Summary: 

Os participantes tiveron que afrontar a solución de 10 retos tecnolóxicos presentados por distintas empresas referentes da nosa comunidade

Resultaron gañadores os centros integrados de FP Valentín Paz Andrade, Imaxe e Son, Ferrolterra, Portovello e Politécnico de Lugo, así como os institutos Politécnico de Vigo, A Sardiñeira, Perdouro e A Pinguela

Deron resposta aos retos propostos por Viaqua, Pérez Rumbao, Diesemm, Finsa, Aceites Abril, L’Oreal, elPulpo, Roberto Verino, Fundación San Rosendo e Naturgy

“As propostas premiadas neste acto son pioneiras e un exemplo do gran potencial que atesoura a nosa FP para contribuír a dar un salto de calidade tecnolóxico e innovador ao tecido produtivo galego”, destaca o conselleiro

Idioma Gallego

O conselleiro de Educación, Ciencia, Universidades e FP, Román Rodríguez, acompañado pola directora xeral de FP, Eugenia Pérez, presidiu hoxe a entrega de premios da primeira edición do certame InnovaTech FP a centros de Vigo, A Coruña, Ferrol, Burela, Lugo, Monforte de Lemos e Ourense, un programa que sinalou como “revolucionario para o apoio da formación tecnolóxica e dixital dos futuros profesionais, ao tempo que redunda positivamente no tecido produtivo”.

O titular do departamento educativo galego explicou que o programa naceu este curso para poñer de manifesto a importancia de responder ás necesidades reais do tecido produtivo apoiándose na innovación tecnolóxica e no emprendemento, retando aos estudantes a resolver as propostas das empresas. “As propostas premiadas son pioneiras e un exemplo do gran potencial que atesoura a nosa FP para contribuír a dar un salto de calidade tecnolóxico e innovador ao tecido produtivo galego”, destacou.

Román Rodríguez puxo tamén en valor a importancia do Centro Galego da Innovación da FP Eduardo Barreiros como polo tractor das iniciativas xurdidas ao abeiro do programa. De feito, poranse a disposición do alumnado as instalacións e medios materiais humanos do centro para facilitar o desenvolvemento destes proxectos avanzados no eido tecnolóxico e industrial e a transferencia de coñecemento aos sectores produtivos.

Mellores proxectos

InnovaTech FP dirixiuse a centros públicos de FP con dinámica de investigación, innovación e emprendemento, e que contan con viveiros de empresas ou aulas de emprendemento. Os participantes, organizados en equipos multidisciplinares e cunha distribución equitativa de xénero, tiveron que afrontar a solución de 10 retos tecnolóxicos presentados por distintas empresas referentes da nosa comunidade, e cuxas solucións deberán ter un impacto positivo no desenvolvemento do medio rural así como no fomento da igualdade de oportunidades entre homes e mulleres.

Os centros con iniciativas premiadas, dotadas cada unha con 10.000€ para o desenvolvemento do proxecto, son os que se reflicten na táboa. Entre os 10 centros premiados, seleccionouse a maiores ao CIFP Valentín Paz Andrade de Vigo en resposta ao reto plantexado por Viaqua, como premio especial.

 

Empresa

Reto

Centro gañador

Viaqua

Deseño dun sistema de autolimpeza para reixas de fosas sépticas de zonas rurais

CIFP Valentín Paz Andrade (Vigo)

Pérez Rumbao

Desenvolvemento de robots para o reparto de recambios en talleres de automoción

IES Politécnico de Vigo (Vigo)

Diesemm

Solución dixital para a optimización de experiencias en eventos deportivos

CIFP Imaxe e Son (A Coruña)

Finsa

Creación dun sistema de control de crecemento de especies forestais que permita a monitorización das condicións ambientais

CIFP Ferrolterra (Ferrol)

Aceites Abril

Sistema de medición rápida de graxas en pastas de refinado

IES A Sardiñeira (A Coruña)

L'Oreal

Solucións para a transformación de envases plásticos de produtos cosméticos en produtos duradeiros para salóns de peiteado

IES Perdouro (Burela)

elPulpo

Creación dunha colección téxtil reciclada

IES A Pinguela (Monforte)

Roberto Verino

Deseño dun sistema de análise para unha empresa téxtil que axude a optimizar propostas de colección e a medir a satisfacción do cliente

CIFP Portovello (Ourense)

Fundación San Rosendo

Desenvolvemento dun sistema tecnolóxico para o coidado activo e preventivo de persoas maiores

CIFP Politécnico de Lugo (Lugo)

Naturgy

Deseño de ferramentas para a detección de perdas de enerxía eléctrica para contribuír á súa redución

CIFP Valentín Paz Andrade (Vigo)

 

 

InnovaTech FP enmárcase na Estratexia de FP Galicia 2030 e no Plan Innova FP Galicia e desenvolverase entre o presente curso 2023-24 e o próximo 2024-25, ao longo dos cales mobilizaranse máis de 2.000 alumnos e 400 profesores de 100 centros de FP, o que suporá un investimento de 1,5M€ neste período. Nesta primeira edición participaron 85 centros e arredor de  800 alumnos.

Información xeral Consellería de Educación, Ciencia, Universidades e Formación Profesional

Summary: 

Galicia é unha das catro comunidades españolas que superan os 34 puntos e que acceden ao nivel 4, no que están os países do mundo con mellores puntuacións

Esta competencia, avaliada en 4º de ESO, determina o grao de preparación do ensino para que os estudantes pensen de forma creativa en distintos contextos

Idioma Gallego

O alumnado galego volve destacar en PISA e sitúase no grupo de cabeza de España con mellores resultados en pensamento creativo, segundo se desprende dos datos do informe español dado a coñecer hoxe.  

Galicia obtén unha puntuación media de 34,3 puntos, 1,5 por riba da medida de España (32,8 puntos), 1,6 dos países da OCDE (32,7 puntos) e 2,2, da Unión Europea (32,1). No panorama español, a nosa Comunidade sitúase entre as tres onde se rexistraron mellores resultados, a tan só cinco décimas de Madrid, que encabeza o ránking con 34,8 puntos, e tres décimas de Castela e León, que ocupa a segunda posición con 34,6. Son, xunto a Asturias, as catro únicas autonomías que superan os 34 puntos, o que as sitúa no nivel 4, o mesmo no que se atopan os países con mellores puntuacións de todo o mundo. 

Ademais, Galicia, xunto con Madrid e Castela e León, destaca tamén en dúas variables especialmente significativas cando se analizan os resultados con maior detalle. Por unha banda, son as tres comunidades con maior porcentaxe de alumnado en niveis altos de rendemento en pensamento creativo. E, por outra, son as que presentan menor porcentaxe de alumnado no nivel baixo, é dicir, os que non acadan o nivel básico. 

Así pois, Galicia volve destacar unha vez máis nos resultados PISA, desta vez nunha nova variable que avalía a competencia en pensamento creativo dos estudantes de 15 anos de idade (4º de ESO) co obxectivo de determinar o grao de preparación dos sistemas educativos para que os estudantes pensen de forma creativa en distintos contextos.

Analizar ideas e obter bos resultados

A proba, que forma parte do conxunto das realizadas ao abeiro do Informe PISA 2022, explora ata que punto os alumnos poden xerar ideas diversas e creativas e avaliar e mellorar as ideas de outros para acadar resultados creativos. Para isto, os alumnos tiveron que desenvolver tarefas en catro áreas específicas que foron expresión escrita, expresión visual, resolución de problemas sociais e resolución de problemas científicos.

Tendo en conta a variable xénero, as diferenzas de rendemento de pensamento creativo é en todos os casos favorable ás mulleres, un comportamento que tamén se dá en Galicia, onde as mozas obteñen 2,2 puntos máis que os mozos, exactamente na mesma liña da media de España, e unha diferenza algo inferior aos 2,7 puntos da media da OCDE. 

O mesmo acontece atendendo ao nivel socioeconómico, onde os estudantes de contextos favorables presentan un rendemento superior que os seus compañeiros de contextos desfavorecidos, aínda que está diferenza é máis atenuada en Galicia que no conxunto de España e da OCDE, dado que o galego é un dos sistemas educativos máis equitativos.

Información xeral Consellería de Educación, Ciencia, Universidades e Formación Profesional

Summary: 

O secretario xeral de Universidades, José Alberto Díez, e o reitor, Manuel Reigosa, comproban o funcionamento do sistema, que afonda nas posibilidades do metaverso

Idioma Gallego

O secretario xeral de Universidades, José Alberto Díez de Castro, e o reitor da Universidade de Vigo, Manuel Reigosa, comprobaron hoxe o funcionamento de UNIverso UVigo, o proxecto de metaverso impulsado pola universidade viguesa e que se presentou hoxe na Facultade de Comunicación do Campus de Pontevedra. A Xunta inviste 115.000€ nesta iniciativa.

En concreto, hoxe presentouse Simulacro, unha aplicación de realidade virtual inserida neste proxecto para a simulación de procesos de creación audiovisual. A través duns lentes de realidade virtual, permite o alumnado realizar labores de realización, dirección de fotografía e manexo de cámaras nun plató virtual.

