CENTRO-OUTROS CENTROS.            

 O Colexio poderá participar e promover actividades de intercambio cultural e deportivo con outros colexios, tanto da zona  como de outras partes da Comunidade Autónoma. Todos os anos participamos no Certame Literario organizado polo CEIP Santiago de Oliveira con motivo das Letras Galegas; ademais de cartearse con el todos os niveis de E. Primaria. 

 E) CENTRO – EXALUMNOS/AS Promoveranse actividades nas que poidan participar e colaborar. 

F) CENTRO CON OUTRAS ENTIDADES             Promoveranse actividades nas que poidan participar outras asociacións ou colectivos, co fin de fomentar o intercambio cultural con outras zonas e a formación e relacións sociais dos/as alumnos/as do centro cos de outras zonas.             Solicitarase a colaboración da Deputación e de outras entidades nestas actividades. Tamén solicitaremos a colaboración  e axuda de persoas e colectivos alleos ao Colexio para organizar actividades de diverso tipo (ecolóxicas, Letras Galegas, Día da prensa, Día do libro, conferencias,...)            Todos os cursos os alumnos de 6º de Primaria visitan o Museo de Pontevedra, actividades subvencionada pola Deputación Provincial. 

4.- PLAN XERAL PARA O USO DO IDIOMA     

       Este equipo ten marcado un obxectivo fundamental: 

-  Impulsar o uso do Galego no colexio, en todos os ámbitos e en todas as situacións, facendo consciente da súa transcendencia a toda a comunidade escolar.           

Outros obxectivos son:   

-  Intentar promover que a lingua vehicular sexa o Galego e que os materiais curriculares estean en Galego, seguindo sempre unha liña de persuasión e motivación e non de imposición, no convencemento de que esta última faría estériles os nosos obxectivos.

-  Procurar a ampliación do fondo bibliográfico galego, infantil e xuvenil, da Biblioteca Escolar.

-  Procurar e facilitar contidos da realidade cultural galega para a súa inclusión nos currículos.

- Continuar coa edición da revista escolar (un nº por trimestre) como medio de comunicación e expresión, na que participen todos os niveis; na que se irán aplicando as Tics, presentándoa na web do colexio e en formato dixital.

- Levar a cabo visitas escolares, realizando as correspondentes actividades que teñan especial significación coa cultura galega, preferentemente no entorno próximo (Castro de Troña, Museo Municipal, Muíño das Córtellas, Castelo de Sobroso...)

- Valorar o intercambio cultural dos nosos alumnos/as e procurar unha adaptación tolerante e positiva por todos os membros da Comunidade Educativa.

- Colaborar coa mellora do proceso lector en galego a través da mascota  “Popi”  mediante a creación de contos polos alumnos dos distintos cursos, que incrementarán o noso recuncho creativo na Biblioteca.

-  Fomentar o uso do galego e o axudar no proceso lector coa creación de contos que parten oralmente de Infantil e van ao 3º Ciclo de Primaria para a súa redacción, logo  no 1º e 2º Ciclo encárganse da súa ilustración e encadernación,  tamén da gravación das voces unha vez que os do 3º Ciclo fagan o escanado para o formato dixital. Rematando cunha proxección e representación teatral do conto máis votado para toda a comunidade educativa.    

