O CEIP de Arzúa conta cunha canteira impresionante de afeccionados á lectura que saben que é un hábito moi saudable ademais dunha compañeira de viaxe moi especial. Nestes días de confinamento descubrimos a grande compañía que nos fan os nosos amigos, os libros. O amor polos libros supón, en definitiva, amor pola vida.
Vendo os vídeos dos nosos lectores e lectoras máis novos descubrimos que os libros viven dentro de nós, e os nosos nenos e nenas teñen unha arte especial para narralos.
Cos vídeos dos nosos lectores e lectoras máis maiores descubrimos que o mundo está cheo de libros fermosos que nos convidan a ler para que desfrutemos do pracer da lectura como o gozaron eles.
Ler é moi importante porque coa lectura non só aprendemos moitas cousas senón que tamén nos facemos mellores persoas. Os libros son compañeiros, mestres, magos... Neles hai máis tesouros que en todo o botín dos piratas da Illa do Tesouro. Isto sábeno moi ben os nenos e as nenas do noso colexio que, nesta data tan especial, quixeron compartir con nós os seus libros favoritos, e se vos parecen fermosos por fóra, imaxinade o paraíso que podedes atopar dentro deles.
Animádevos e lede, hoxe e sempre, desfrutaredes máis da vida. Aquí vos deixamos un montón de propostas...
Moitas grazas a todas e a todos os que colaboráchedes.
FELIZ DÍA DO LIBRO!