O obxectivo de UniversoUVigo é afondar nas posibilidades do metaverso a través dun prototipo que albergará espazos de encontro, ensinanza e aprendizaxe. O plan piloto inclúe a virtualización de laboratorios para que poidan ser empregados por distintas titulacións para diferentes tarefas, o que evitaría ter que duplicar laboratorios idénticos, cun alto custo, dado que a virtualización permitiría o seu uso desde diferentes centros. Grazas ás ferramentas de software xeradas a través da iniciativa facilítase o traballo remoto a este entorno virtual desde terminais con prestacións limitadas.

54M€ desde 2019

Tal e como explicou o representante da Consellería de Educación, Ciencia, Universidades e FP, o proxecto está cofinanciado polo Goberno galego a través dos convenios para o desenvolvemento de accións estratéxicas de I+D+i, “que constitúen unha das principais aposta da Xunta de Galicia para o fortalecemento do ecosistema de investigación nas universidades públicas”, afirmou. “Desde 2019, cando se creou esta liña de financiamento para accións estratéxicas de I+D+i, levamos investidos 54M€ nestes convenios”, salientou.

Información xeral Consellería de Educación, Ciencia, Universidades e Formación Profesional

Summary: 

Destaca que a idea é “conseguir que o 100 % dos rapaces galegos sigan formándose ata, polo menos, cumprir os 18 anos”, así como “atraer de novo ao sistema educativo a persoas con baixa cualificación ou que queren mellorar a que teñen”

O plan inclúe máis de 60 medidas de actuacións dirixidas a alumnado e profesorado, así como para a poboación sen cualificación de entre 24 e 34 anos

Trabállase para reducir a cero a taxa de abandono temperá e que o 100 % dos rapaces sigan formándose ata, polo menos, cumprir a maioría de idade

Tamén se busca atraer de novo ao sistema educativo aquelas persoas con baixa cualificación co fin de enriquecer a súa formación e xerar oportunidades profesionais

Idioma Gallego

O titular da Xunta, Alfonso Rueda, anunciou hoxe que a Xunta de Galicia porá en marcha o vindeiro curso o Plan FPGal360 de orientación profesional integral, dotado con 24 M€ ata 2028. Unha medida que, tal e como apuntou, conta cun dobre obxectivo: “conseguir que o 100 % dos rapaces galegos sigan formándose ata, polo menos, cumprir os 18 anos e atraer de novo ao sistema educativo a persoas con baixa cualificación ou que queren mellorar a que teñen”, sinalou.

Trátase por tanto, de reducir o abandono escolar na comunidade, a pesar de que Galicia está en “mínimos históricos” na taxa de abandono temperá (8,8%) - adiantándose sete anos ao obxectivo do 9 % fixado pola UE para 2030- fronte ao 13,6% do conxunto de España. “Queremos seguir avanzando e o ideal sería chegar á taxa de abandono escolar cero”, apuntou.

Neste sentido, o Consello da Xunta celebrado esta mañá aprobou o plan da Consellería de Educación, Ciencia, Universidades e Formación Profesional, consistente en 60 accións específicas, co fin de establecer un sistema integral de orientación profesional que guíe e acompañe á cidadanía na súa toma de decisións educativas e profesionais desde idades temperás e ao longo de toda a vida.

Así pois, mediante o FPGal360, a Xunta de Galicia ofrecerá unha orientación profesional integral que lles ensine ás persoas a planificar e tomar decisións sobre a súa vida laboral e a formación que implica.

Isto suporá implantar un conxunto de servizos dirixidos a axudar ás persoas de calquera idade -especialmente para os máis novos e persoas con baixa cualificación- e en calquera momento das súas vidas a tomar decisións axeitadas a nivel educativo, formativo e laboral, a xestionar a súa traxectoria profesional creando o seu itinerario formativo; a reflexionar sobre as súas ambicións e intereses e a súa cualificación e capacidade, e a comprender o funcionamento do mercado laboral.

Alfonso Rueda apuntou que as actuacións previstas no plan artéllanse en “tres eixos” que inclúen “o alumnado que está actualmente dentro do sistema educativo, uns 230.000; a mocidade que abandonou este sistema e que cómpre recuperar, uns 80.000 mozos de 24 a 34 anos con baixa cualificación; e a poboación en xeral que queira ampliar a súa formación para mellorar a súa inserción laboral”, sinalou.

Fomentar a continuidade na formación

O primeiro dos eixos abrangue iniciativas concretas dirixidas a “fomentar a continuidade dos rapaces no ensino” e, deste xeito, reducir a mínimos o abandono escolar temperá. Isto é, que o alumnado perciba que continuar a súa formación dentro do sistema sexa unha oportunidade para unha mellor cualificación.

Para iso establécense catro liñas e 15 medidas entre as que destacan a elaboración de novos programas de orientación profesional e vocacional e de materiais de apoio á labor orientadora; o reforzo da FP básica coa actualización da oferta e a mellora de recursos;  actuacións para reducir o abandono escolar nos colectivos máis desfavorecidos; impulso da formación especializada en orientación profesional, incidindo nas potencialidades da FP básica, e enquisas para alumnado e familias como ferramenta para a mellora da toma de decisións.

O segundo céntrase en “potenciar un sistema de orientación vocacional e profesional que conduza á inserción laboral efectiva”, a través de cinco liñas de actuación e 30 medidas específicas recollidas no plan. Entre elas destaca a creación do Espazo e da Rede FPOrienta, a difusión e promoción das novas tecnoloxías, innovación aplicada á orientación profesional e formación especializada en orientación profesional e vocacional, entre outros.

Itinerarios formativos atractivos

O terceiro eixe do plan diríxese a “facilitar a cualificación e titulación da mocidade galega” desde o sistema educativo, con itinerarios atractivos e que supoñan unha porta profesional e persoal de futuro.

A través de catro liñas e 15 medidas impulsaranse a coordinación e colaboración entre os distintos axentes para a cualificación da poboación. Ademais, reforzarase a capacitación profesional a través do procedemento de acreditación de competencias profesionais, a orientación profesional nos centros de educación permanente de alumnos e o desenvolvemento de accións formativas especializadas que respondan ás demandas específicas do tecido produtivo.

Estes tres eixes desenvolveranse a través da colaboración público-privada, coa participación doutros departamentos da Xunta de Galicia, así como de asociacións e outras entidades implicadas na orientación profesional. 

Entre as liñas de actuación globais, ao abeiro deste plan, a Consellería de Educación reforzará a información e formación dirixidas ao persoal orientador dos centros educativos e aos equipos directivos e docentes.

No caso do alumnado, incidirase en facilitar información e orientación ao alumnado desde idades temperás e deseñaranse actuacións específicas dirixidas ao alumnado vulnerable, con especiais necesidades de aprendizaxe ou en risco de abandono.

Recuperar a persoas que abandonaron o sistema

Tamén se atenderá especificamente ao alumnado que abandonara o sistema educativo sen acadar unha titulación, co fin de recuperalos e darlle unha nova oportunidade de formación e, deste xeito, que melloren as súas oportunidades e expectativas laborais.

Outras liñas de traballo irán dirixidas a actuacións sobre a poboación que non conta con formación acreditada, con propostas específicas, sobre todo con especial atención á mocidade que se atope nesta situación.

O Plan FPGal360 recollerá tamén unha epígrafe de asesoramento personalizado e orientación profesional para colectivos de persoas desempregadas que participen en procesos de acreditación de competencias adquiridas por experiencia laboral.

No período de vixencia do plan, entre este ano e o 2028, o conxunto de medidas que se van poñer en marcha suporán un investimento global de 24 M€, nove dos cales se farán efectivos durante o presente exercicio 2024. 

A posta en marcha deste plan enmárcase na Estratexia de formación profesional Galicia 2030, que ten entre os seus eixes a orientación profesional á cidadanía na creación dun itinerario personalizado de formación para o emprego e a difusión das oportunidades da formación, adquisición de competencias e recoñecemento delas.

Información xeral Consellería de Educación, Ciencia, Universidades e Formación Profesional

Summary: 

A directora xeral de Ordenación e Innovación Educativa, Judith Fernández entrega o recoñecemento ao Colexio CEIP Plurilingüe Seis do Nadal, de Vigo

Tamén se premian as experiencias de voluntariado de lectura de 10 centros de Carballo, Muros, Outes, Sober, O Irixo, Bueu, A Estrada, Ponteareas e Vilagarcía 

A Consellería de Educación convoca o Plan de Mellora de Bibliotecas Escolares e os Clubs de Lectura para o vindeiro curso

Idioma Gallego

A directora xeral de Ordenación e Innovación Educativa, Judith Fernández, visitou hoxe o Colexio Plurilingüe Seis do Nadal (Vigo) para facerlle entrega do Selo Biblioteca Escolar Solidaria, un galardón concedido pola Xunta para recoñecer a centros  cuxas bibliotecas traballan de forma salientable a igualdade de oportunidades e fomentan o voluntariado cultural e social entre os seus integrantes.

Ademais do da cidade da oliveira, obteñen este recoñecemento os colexios CEIP Plurilingüe San Marcos (Abegondo), CEIP Plurilingüe de Chancelas (Poio) e CEIP Plurilingüe Frián-Teis (Vigo), así como o Centro Integrado de FP Compostela (Santiago). Os cinco realizaron unha planificación da biblioteca solidaria sobre problemas reais que afectan á comunidade educativa, e que se poidan orientar arredor dos obxectivos da Axenda 2030 da ONU para o Desenvolvemento Sustentable. 