5.- PLAN ESPECÍFICO  

  En cumprimento do disposto polo Decreto 124/2007,do 28 de xuño, polo que se regula o uso e promoción do galego no sistema educativo. Segundo se establece no Artigo 7 do citado Decreto a lingua que se emprega na E.Infantil é a materna (até o de agora o galego,estando todo o material en galego pero respectando a lingua materna nos casos que non é o galego) coidando  que os alumnos adquiran, de forma oral e escrita, coñecementos na outra lingua oficial de Galicia. No 1º Ciclo da E. Primaria o material curricular está en Galego, agás o de Lingua Castelá e no 2º e 3º Ciclo da E. Primaria a terceira área en Galego era a de Matemáticas, pero tamén se impartían en galego a Música e a Educación Física; a partires do novo Decreto e segundo dispón no seu Artigo 8 en toda a etapa de educación primaria impartiranse en galego ademais das anteriores a de Educación para a cidadanía e dereitos humanos.        Para acadar os obxectivos expostos levaranse a cabo unha serie de actividades que aparecen na programación Xeral Anual, e aquelas que vaian xurdindo a longo do curso e sexan de interese.        Hai que salientar que durante os dous últimos cursos  con motivo de darlle un impulso ao uso da Biblioteca e animar a lectura aos nosos alumnos/as creouse unha mascota a partires dun concurso entre os alumnos de todos os niveis, saíndo elixida unha vaca de nome Popi; que nun principio se ampliou en relevo para a porta da Biblioteca e que se encargaba de facerlles chegar unha vez por trimestre unha carta a cada aula onde se lles pedía a creación dun conto a partires dunha idea. Tamén  se  creou unha mascota, o máis semellante a realidade posible, pero tendo sempre como modelo a orixinal, para o interior da Biblioteca e así lles resultase máis motivadora e actuase  tamén como elemento de compañía a hora da lectura.        Tamén o curso pasado se comezou a elaboración do xornal  co ordenador coa axuda da clase de Informática, que  empezou a funcionar de xeito xeral para todos, pois nos ordenadores desa aula aparece unha carpeta co logotipo da “Pita Faladora” onde iran deixando os seus traballos para logo seleccionar e elaborar o remate de cada trimestre.            Nos dous últimos cursos  veuse celebrando unha convivencia no mes de xuño co gallo do remate do curso na E. Infantil, hai que salientar aquí, que ademais de continuar a facerse  en cursos vindeiros os talleres de traballo constan de varias actividades e entre elas esta o teatro e o conta contos que se levan a cabo en galego; nesta convivencia ademais dos titores desta etapa e algúns especialistas están implicados tamén os pais e nais dos alumnos/as.       Na E. Primaria como remate de curso os mestres especialistas de Educación Física, e coa axudas dos demais mestres desta etapa, propuxeron un circuíto de xogos populares e baile.       Neste curso ademais do acto das Letras Galegas dedicado a Xosé Mª Álvarez Blázquez pretendese que os alumno elaboren carteis mensuais para ir coñecendo a súa vida obra e época ao longo do curso; tamén se pretende renovar os carteis que nomean as aulas con diferentes escritores galegos e engadir a lista os das aulas do novo edificio que aínda están sen nomear.       Co gallo do novo decreto e para darlle un pulo ao uso do galego e ao proxecto lector quérese comezar unha nova actividade que permaneza nos vindeiros cursos como é a creación de contos implicando a todos os niveis e tanto oral coma escrito ademais de vincular as novas tecnoloxías sen deixar atrás o tradicional. Pretendese que a actividade parta de E. Infantil a nivel oral para en Primaria darlle formato de libro e logo de gravación nun programa de ordenador como pode ser o movie-maker ou powerpoint, para rematar con proxección e representación teatral.       A continuación detállanse as actividades pensadas para acadar os obxectivos propostos. O proxecto forma parte da PXA e algunhas das actividades levadas a cabo fináncianse directamente dos gastos de funcionamento do centro. Por iso non aparecen reflectidas neste cadro: 
  ACTIVIDADES 

     Ponteareas, a  12 decembro de 2007.  

 A coordinadora do Equipo.                     Vº e Prace do Director .    

Asdo:Mª Esther Prieto Prieto             Asdo: Regino Garrido Figueiras   

 EQUIPO DE NORMALIZACIÓN E DINAMIZACIÓN LINGÚÍSTICA:

 O camiño percorrido até a actualidade  

O equipo de normalización lingüística comezou a funcionar no curso 1990-91. Os daquela denominados como ENL creáronse para dar resposta a unha necesidade evidente: desde a súa aprobación en 1983, a Lei de normalización lingüística sinala que os centros de ensino teñen como obxectivo conseguir que os alumnos e alumnas adquiran unha boa competencia nas dúas linguas oficiais. Dese obxectivo, nace a necesidade de adoptar un conxunto de medidas de actuación positiva dirixidas á promoción da lingua galega e, así mesmo, unha planificación lingüística na que se contemple o uso que se fará das dúas linguas no ámbito escolar.  Nestes anos, o ENL veu desenvolvendo un amplo e variado conxunto de actividades.  Desde o seu inicio, o ENL contou cunhas axudas económicas anuais, así como cuns seminarios de formación, os encontros dos ENL, nos que se trataban diferentes temas teóricos e se intercambiaban experiencias. Algunhas dos seus labores que podemos citar:

• O traballo de dinamización dirixido á comunidade educativa, tentando eliminar prexuízos e fomentar o uso do galego, tanto na vida do centro coma nas aulas.
• O   labor de recuperación das festas de carácter anual (magosto, Entroido, Maios, etc.), salientando a súa vertente normalizadora.
• O   labor de asesoramento ao profesorado, informando sobre os materiais existentes en galego.
• A edición de revistas e outros tipos de publicacións escolares e, nos últimos anos, de páxinas web dos centros.

Tamén se puideron constatar ao longo destes anos algúns desaxustes que cómpre corrixir no futuro. Entre eles, sinalaremos estes tres:

• A confusión do ENL co Departamento de Lingua Galega, sobre todo nos centros de ensino secundario. Cando se deu esta confusión, o ENL correu o perigo de ser considerado algo propio «dos de galego»,cando, como ben sabemos, se trataba dun organismo do centro, no que tiña que estar implicado o profesorado das diferentes áreas.
• A tendencia a considerar que o ENL era o responsable da realización das actividades extraescolares, cando, en realidade, este era un labor de todo o centro. Aínda que o ENL tamén podía, e debía, colaborar nelas, non era ese o seu labor primordial.
• A crenza, por parte do profesorado dalgúns centros, de que o ENL era tan só un equipo de persoas voluntaristas, preocupadas pola normalización da lingua. Mais, como claramente se indicaba no desenvolvemento legal, o ENL era un órgano do centro, tiña carácter oficial, e as súas propostas de actuación, unha vez asumidas pola Dirección e polo Claustro, afectaban o centro no seu conxunto. 
  

A nova regulamentación dos equipos

 No Decreto 124/2007 sinálase que os equipos pasan a se denominar equipos de normalizacióne dinamización lingüística (ENDL), coas seguintes características (artigo 18):

• Para potenciar o uso da lingua galega nos centros dependentes da Consellería de Educación e Ordenación Universitaria, constituirase un Equipo de Normalización e Dinamización Lingüística, que actuará baixo a supervisión da Dirección do centro e que estará formado por profesorado, por representantes do alumnado, agás no ensino infantil e primario, e persoal non docente.
• Os membros do equipo serán designados pola Dirección do centro do seguinte xeito:

                           a) O profesorado, por proposta do Claustro de profesores.

                        b)O alumnado, por proposta das súas asociacións máis representativas.

                           c) O persoal non docente, por proposta deste persoal.