Cada un deles recibirá unha asignación de 1.500€, que deberá destinarse a actividades da biblioteca escolar no ámbito da atención da diversidade para facilitar avances na configuración dunha biblioteca inclusiva ou en relacións aos obxectivo da Axenda 2030 e con implicación das familias.

Voluntariado de lectura

Por outra banda, ao abeiro desta convocatoria recoñecéronse outras 10 experiencias na modalidade de Voluntariado na biblioteca escolar entre as bibliotecas dos centros de Educación Primaria, desenvolvido en colaboración coa Consellería de Cultura, Lingua e Xuventude.

Trátase dos colexios CEIP Bergantiños (Carballo), CEIP Plurilingüe de Louro (Muros), CEIP Plurilingüe de Outes (Outes), CEIP Plurilingüe Virxe do Carme (Sober), CEIP Virxe da Pena da Sela (O Irixo), CEIP Plurilingüe Montemogos (Bueu), CEIP do Foxo (A Estrada), CEIP Fermín Bouza Brey (Ponteareas), CEIP A Lomba (Vilagarcía de Arousa) e CEIP O Piñeiriño (Vilagarcía de Arousa).

Neste caso os centros recoñecidos recibirán unha asignación de 600€ para o desenvolvemento dun obradoiro especializado sobre lectura expresiva, narración oral, escrita creativa, a radio como medio de comunicación, a elaboración de booktrailers (pezas audiovisuais de presentación dun libro), os xogos cooperativos ou a música e danza tradicionais.

O obxectivo destes recoñecementos é estimular o voluntariado cultural en relación coa lectura entre o alumnado de 5º e 6º de Primaria, a través de actividades como as lecturas compartidas dentro e fóra do centro (na vila, con outros centros, coa biblioteca pública ou outras institucións do concello, por exemplo), así como as accións de acompañamento na lectura a outros compañeiros do propio colexio, denominados como apadriñamentos e amadriñamentos lectores.

Incremento da participación

O número de centros que participan no programa de Bibliotecas Escolares Solidarias incrementouse de xeito significativo este curso e son 89 os centros que o desenvolven na modalidade de voluntariado escolar para 5º e 6º de Primaria, un 20% máis ca no 2022/23. Nesta categoría o alumnado forma parte do equipo de colaboradores que, xunto co profesorado, contribúen ao bo funcionamento biblioteca e ao desenvolvemento das súas iniciativas, organizando ademais lecturas compartidas dentro ou fóra do centro, con persoas maiores, entre outros.

Na modalidade de Secundaria e outras ensinanzas hai 132 centros integrados no programa, un 15% máis ca no curso anterior. A súa participación materialízase en actividades de colaboración relacionadas coa biblioteca escolar ou a través de actividades de lectura compartida ou de traballo coa información, organizadas pola biblioteca, dentro ou fóra do centro.

Novas convocatorias 

A Consellería de Educación, Ciencia, Universidades e FP vén de publicar tamén as convocatorias do Plan de Mellora de Bibliotecas Escolares (PLAMBE) e dos Clubs de Lectura para o vindeiro curso. 

No caso do PLAMBE, poderanse incorporar 25 centros novos a este programa, que este curso chega aos 842 centros educativos de toda Galicia. O orzamento total da convocatoria, que contempla tanto os colexios e institutos de nova incorporación como os que continúan participando na iniciativa, é de 1,5M€. Ademais da achega económica, os centros incluídos neste programa poderán recibir formación específica, así como asesoramento a través da asesoría de bibliotecas escolares da Consellería. 

O prazo de presentación de solicitudes estará aberto ata o 18 de xullo e, como é habitual, a convocatoria incide na adquisición de fondos nas librarías de proximidade e dá prioridade aos centros do rural, de tal forma que, en igualdade de puntuación, terán preferencia os situados en concellos de menor poboación.

Por outra banda, o departamento educativo da Xunta pretende superar os 450 centros no programa de Clubs de Lectura o vindeiro curso. Como novidade, este curso haberá unha modalidade de nova incorporación e outra de continuidade, aínda que os centros que xa participaron noutros cursos non terán que achegar un novo proxecto para este ano. O prazo de presentación de solicitudes estará aberto ata o 4 de outubro.

Poderán participar os centros que inclúan un club de lectura na programación de actividades da biblioteca escolar en tempos de lecer ou horario extraescolar. A dotación total do programa ascende a 400.000€ e con estas axudas os centros poderán adquirir libros para as actividades do club.

Información xeral Consellería de Educación, Ciencia, Universidades e Formación Profesional

Idioma Gallego

O conselleiro de Educación, Ciencia, Universidades e FP, Román Rodríguez, e a alcaldesa de Teo, Lucía Calvo, asisten ao Colexio CEIP A Igrexa-Calo, xunto Os Bolechas, co gallo da presentación do libro Os Bolechas visitan Teo.

No libro, os personaxes infantís galegos máis coñecidos percorren o concello de Teo e os seus lugares máis emblemáticos a través do camiño portugués.

Información xeral Consellería de Educación, Ciencia, Universidades e Formación Profesional

Idioma Gallego

O conselleiro de Educación, Ciencia, Universidades e FP, Román Rodríguez, asistiu, no Pazo de Cultura de Pontevedra, á estrea do musical Os miserábeis realizado polo Instituto IES Illa de Ons.

O titular de Educación da Xunta felicitou ás máis de 70 persoas que integran o elenco, entre alumnos, profesorado, persoal non docente e algunhas familias. A excelente representación é froito do traballo en conxunto do equipo de montaxe, iluminación, realización, vestiario, maquillaxe e perruqueira, entre outros. O proxecto foi creado durante o horario lectivo, como parte dun proxecto educativo integral do centro.

No ano 2019, o instituto, pola realización dunha obra como esta, recibiu o primeiro Premio de Innovación Educativa en Dinamización Lingüística da Xunta de Galicia. Este galardón, impulsado polo Goberno galego, contribúe ao incremento do uso da lingua, á eliminación de prexuízos lingüísticos entre a comunidade educativa e á posta en valor do galego como lingua de interese e con proxección de futuro para a mocidade.

Información xeral Consellería de Educación, Ciencia, Universidades e Formación Profesional

Summary: 

O Portal Educativo vén de publicar a listaxe de seleccionados, que mellorarán as súas competencias en Canadá, Reino Unido, Francia, Portugal e Alemaña

O Goberno galego destina preto de 2M€ a esta actividade, de tal xeito que se subvenciona ata o 92% da mesma

Ademais, 1350 alumnos de 45 centros galegos poderán integrarse no sistema educativo doutros países o vindeiro curso a través do programa EduExchanges

Idioma Gallego

Un total de 645 estudantes de Bacharelato participarán este verán nas estadías lingüísticas no estranxeiro impulsadas pola Xunta de Galicia co fin de mellorar as súas competencias nos idiomas inglés, francés, portugués e alemán tal e como pode consultarse no Portal Educativo.

Nesta convocatoria foron seleccionados un total de 407 alumnos de 1º de Bacharelato e outros 238 de 2º de Bacharelato, que gozarán de tres semanas en réxime residencial ou familiar en Reino Unido, Francia, Portugal, Canadá e Alemaña no período estival, entre xullo e agosto.

Así pois, 339 estudantes desprazaranse a Reino Unido e 230 a Canadá para mellorar as súas competencias en inglés; 60 farano a Francia para mellorar o seu francés; dez irán a Alemaña para perfeccionar o idioma alemán; e seis a Portugal para reforzar o seu portugués.

Curso

Modalidade

Prazas

2º Bacharelato

Inglés en Canadá

90

Inglés no Reino Unido

120

Francés en Francia

20

Portugués en Portugal

3

Alemán en Alemaña

5

1º Bacharelato

Inglés en Canadá

140

Inglés no Reino Unido

219

Francés en Francia

40

Portugués en Portugal

3

Alemán en Alemaña

5

 

O Goberno galego destina preto de 2M€ a esta actividade, de tal xeito que se subvenciona entre o 92% e o 62% do custo das estancias dos estudantes en Canadá, Reino Unido, Francia, Portugal e Alemaña. Con cargo a esta partida, a Xunta sufraga parte dos gastos de contratación dos monitores que acompañan a cada grupo, mantemento e aloxamento, traslados para actividades, docencia e material escolar, actividades culturais, deportivas e complementarias dos cursos, seguros de accidentes e certificado de realización do curso.

O propósito desta iniciativa, enmarcada na Estratexia Galega de Linguas Estranxeiras Edulingüe 2030, non é só que o alumnado asistente aprenda un idioma estranxeiro, senón tamén entrar en contacto con outras linguas, persoas, culturas e realidades nun contexto de inmersión ou integración nun país estranxeiro. Deste modo, favorécese o desenvolvemento académico e persoal do alumnado. Para acceder a estas axudas os alumnos debían ter acadado unha nota mínima na área ou materia de lingua estranxeira que se vai perfeccionar na estadía de 6 no curso 2022/23, así como ter superadas todas as materias nese mesmo ano académico.

EduExchanges ata o 23 de setembro

Por outra banda, ata 1350 alumnos de 45 centros galegos poderán integrarse o vindeiro curso no sistema educativo doutros países a través do programa EduExchanges, de promoción dos intercambios entre estudantes. Poden beneficiarse desta convocatoria os alumnos de 6º de Primaria, ESO e 1º de Bacharelato de centros educativos públicos que desenvolvan programas de intercambio durante o curso 2024/2025. A lingua vehicular do intercambio pode ser a primeira ou a segunda lingua estranxeira cursada e o réxime será de residencia coa familia do alumno de intercambio estranxeiro.

O alumnado galego participante deberá estar acompañado polo profesorado designado polo centro educativo, que realizará durante a súa estadía observación directa das metodoloxías do centro educativo estranxeiro e do seu impacto nos procesos de aprendizaxe do alumnado. Deste xeito,  potenciarase o traballo conxunto e fomentarase a reflexión sobre actuacións innovadoras, que redundarán no establecemento de proxectos comúns. O centro educativo será o encargado de chegar a acordo cun centro estranxeiro e de seleccionar ao alumnado participante.

O prazo para solicitar a participación neste programa estará aberto ata o 23 de setembro e as peticións deberán formalizarse a través da aplicación de Programas Educativos. A convocatoria conta cun orzamento de 350.000€.

Información xeral Consellería de Educación, Ciencia, Universidades e Formación Profesional

Summary: 

O titular de Educación da Xunta subliña a importancia de potenciar o oficio da cantería fomentando a innovación e a tecnoloxía e atendendo ás demandas do sector

Idioma Gallego

O conselleiro de Educación, Ciencia, Universidades e FP, Román Rodríguez, visitou a exposición Arías Xidas, que inclúe as obras do alumnado da Escola de Cantería de Poio, e maquetas do patrimonio cultural, coa obra do veciño José Manuel Magdalena Otero. Ambas exhibicións permanecerán abertas ata o 8 de xullo.

O titular de Educación da Xunta, ademais de felicitar aos  estudantes polo excelente traballo desenvolvido, tamén aproveitou para recordar as novidades da Escola de Cantería para o vindeiro curso 2024-2025. O centro converterase nun Centro Integrado de FP, logo de que o Goberno autonómico asumira a súa titularidade, e aumenta a oferta formativa con catro novas titulacións. Os estudantes interesados poderán solicitar praza a partir do 24 de xuño.

O alumnado beneficiarase das melloras, xa que a partir deste curso, as ensinanzas que ata agora eran consideradas como formación non formal pasarán a ser títulos oficiais, ademais de permitir que os antigos alumnos, que non tiñan un título homologado, poidan acreditar a experiencia profesional. Tamén, para o próximo curso, se ofertarán os ciclos duais de Proxectos de Edificación e de Construción. Estas titulacións de alta especialización son unha proposta exclusiva de Galicia onde, atendendo a demandas específicas por parte dos sectores produtivos, deséñanse itinerarios formativos moi especializados feitos ad hoc.

Información xeral Consellería de Educación, Ciencia, Universidades e Formación Profesional

Summary: 

Autorízanse o Grao Dual en Enxeñaría de Automoción da Universidade de Vigo e sete másteres, catro deles interuniversitarios entre a USC, a UVigo e a UDC 

Román Rodríguez denuncia o retraso da verificación definitiva da oferta por parte do Goberno central, que debería terse aprobado xa

Tamén se ratificou a proposta de matrículas universitarias gratuítas a partir de setembro, como paso previo para a aprobación no Consello da Xunta

Reitérase o compromiso da Xunta para garantir a contratación de axudantes doutores por parte das universidades malia a falta de concrecións e crédito do Goberno central

Idioma Gallego

As tres universidades públicas galegas ofertarán arredor de 17.000 prazas o vindeiro curso 2024-25, tras a incorporación de novos títulos de grao e máster aos que lles vén de dar o visto e prace o Consello Galego de Universidades, cuxa reunión de hoxe presidiu o conselleiro de Educación, Ciencia, Universidades e FP, Román Rodríguez. 

O titular do departamento educativo do Goberno Galego explicou que desde Galicia se seguen dando pasos para pechar a oferta do próximo curso pese ao retraso do Ministerio de Ciencia, Innovación e Universidades que, a través da Conferencia General de Política Universitaria, “ten a última palabra” para autorizar a oferta definitiva. Como denunciou, a proposta que Galicia eleva á Conferencia de Política Universitaria aprobábase sempre entre finais de maio ou principios de xuño. Sen embargo, este ano, a día de hoxe nin sequera está convocada a reunión, co conseguinte bloqueo.

No que atinxe ás titulacións, condicionado á resolución de verificación favorable por parte do Consejo de Universidades a nivel estatal, o Consello Galego de Universidades na súa reunión de hoxe autorizou a implantación do Grao Dual en Enxeñaría de Automoción, da Universidade de Vigo. Será o primeiro deste tipo que se implante en Galicia e contará cun total de 20 prazas. 

En canto aos másteres universitarios públicos, o Consello de Universidades autorizou sete másteres universitarios (catro deles interuniversitarios), aínda que dous deles non se implantarán aínda o vindeiro ano por decisión autónoma das propias universidades. 

Así pois, están autorizados e prevese a implantación para o próximo curso dos másteres interuniversitarios entre as tres universidades públicas en Biofabricación, Internet das Cousas-IoT e Ensino do Español como Lingua Estranxeira ou Segunda Lingua (aínda que neste último a Universidade de Vigo non vai ofertar prazas o vindeiro curso). 

Pola súa banda, autorizouse o máster en Biociencias Moleculares na Universidade de Santiago de Compostela e o máster en Tecnoloxía Téxtil e Moda Sustentable na Universidade da Coruña. 

Tamén quedaron autorizados hoxe o máster interuniversitario en Economía Circular entre a USC, a UVigo e a UDC, pero que as propias universidades acordaron non ofertar  aínda para o vindeiro ano, así como o máster en Cronicidade e Novos Modelos de Atención Sociosanitaria da UDC, que tamén acordou non ofertar aínda prazas pese a obter xa a autorización. 

Taxas universitarias gratuítas

O Consello Galego de Universidades tamén deu o visto e prace á acción da Xunta para implantar a gratuidade da primeira matrícula universitaria para os alumnos de grao a partir de setembro, que se materializará tras a aprobación por parte do Consello da Xunta.

A Consellería presentou ao órgano de consulta e asesoramento universitario esta medida pioneira de apoio ás familias galegas para os estudos universitarios dos seus fillos, con matrícula de balde para todos os que se matriculan por primeira vez, así como para o resto dos cursos en función da porcentaxe de aprobados.

Apoio á contratación de profesorado

Por outra banda, o Consello Galego de Universidades analizou a situación do profesorado universitario tras a entrada en vigor da nova Lei de Universidades, que implica unha redución das horas de docencia para o profesorado asociado e o axudante doutor e, en consecuencia, a necesidade de cobertura das mesmas mediante a convocatoria de novas prazas para asegurar o normal funcionamento das titulacións.

A este respecto, Román Rodríguez denunciou a “falta de transparencia, a improvisación, o nulo talante negociador e o cambio das regras de xogo” do Goberno do Estado durante todo o proceso e, sobre todo, “o escurantismo”  en canto á dotación dos fondos estatais para financiar as novas prazas.

Cómpre lembrar que o pasado mes de abril, o Goberno central impuxo ás comunidades un acordo no que o Ministerio financiaba o 66% das prazas durante seis anos e as administracións autonómicas o restante 33%. Porén, agora o Ministerio comprométese só á financiación do 60% das prazas e só durante catro meses, deixando no aire como se vai proceder ao pagamento desa porcentaxe ata 2030. Porén obriga ás comunidades a asinar un acordo no que as compromete a asumir o 40% das prazas ata 2030.

En todo caso, o conselleiro subliñou que a Xunta “vai actuar con absoluta responsabilidade” para cumprir o compromiso acadado cos tres reitores neste eido e, para ilo, xa está mantendo reunións de traballo entre a Consellería de Educación e de Facenda e as tres universidades para dar solución a un problema “xerado polo Goberno central e que agora nos toca ás comunidades autónomas arranxar”.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP exerce de padriño de honra no acto de graduación da XV promoción de estudantes que saen desta facultade

Idioma Gallego

O conselleiro de Educación, Ciencia, Universidade e Formación Profesional, Román Rodríguez, gabou hoxe o esforzo, a dedicación e o talento dos 30 estudantes graduados en Dirección e Xestión Pública no Campus de Pontevedra da Universidade de Vigo. 

O titular de Educación do Goberno galego participou esta tarde como padriño de honra da XV promoción da facultade, onde estivo acompañado polo reitor da UVigo, Manuel Reigosa.

Román Rodríguez puxo en valor a calidade académica dos coñecementos adquiridos no sistema universitario público galego durante a etapa formativa “dunha xeración que de seguro contribuirá a xerar emprego, riqueza e benestar en Galicia”. Tamén aproveitou para desexarlles a todos os graduados un “exitoso” futuro persoal e profesional e agradecer ás familias “o apoio e esforzo” amosado durante estes anos. 