• A composición do Equipo de Normalización e Dinamización Lingüística para cada tipo de centro, as súas competencias, e o nomeamento, cesamento e competencias do seu coordinador serán establecidas nos regulamentos orgánicos dos centros educativos. Na constitución destes órganos tenderase a unha composición equilibrada de mulleres e homes.
• Os equipos de normalización e dinamización lingüística deberán ter un papel fundamental no deseño, posta en práctica e revisión dos programas de normalización lingüística nos centros educativos, tal e como se prevé no Plan xeral de normalización da lingua galega.
• Os equipos de normalización lingüística contarán co apoio técnico necesario e os centros terán a debida dotación de recursos didácticos, pedagóxicos e material en galego. Ademais, o EDNL ha desempeñar un papel relevante na elaboración do Proxecto lingüístico de centro, tal como se recolle no artigo 14.2:2. O proxecto lingüístico formará parte do Proxecto educativo do centro. Será redactado por unha comisión do profesorado do centro, designada polo Equipo Directivo, oída a Comisión de Coordinación Pedagóxica. Na súa composición terá especial relevancia o Equipo de Normalización e Dinamización Lingüística e os compoñentes dos departamentos das outras linguas.  

      Tendo en conta os aspectos que se acaban de comentar, os puntos principais dos ENDL poden quedar sintetizados nos seguintes aspectos:

• A misión central dos ENDL será a de potenciar o uso da lingua galega nos centros educativos, e ha de ter un papel fundamental no deseño, na posta en marcha e na revisión dos programas de planificación nos centros educativos.
• Estará formado por profesorado, representantes do alumnado (agás no ensino infantil e primario) e por persoal non docente; a designación dos membros do ENDL será competencia da Dirección de cada centro.
• A coordinación dos ENDL terá os mesmos dereitos administrativos e económicos cás xefaturas dos departamentos didácticos.
• O ENDL actuará baixo a supervisión da Dirección do centro.
• A composición, competencias e todo o que ten que ver coa coordinación estará establecido nos regulamentos orgánicos dos centros.  

As medidas básicas que debe adoptar un ENDL 

Despois de constituírse de acordo coa normativa que estea en vigor, o ENDL debe conseguir os medios necesarios para o seu funcionamento:

a) Que se contemple de xeito efectivo a súa existencia como un dos órganos do centro, reservándose tempos e espazos para as súas reunións. Neste sentido, para asegurar a eficacia do funcionamento do ENDL sería preciso que o centro lles dispoña aos seus membros un horario que permita realizar xuntanzas semanais.

b) Que se lle destine unha partida económica dentro do repartimento orzamentario. Este orzamento do ENDL debe ser independente das posibles subvencións específicas que se poidan recibir por parte da Administración.

• Establecer contactos, para posibles colaboracións, cos ENDL doutros centros do contorno (o artigo 19 do decreto camiña nesta dirección). Deste xeito, evítase o illamento, que conduce a crer que os problemas que un ten son específicos do centro. Ademais, sempre se poden compartir ideas e materiais, así como estudar a posible realización de actividades de modo conxunto.
• Establecer un plan de formación interno para os membros do ENDL. Facerse cunha pequena biblioteca sobre sociolingüística e planificación lingüística, xeral e centrada en temas de ensino. Esta biblioteca debe estar aberta aos restantes membros da comunidade educativa.
• Establecer un calendario de reunións que sexa realista e que resulte operativo. Ter flexibilidade e adaptalo ás necesidades que vaian xurdindo.
• Facer un inventario dos recursos cos que conta o ENDL, tanto humanos (internos e externos) como materiais (do centro, doutros organismos educativos, do Concello, etc.).
• Asumir unha posición protagonista na análise do estado actual da situación lingüística do centro. Esta análise é imprescindible para constatar os avances ou retrocesos con respecto ao curso anterior e para poder deseñar unha planificación lingüística efectiva, plasmada na PSC e nos sucesivos PLC.
• Deseñar un repertorio de actividades de dinamización sociolingüística, sempre tendo en conta a realidade e os recursos con que conta o centro.

O escritor Fernando Iglesias estivo no noso colexio este mércores 21 de maio dando unha charla que resultou moi interesante para o noso alumnado do 3º ciclo de E. Primaria. A atención extraordinaria prestada polos alumnos e alumnas son unha mostra clara do que gustou esta actividade. Persoas así animan a que os nenos e nenas de hoxe poidan amar á literatura e poidan converterse en escritores/as no día de mañá.