Información xeral Consellería de Educación, Ciencia, Universidades e Formación Profesional

Summary: 

É o único centro galego acreditado como Unidade de Excelencia María de Maeztu, un recoñecemento estatal que lles facilita colaborar con institucións como o CERN

A Xunta está a investir máis de 22M€ en melloras nas infraestruturas da Universidade compostelá 

Idioma Gallego

O conselleiro de Educación, Ciencia, Universidades e FP, Román Rodríguez, e o reitor da Universidade de Santiago de Compostela, Antonio López, visitaron hoxe as obras que se están a realizar para habilitar a nova sede do Instituto Galego de Física de Altas Enerxías (IGFAE), un centro de titularidade compartida entre ambas institucións. A actuación conta cun investimento de 4,8M€ por parte da Xunta de Galicia ao abeiro do convenio entre a Consellería e as tres universidades galegas para mellorar as súas infraestruturas de investigación. Na visita participaron tamén o secretario xeral de Universidades, José Alberto Díez, e o director do instituto, Carlos Alberto Salgado.

O titular do departamento de Ciencia do Goberno galego destacou que o obxectivo desta actuación é aumentar a superficie deste centro, especialmente en laboratorios experimentais, espazos comúns de traballo e áreas destinadas ás actividades de divulgación. “Isto vai supoñer un salto cualitativo nas instalacións deste instituto, que forma parte da Rede de centros de Investigación universitaria de Galicia”, sinalou o conselleiro.

As obras para habilitar a nova sede do IGFAE inclúen tanto o acondicionamento dos espazos xa existentes como a execución dun novo volume en planta baixa. O obxectivo é dotar ao centro de flexibilidade para adaptar os diferentes espazos os requirimentos das actividades de investigación, ao tempo que se actualizan e melloran os espazos existentes e se crean outros novos dedicados a laboratorios, entre outros. Segundo o programa de necesidades a superficie total de actuación é de 4.880,15 m², dos que 348,5 m² se corresponden co volume de ampliación.

Amplo apoio á USC

A Xunta está a investir máis de 22M€en melloras nas infraestruturas da universidade compostelá. A actuación no IGFAE enmárcase no convenio entre a Consellería e as tres universidades galegas para mellorar as súas infraestruturas de investigación. A isto súmase o plan de mellora de infraestruturas, no que o Goberno galego inviste 40M€, dos que arredor de 16M€ serán para a USC. A través deste plan prevese mobilizar arredor de 100M€ en obras nas tres universidades públicas galegas.

As actuacións ao abeiro deste plan na Universidade de Santiago de Compostela pasan pola creación da nova Cidade da Saúde na capital galega, coa construción dun conxunto de edificios que acollan a Facultade de Enfermaría, a Facultade de Farmacia, un centro de investigación na área de Ciencias da Saúde e un aparcadoiro, así como a reforma da Facultade de Medicina e Odontoloxía. No Campus de Santiago tamén está prevista a primeira fase da reforma integral da Facultade de Química.

Centro de relevancia internacional

Román Rodríguez destacou o potencial deste centro mixto da Xunta e a Universidade de Santiago, “o único centro de investigación galego que conta coa acreditación como Unidade de Excelencia María de Maeztu, que ademais vén de revalidar”, explicou. Tamén incidiu na “marca de calidade que esta distinción estatal imprime á actividade que se realiza nel, e que lle abre as portas a seguir participando en proxectos internacionais de tanta relevancia como os desenvolvidos en colaboración coa Organización Europea para a Investigación Nuclear (CERN) en Xenebra”.

A acreditación facilita, así mesmo, a formación de persoal investigador e a captación de talento a nivel internacional. Non en balde, case o 30% dos 103 investigadores do IGFAE é persoal captado do estranxeiro. O centro mantén, ademais, unha elevada porcentaxe de éxito en convocatorias de alto prestixio, como as do European Research Council (ERC), Marie Sklodowska-Curie e Ramón y Cajal, que agardan reforzar coa renovación da acreditación.

Información xeral Consellería de Educación, Ciencia, Universidades e Formación Profesional

Idioma Gallego

O conselleiro de Educación, Ciencia, Universidades e FP, Román Rodríguez, achegouse hoxe ata Galicia Biodays, o foro da industria da Biotecnoloxía e Ciencias da Vida no Espazo Atlántico Europeo, organizado polo Clúster Tecnolóxico Empresarial das Ciencias da Vida (Bioga) e co que colabora a Xunta. Alí puido visitar os stands que conforman o evento e asistir á mesa redonda Os clústers como ferramenta para impulsar a competitividade empresarial.

Este tipo de encontros, que busca poñer en común aos axentes dinamizadores do sector e establecer sinerxías e oportunidades de negocio, reflexan o papel fundamental que ten Galicia no eido da biotecnoloxía, ao abeiro da Estratexia de Consolidación do sector Bio 2021-2025. “Con esta iniciativa queremos continuar posicionando a Galicia como rexión referente en biotecnoloxía, fomentar a xeración de negocio e garantir a consolidación empresarial”, salientou o titular de Ciencia, que estivo acompañado pola directora da Axencia Galega de Innovación, Carmen Cotelo.

Información xeral Consellería de Educación, Ciencia, Universidades e Formación Profesional

Summary: 

A directora xeral de Ordenación e Innovación Educativa participa na clausura desta iniciativa que promove as competencias bilingües e interculturais entre centros, docentes e alumnos de Galicia e Portugal

Idioma Gallego

A directora xeral de Ordenación e Innovación Educativa, Judith Fernández, participou hoxe en Xinzo de Limia no encontro internacional que conclúe o programa Escolas de fronteira deste curso. A Xunta promove, con esta iniciativa, as competencias bilingües e interculturais entre centros, docentes e alumnos de Galicia e Portugal. 

Neste curso, participaron na iniciativa un total de 49 centros de España e Portugal, deles seis galegos. Trátase dos colexios CEIP Plurilingüe Infante Felipe de Borbón (Salvaterra do Miño), CEIP Plurilingüe Nº1 de Tui, CEIP Rosalía de Castro (Xinzo de Limia), CEIP Carlos Casares (Xinzo de Limia), CEIP Princesa de España (Verín) e CEIP Plurinlingüe Amaro Refojo (Verín). 

A representante da Consellería de Educación, Ciencia, Universidades e FP felicitounos pola  súa disposición por formar parte desta iniciativa e polo seu interese por tecer redes educativas e culturais cos centros do país veciño. Durante a xornada, os colexios participantes presentaron o seu proxecto en conxunto co seu centro espello portugués, co cal promoveron a creación e intercambio de recursos pedagóxicos. Para levar a cabo estas actividades, o profesorado realizou unha formación específica sobre metodoloxía de proxectos multiculturais.

Así mesmo, participaron no encontro representantes da Embaixada de España en Portugal, así como membros das delegacións e gobernos de Portugal, Estramadura e Castela e León.

O encontro evidencia a importancia de fomentar a promoción da identidade común dos pobos galego e portugués, dentro dunha perspectiva xeral de integración europea e do mundo lusófono.  As actividades interdisciplinarias realizadas engloban as realidades de ambos países e, en particular, o territorio fronteirizo no que se atopan.

Proxecto EBIF

O proxecto EBIF (escolas bilingües e interculturais de fronteiras) promove a educación intercultural e bilingüe nos centros situados na zona fronteiriza entre España e Portugal. A iniciativa fomenta a cooperación entre ambos países e as comunidades autónomas, coa Organización de Estados Iberoamericanos (OEI) como socio estratéxico. Ademais, conta coa participación das Universidades de Aveiro e Complutense de Madrid, as cales tamén asistiron a inauguración do encontro internacional.

A iniciativa fomenta as relacións entre ambos países e as comunidades autónomas. Por iso, durante a xornada, establecéronse as liñas da próxima edición en relación a autonomía, formación e recursos, co fin de continuar promovendo as competencias bilingües e interculturais entre centros, docentes e alumnos de Galicia e Portugal.

Información xeral Consellería de Educación, Ciencia, Universidades e Formación Profesional

Summary: 

A directora xeral de Ordenación e Innovación Educativa visita unha actividade no IES Antón Losada Diéguez co gallo da publicación desta convocatoria

A iniciativa sobre benestar emocional desenvólvese en colaboración coa Fundación Botín

Idioma Gallego

A directora xeral de Ordenación e Innovación Educativa, Judith Fernández, visitou hoxe o Instituto IES Antón Losada Diéguez, na Estrada, coincidindo coa publicación no Portal Educativo da convocatoria do programa Educación Responsable para o vindeiro curso. Precisamente, neste centro puido comprobar o desenvolvemento desta iniciativa, que fomenta a formación do alumnado incidindo na importancia da educación emocional no seu desenvolvemento persoal e académico.

Poderán incorporarse ao programa un total de 15 centros que impartan ensinanzas de Infantil, Primaria, ESO, Educación Especial ou FP Básica. O prazo de presentación de solicitudes estará aberto ata o 13 de xullo por medios electrónicos.

O programa Educación Responsable, en colaboración coa Fundación Botín, funciona a través dunha rede galega na que, durante o ano académico 2023/24, participaron 102 centros, 6.985 alumnos e 438 docentes. Todos eles recibiron formación, recursos educativos e seguimento por parte da Consellería de Educación, Ciencia, Universidades e Formación Profesional.

Fases en tres cursos

Recollido na Estratexia Galega de Convivencia Escolar 2025, está centrado na aplicación didáctica, dentro das áreas curriculares, dunha serie de recursos de educación emocional, social e creativa, que se realiza de forma coordinada na rede de Centros Educación Responsable de Galicia.

A iniciativa desenvólvese ao longo de tres cursos nos que, a maiores de levar ás aulas as actividades e materiais dos que dispón o programa, os centros contan con formación vencellada ao Plan de Formación Permanente do Profesorado, así como financiación para desenvolver o programa a través dos Contratos-Programa.

O obxectivo da fase inicial e de crecemento (1º curso) é que o equipo de cada centro participante coñeza as ferramentas didácticas propias da educación emocional e aplique as actividades da iniciativa; mentres que na fase de expansión (2º curso), o centro participante asumirá este programa como unha liña prioritaria dentro do seu proxecto educativo, recibindo formación para o resto dos docentes e estendendo o programa a un maior número de alumnado.

A fase de consolidación (3º curso) ten como obxectivo que o centro utilice de forma autónoma as metodoloxías, técnicas e actividades e sexa quen de elaborar outras novas, incluíndo obxectivos propios do crecemento emocional, social e creativo do alumnado. Para iso, será necesario que a maioría dos profesores incorporen nas súas programacións de aula actividades de Educación Responsable e que se aplique a totalidade dos recursos do programa coa maior parte do alumnado.

Ademais de en Galicia, o programa desenvólvese noutras comunidades españolas, concretamente en Cantabria, Madrid, A Rioxa, Navarra, Murcia, Castela e León, Aragón e Comunidade Valenciana, así como nos países de Uruguai, Chile e México.         

Información xeral Consellería de Educación, Ciencia, Universidades e Formación Profesional

Summary: 

A directora xeral de FP e representantes da Axencia para a Modernización Tecnolóxica de Galicia buscar sinerxías neste ámbito estratéxico para administracións e empresas

Idioma Gallego

A Xunta vai dotar o Centro Galego da Innovación da FP Eduardo Barreiros dun espazo de alta especialización en ciberseguridade dotado coas últimas tecnoloxías e o equipamento necesario para conseguir a máis alta formación e especialización do profesorado e a xeración de proxectos de I+D+i que sexan de transferencia directa ás empresas e institucións.

Así o acordaron hoxe a directora xeral de FP, Eugenia Pérez, e o xefe de área de Infraestruturas e seguridade de Amtega, Adrian Lence, nunha xuntanza de traballo mantida nas instalacións deste centro, en Ourense, coa finalidade de buscar sinerxías neste eido, que constitúe un dos obxectivos estratéxicos tanto das administracións como das empresas. Precisamente, o Centro Eduardo Barreiros ten entre as súas funcións o desenvolvemento da investigación aplicada e a transferencia dos resultados dos proxectos ao resto dos centros de Formación Profesional e ao conxunto dos sectores produtivos.

O seu obxectivo primordial é protexer os sistemas tecnolóxicos e os datos privados contidos nos mesmos fronte a calquera tipo de ameaza. Por esta razón, hoxe en día, o papel que desempeña a ciberseguridade na sociedade é sumamente relevante xa que achega ferramentas e mecanismos que permiten aumentar a confianza e seguridade no ámbito dixital, retador, global e interconectado actual.

Másteres de ciberseguridade

Para o vindeiro curso 2024-2025, a oferta de Formación Profesional inclúe 14 másters de FP en materia de ciberseguridade, nove en Ciberseguridade en contornos das tecnoloxías da información e cinco en Ciberseguridade en contornos das tecnoloxías da operación. Isto supón un reforzo da oferta coa ampliación de 190 prazas máis neste eido, o que representa un incremento do 135,71 % con respecto ao presente curso. 

Información xeral Consellería de Educación, Ciencia, Universidades e Formación Profesional

Summary: 

A Comisión Europea acaba de recoñecer o papel crucial da biotecnoloxía na competitividade, a seguridade e a resiliencia da UE

Galicia leva apostando polo sector desde hai case unha década a través de sendas estratexias de impulso e consolidación, que teñen contribuído a conformar un novo sector económico para situar á nosa Comunidade como referente nesta materia

Idioma Gallego

A directora da Axencia Galega de Innovación (Gain), Carmen Cotelo, interviu esta mañá na inauguración dos Galicia Biodays 2024, o foro de referencia da industria biotecnolóxica para o Espazo Atlántico Europeo, organizado polo clúster Bioga en colaboración coa Xunta de Galicia. A continuación, moderou unha mesa redonda sobre o impacto das estratexias biotecnolóxicas nas rexións.

Na súa intervención de apertura, a representante da Consellería de Educación, Ciencia, Universidades e FP expuxo que nos atopamos nun momento único para a biotecnoloxía en Europa, xa que a Comisión Europea acaba de recoñecer o seu papel crucial na competitividade, a seguridade e a resiliencia da Unión Europea e afirmou que Galicia está preparada para aproveitar estas novas oportunidades que se lle abren e facelo a gran velocidade desde o primeiro momento. Carmen Cotelo agradeceu a Bioga a organización deste foro que contribúe á reflexión e ao debate e proxecta a biotecnoloxía galega máis aló das nosas fronteiras.

De feito, Galicia leva apostando polo sector desde hai case unha década, primeiro a través da Estratexia de Impulso á Biotecnoloxía para o periodo 2016-2020, que conseguiu mobilizar 262 millóns de euros concentrando os esforzos en promover a investigación, a transferencia de tecnoloxía e a creación de novas empresas e contribuiu a conformar un novo sector económico. E, actualmente, coa Estratexia de Consolidación do sector que pretende situar á biorexión nunha posición de liderado nesta tecnoloxía, dotada cun orzamento de 622 millóns de euros ata 2025.

A directora de Gain informou de que Galicia avanza pola boa senda e que xa leva mobilizado máis investimento nos primeiros tres anos da estratexia de consolidación que en todo o quinquenio anterior e que pasou de contar cun único clúster aos seis clústeres actuais e un Hub de innovación dixital europeo. Ademais, apuntou que a biotecnoloxía é un motor clave da economía galega, que realiza o 17 % do gasto en I+D da nosa Comunidade e que impulsa o talento, con máis de 1200 persoas investigadoras en empresas e organismos de coñecemento.

Cotelo tamén recoñeceu o bo facer das empresas do sector que están a realizar fortes investimentos e dinamizar así a todos os axentes do ecosistema. Por todo isto, a directora da Axencia confirmou o compromiso da Xunta no impulso á colaboración entre o tecido produtivo e os centros de coñecemento, á transferencia de coñecemento, ao investimento produtivo das empresas consolidadas e ao emprendemento biotecnolóxico.

Impacto das estratexias de biotecnoloxía nas rexións

A continuación, a directora de Gain exerceu de moderadora nunha mesa redonda centrada no impacto das estratexias biotecnolóxicas nas rexións coa participación de dous expertos internacionais na materia : Giuseppina Luvara, en representación da Dirección Xeral de I+D+i da Comisión Europea, e Christian Suojanen, fundador e CEO de Broadreach Global, compañía do sector da biosaúde e asesor en temas de innovación. No panel abordáronse as políticas e tendencias actuais que poden contribuír a impulsar as biorrexións.

Información xeral Consellería de Educación, Ciencia, Universidades e Formación Profesional

Summary: 

Tras avanzar onte os primeiros resultados no Consello da Xunta, o conselleiro de Educación dá conta no Consello Galego para a Convivencia Escolar da IV Enquisa de convivencia escolar e hábitos sociais

O cuestionario inclúe por primeira vez preguntas para coñecer hábitos sociais relacionados co uso das novas tecnoloxías ou roles de xénero

Máis da metade do alumnado de 5º e 6º de Primaria e máis do 90% do de ESO e ensinanzas postobrigatorias ten móbil propio

“É necesario poñer en valor o bo traballo feito pola comunidade educativa para que os centros sexan lugares seguros, inclusivos e libres de acoso”, di o conselleiro

Idioma Gallego

O 85,5% do alumnado participante na IV Enquisa de convivencia escolar e hábitos sociais realizada pola Xunta afirma non ter recibido nunca ou case nunca ameazas, intimidacións, insultos ou algo parecido a través da rede, ben sexa a través do móbil, ordenador ou outros dispositivos. Así o explicou o conselleiro de Educación, Ciencia, Universidades e FP, Román Rodríguez que, acompañado pola directora xeral de Ordenación e Innovación Educativa, Judith Fernández, deu conta hoxe dos resultados desta diagnose no Consello Galego para a Convivencia Escolar, despois de que no Consello da Xunta se avanzasen onte os primeiros datos.

“Estamos a falar do PISA da convivencia escolar, a maior enquisa nesta materia en Galicia,           coa participación de máis de 172.000 persoas, o procesamento de 43 millóns de datos e unha fiabilidade do 99%”, explicou o conselleiro, salientando que os resultados da enquisa veñen a constatar que a implicación do profesorado e as medidas postas en marcha pola Xunta a través da Estratexia galega de Convivencia Escolar están a funcionar e a repercutir nunha mellora no climas nas aulas. “Case o 90% dos enquisados consideran que os conflitos son pouco frecuentes e non representan un problema xeneralizado”, sinalou Román Rodríguez.

O titular do departamento educativo do Goberno galego recordou, ademais, que os resultados “indican que hai un aumento en xeral da percepción de que a convivencia mellorou nos últimos anos”. En todo caso subliñou que mentres exista “un só conflito, seguiremos traballando para que se solucione”. “Pero é necesario poñer en valor o bo traballo feito pola comunidade educativa para que os centros escolares sexan lugares seguros, inclusivos, libres de acoso e de estereotipos de xénero e nos que se practica a tolerancia cero fronte ás situacións de acoso de calquera tipo”, incidiu.

O cuestionario, realizado en 2023, incluíu por primeira vez preguntas para coñecer hábitos sociais relacionados co uso das novas tecnoloxías ou roles de xénero, entre outros aspectos, dado que as Tecnoloxías da Relación, Información e Comunicación (TRIC) están a gañar peso na sociedade como escenarios a onde se trasladan os conflitos.

Deste xeito, o 95,6% dos estudantes de 5º e 6º de Educación Primaria, o 82% dos de ESO e os 79,7% dos de ensinanzas postobrigatorias afirman que nunca ou case nunca recibiu condutas intimidatorias por estes medios. Pola súa parte, o 98,7% das familias afirma que os seus fillos nunca ou case nunca se sentiron ameazados, intimidados, insultados ou acosados a través de internet. Así mesmo, o 73,8% do profesorado manifesta que os conflitos relacionados co uso incorrecto dos dispositivos electrónicos ou da rede son feitos puntuais.

Hábitos na internet

Segundo se desprende das preguntas da enquisa dirixidas ás familias sobre o uso da tecnoloxía por parte dos seus fillos, o 83,3 % delas afirma que limita sempre ou case sempre o uso de dos dispositivos electrónicos e a conexión á rede dos seus descendentes, fronte ao 16,7% que afirma que non o fai nunca ou case nunca. O 68,9% das familias afirma que nunca ou case nunca permite a conexión a internet durante as horas de estudo e o 32,2 % das familias manifesta permitir a conexión a internet durante todo o día.

Con respecto ás respostas do alumnado, o 81% do alumnado de ensinanzas obrigatorias e o 90,9 % de postobrigatorias afirma que se conecta a internet varias veces á semana ou case todos os días. Menos do 2% manifesta que nunca se conecta. En canto ao número de horas que permanece na rede, manifestan pasar entre 1 e máis de 5 horas conectado á rede de luns a venres o 64,1 % dos estudantes de 5º e 6º de Educación Primaria, o 78% dos de ESO e o 77,6% dos de ensinanzas postobrigatorias. 

No que atinxe á posesión dun teléfono móbil propio, os datos achegados polo alumnado permiten concluír que o 78,2% do de ensinanzas obrigatorias (un 53,50% de alumnado de 5º e 6º de Educación Primaria e un 90,6% de ESO) ten un teléfono propio, así como o 92,5% do de postobrigatorias.

En canto ao uso de redes sociais, o 72,6% do alumnado de ensinanzas obrigatorias e un 83% do de postobrigatorias afirma usalas. Entre as redes sociais máis empregadas polo alumnado, TikTok é a máis utilizada entre o alumnado de ESO (51,6%) seguida de Instagram (44,8%). No caso das ensinanzas postobrigatorias as máis populares son YouTube (30,5%), Pinterest (29,1%) e Twitter (26,6%). No caso das ferramentas de mensaxería, a máis popular entre o alumnado é WhatsApp, seguida de Zoom e Meet.

A enquisa inclúe tamén preguntas sobre outros hábitos relacionados coas Tecnoloxías da Relación, Información e Comunicación, como o uso de videoxogos como actividade de entretemento no seu tempo de ocio. En base ás respostas analizadas, son unha opción de entretemento para o 80,8% do alumnado de 5º e 6 de Primaria, o 67,9% de ESO e o 56,8% de ensinanzas postobrigatorias. Na maioría dos casos xogan acompañados de amigos ou familiares.

O 91,3% do alumnado de ESO e o 87% do de ensinanzas postobrigatorias afirma que non participa en apostas en liña. Por outra banda, o 73,9% do alumnado de ensinanzas obrigatorias e o 59,3% afirma non ter entrado nunca ou case nunca en páxinas de contido pornográfico.

Sen estereotipos de xénero

Finalmente, súmase á enquisa unha batería de cuestións sobre roles de xénero e linguaxe inclusiva. Preguntado o alumnado sobre a súa opinión relacionada con quen debería realizar tarefas estereotipadas, un promedio do 85% do alumnado considera que homes e mulleres deben realizar por igual tarefas moi diversas, como pasarlle o ferro á roupa ou deseñar aplicacións informáticas. Pola súa banda, un 93 % das familias sostén que as devanditas tarefas tamén deben ser realizadas por igual.

Ante a posibilidade de asociar certas ocupacións ou traballos específicos baseándose en estereotipos de xénero, os datos máis significativos sinalan que aínda que o 53,7% do alumnado enquisado considera que a profesión de electricista a desempeñan por igual homes e mulleres, o 44,35% a asocia cos homes fronte a un 1,4 % que a asocia coas mulleres. Outras profesións tamén asociadas a un perfil masculino son a de taxista ou militar, mentres que se vinculan más coas mulleres as de modelo ou recepcionista.

No ámbito das familias, os estudantes perciben tamén igualdade de xeito maioritario. Así, o 64,3 % dos de ensinanzas obrigatorias e o 70,2% dos de postobrigatorias afirma que se ocupan dos seus estudos os homes e mulleres da familia por igual. En relación coas tarefas nas que adoita colaborar o alumnado na súa casa, a máis destacada é a de poñer ou recoller a mesa cun 87,7% seguida de facer as camas cun 81,40%. 

File: 

Informe da diagnose da convivencia e hábitos sociais Información xeral Consellería de Educación, Ciencia, Universidades e Formación Profesional

Summary: 

O conselleiro de Ciencia destaca un investimento de máis de 4,2M€ do seu departamento neste espazo, que xerará 33 empregos altamente especializados

O obxectivo é facilitar a transferencia de coñecemento da ciencia á sociedade, un dos obxectivos do novo Plan de I+D+i que se vai comezar a deseñar

Idioma Gallego

O conselleiro de Educación, Ciencia, Universidades e FP, Román Rodríguez, visitou esta mañá as obras do Centro de Investigación Mestrelab, en Santiago de Compostela, que conta cun investimento de máis de 4,2M€ por parte da Xunta. Este novo espazo é un dos principais fitos da Estratexia de Consolidación do sector Biotecnolóxico de Galicia 2021-2025, a folla de ruta do Goberno galego para avanzar no posicionamento de Galicia como rexión referente en biotecnoloxía.

Román Rodríguez destacou a aposta de Mestrelab pola xeración de emprego altamente especializado arredor do coñecemento. “Non en balde, este novo centro leva consigo a creación de 33 postos de traballo neste eido, a maioría deles investigadores, dos que xa están contratadas 12 persoas”, explicou. 

O Centro de Investigación Mestrelab, especializado en software científico, ten como obxectivo acelerar a investigación para o deseño de novas ferramentas dixitais de alto valor engadido para os sectores farmacéutico e biotecnolóxico, que permitirán acelerar o procesamento de grandes volumes de datos. Deste xeito, facilítase o labor dos científicos, de forma que se axilicen as partes máis rutineiras do seu traballo e se poidan acadar resultados máis rápido. 

En definitiva, como puido comprobar o conselleiro, este novo espazo nace para facilitar a transferencia de coñecemento da ciencia ás empresas e á sociedade, que é un dos obxectivos primordiais do novo Plan de I+D+i que a Xunta vai comezar a deseñar. 

Establecemento de sinerxías

O titular do departamento de Ciencia do Goberno galego destacou, así mesmo, a necesidade de establecer sinerxías e unir forzas entre todos os axentes do ecosistema de investigación de Galicia para acadar os mellores resultados.

De feito, a apertura deste centro de Mestrelab aproveita tamén a localización próxima ao Campus Vida da Universidades de Santiago, de tal modo que dentro del existan salas e espazos tecnolóxicamente habilitados para a prestación de servizos. 

Tecnoloxía galega en todo o mundo

Mestrelab naceu en 2004 como unha spin-off da Universidade de Santiago de Compostela.  A súa actividade céntrase no desenvolvemento e comercialización de software de procesado e análise de datos, e hoxe en día é a segunda empresa líder mundial no software de tratamento de datos de resonancia magnética nuclear. Desde 2018 forma parte da multinacional suíza Bruker Corporation, empresa líder mundial en espectrofotometría de resonancia magnética.

Con clientes en máis de 70 países nos cinco continentes, as ferramentas creadas en Mestrelab son empregadas por máis de 500 clientes industriais do sector químico e biotecnolóxico, entre eles 12 das 20 farmacéuticas máis potentes do mundo. Así mesmo, prové de licenzas dos seus produtos ás universidades máis prestixiosas do mundo, incluíndo o Massachusets Institute of Technology (MIT) e as universidades de Harvard, Oxford, Yale, Princeton ou Berkeley, entre outras.

Información xeral Consellería de Educación, Ciencia, Universidades e Formación Profesional

Summary: 

Segundo o informe elevado ao Consello da Xunta, aumenta en todos os colectivos a percepción de que a convivencia mellora en comparación cos anos anteriores

Medra a porcentaxe de estudantes que afirma non ter padecido nin cometido condutas negativas, percepción compartida polas familias

Máis do 90% dos alumnos consideran que o seu é un centro inclusivo, onde todo o mundo é benvido, e a maioría da comunidade educativa amosa tolerancia cero coa discriminación e a desigualdade

Trátase do maior estudo que se fai en Galicia nesta materia e ten unha fiabilidade do 99%, co procesamento de 43 millóns de datos de máis de 172.000 enquisas

A Estratexia Galega de Convivencia Escolar 2025 ampliarase o vindeiro curso con medidas como o reforzo das escolas de nais e pais e un plan de coeducación

Idioma Gallego

O clima de convivencia nas aulas galegas segue mellorando. Así se reflicte no informe de resultados da IV Enquisa de Convivencia Escolar e Hábitos Sociais, elevado hoxe ao Consello da Xunta, segundo o que preto do 90% dos enquisados consideran que os conflitos son pouco frecuentes e non representan un problema xeneralizado. En xeral, obsérvase un aumento en todos os colectivos da percepción en relación coa mellora da convivencia escolar en comparación cos resultados de anos anteriores.

Trátase do maior estudo que se fai en Galicia nesta materia e ten unha fiabilidade do 99%. O cuestionario dirixiuse ao profesorado, alumnado a partir de 5º de Primaria ata Bacharelato e FP, persoal non docente e familias. Participaron 172.544 persoas e procesáronse 43 millóns de datos, o dobre da edición anterior, dado que se sumaron novos apartados. Ademais, por primeira vez incluíronse preguntas para coñecer hábitos sociais relacionados co uso das novas tecnoloxías, os roles de xénero ou vocacións, entre outros aspectos. Todos os detalles do informe de diagnose realizado a partir da enquisa presentaranse este martes no Consello Galego para a Convivencia Escolar.

No camiño cara a un sistema educativo cada vez máis inclusivo, a enquisa de diagnose da convivencia 2023 volve incluír un cuestionario pictográfico para facilitar a participación dos escolares que precisan asistencia. Ante a pregunta de como se sinte non centro, preto dun 90% deste alumnado manifesta sentirse feliz ou moi feliz.

Conflitos e espazos

Os principais conflitos de convivencia percibidos polo alumnado son non deixar dar clase (32,4%), faltar á clase sen causa xustificada (31,9%), agredir verbalmente (31%), chegar tarde á clase (29,2%), dicir mentiras sobre alguén (25,3%), poñer alcumes ou rirse doutro (24, 3%) e ameazar ou insultar (21,7%).

Entre os conflitos menos habituais están agredir fisicamente (12,4%), consumir drogas (alcohol, tabaco... 12,2%), entrar e saír da clase sen permiso (11,1%), roubar diñeiro ou material (10,7%), provocar, ridiculIzar ou insultar ao profesorado (9,32%), ameazar ou insultar usando as TIC (8,8%), acosar ou ciberacosar por ordenador ou móbil (7,7%), non cumprir as normas de convivencia do centro (3,6%) e observar actos vandálicos con danos no centro (2,3%).

En canto aos espazos e momentos onde se producen os conflitos, para o alumnado de ensinanzas obrigatorias o recreo é o momento no que máis se producen, mentres que os estudantes de maior idade consideran que os arredores do centro é o lugar onde tenden a xurdir con máis frecuencia.

Resolución pacífica

A resolución pacífica dos conflitos constitúe un factor de calidade na educación e un aspecto moi relevante na mellora da convivencia escolar e neste apartado cómpre destacar o papel do profesorado titor. Non en balde, a forma máis habitual de resolución de conflitos que adopta o alumnado é falando coa persoa titora individualmente (62,8%), seguida de falar entre todos (43,4%).

Pola súa banda, o 88,5% do profesorado consultado manifesta que adoita resolver os conflitos dialogando para intentar chegar a acordos ou tratando o conflito entre todos (76,5%). No caso das familias, máis dun 90% das familias consultadas afrontan a resolución de conflitos acudindo ao profesorado.

Menos condutas negativas

Ademais, medra a porcentaxe de alumnos que afirma non ter padecido condutas negativas, case un 73%, fronte ao 70% da enquisa anterior. A mellora do clima escolar dáse tanto nas ensinanzas postobrigatorias, cun 82,7% de rapaces que non sentiron este problema, fronte ao 75,9% de 2021, como nas ensinanzas obrigatorias, o 71,3%, fronte ao 68% de 2021.

Así mesmo, aumenta a porcentaxe de estudantes que declara non manter condutas negativas. Deste xeito, afirman non ter este patrón de comportamento o 85,3% dos alumnos (no 2021 foi máis do 80%). O 84,4% dos alumnos de ensinanzas obrigatorias di non cometer condutas contrarias á convivencia, fronte ao 83,6% da enquisa anterior; así como o 89,9% dos de ensinanzas postobrigatorias, seis puntos por riba do 75,9% rexistrado en 2021 para esta mesma pregunta da enquisa.

Os alumnos que declaran ter padecido estas condutas sinalan como as máis habituais que se riron deles (8,97%), que os insultaron (8,11%) ou que se difundiron rumores sobre eles (7,8%).

A maioría das familias consultadas, o 79%, afirman que os seus fillos non participaron en situacións que poidan afectar negativamente a outras persoas nin foron vítimas deses comportamentos.

Tolerancia cero

No que atinxe ás condutas do alumnado potencialmente positivas para a convivencia, máis do 80% respecta ao profesorado, atende ás explicacións, fai as tarefas encomendadas e cumpre as normas de convivencia, cunha mellora de arredor de cinco puntos na resposta a estas preguntas respecto da enquisa de 2021.

Ademais, os resultados da enquisa demostran que a galega é unha comunidade educativa moi sensibilizada e concienciada neste ámbito. De feito, máis do 90% do alumnado considera que todo o mundo é benvido no centro e unha maioría importante da comunidade educativa amosa tolerancia cero coa discriminación e a desigualdade.

Ao igual ca nas enquisas anteriores, unha gran porcentaxe de participantes manifestan un alto nivel de satisfacción co centro educativo ao que pertencen, ítem que mellorou sensiblemente respecto da enquisa anterior e que supón arredor do 90% entre o profesorado, o persoal de administración e servizos, as familias e o alumnado de 5º e 6º de Primaria. Tamén o 72,6% do alumnado de Educación Secundaria Obrigatoria e o 77% do de ensinanzas postobrigatorias está satisfeito co seu centro.

Novas medidas

A enquisa enmárcase na Estratexia galega de convivencia escolar 2025, a folla de ruta para o desenvolvemento de accións globais que teñen como obxectivo que cada alumno, en cada centro e en todas as etapas educativas, sexa quen de desenvolver ao máximo posible as súas potencialidades nun clima de cooperación, respecto e tolerancia.

A estratexia inclúe o Plan integral contra o acoso e ciberacoso escolar, co obxectivo da tolerancia cero neste tipo de conductas. Desde a súa aprobación, a Xunta ten desenvolvido diferentes medidas, como a limitación dos móbiles nas aulas, a instalación no 100% dos centros educativos dun punto laranxa para denunciar anonimamente posibles situacións e a formación dos Equipos de actuación contra o acoso escolar constituídos en cada centro.

Ademais, trabállase de xeito coordinado coa Consellería de Sanidade para apoiar ás vítimas, cun proceso de deriva prioritaria aos servizos de saúde mental, tanto para a diagnose como para a intervención terapéutica e en campañas de sensibilización, deseñadas para chegar especialmente á mocidade.

A maiores, a Consellería de Educación vai seguir desenvolvendo a estratexia con novas medidas, como o reforzo das escolas de nais e pais, a través do impulso de actividades de formación referidas ao uso responsable das TIC e ao ensino dixital.

Así mesmo, estase a traballar na elaboración dun plan de coeducación para afondar no tratamento da sensibilización, da prevención, da detección precoz e da intervención ante a violencia contra as mulleres, favorecendo a eliminación de estereotipos e da fenda de xénero na formación. Así mesmo, melloraranse os sistemas de resposta educativa ante a diversidade afectivo- sexual e de identidade de xénero.

Un cuestionario anónimo

Na IV Enquisa de Convivencia Escolar os cuestionarios tiveron diferentes versións en función do colectivo da comunidade educativa ao que vai dirixido e da etapa educativa do alumnado. Así mesmo, no marco da aposta pola inclusión, incluíuse un cuestionario pictográfico para facilitar a participación de todo o alumnado.

As preguntas foron sinxelas e directas, deseñadas para a súa resposta en liña a través dunha ferramenta informática que permitiu a recollida de datos de xeito automatizado e totalmente anónimo. Para manter a súa fiabilidade, validez, consistencia interna e a trazabilidade dos resultados, conservouse o groso das preguntas da primeira e segunda edición. Por primeira vez este ano incorpórase un bloque específico de preguntas do ámbito da igualdade, outro relacionado coas tecnoloxías da relación, a información e a comunicación, e un terceiro sobre orientación vocacional.

Información xeral Consellería de Educación, Ciencia, Universidades e Formación Profesional