Celebracións

Luns 5 de xuño de 2023

Este luns 5 de xuño todo o alumnado do CEIP As Bizocas, xunto con algunhas familias voluntarias e o profesorado, celebrou o Día do Medio Ambiente cunha actividade moi especial organizada pola mestra de Educación Física, seguindo co proxecto actual dos ODS.

A xornada consistiu en realizar por cursos un roteiro pola contorna para atopar un "tesouro" agochado por nenos/as doutras clases en días anteriores. Para atopalo, deberon seguir as indicacións dos mestres/as, que sinalaban a orientación na que se encontraba.

Unha vez atopado o tesouro a media mañá, todos os cursos xunto co profesorado e as familias, chegaron á Casa da Cultura para merendar e repoñer forzas.

Tanto na ida como na volta todos os/as participantes puxeron luvas e recolleron o lixo que atopaban polo camiño. En total unhas 60 bolsas!

Ao chegar ao colexio marcaron no mural se atoparon o tesouro escondido e fixemos fotos de grupo.

Foi unha xornada moi divertida na que celebramos o Día do Medio Ambiente coñecendo, explorando e coidando a nosa contorna! 

Ademais, saímos no xornal!! Podedes ver a nova completa pinchando no seguinte enlace:

https://www.lavozdegalicia.es/noticia/arousa/2023/06/06/bizocas-celebra-dia-medio-ambiente-cuidando-planeta/0003_202306A6C4991.htm

Moitas grazas ás familias que colaboraron!

Pinchade nas fotos para ver máis!

 

 Luns 15 de maio de 2023

No 1.º ciclo de Primaria puxémonos mans á obra para preparar un agasallo para celebrar o Día Familia. Aproveitando material reciclado, elaboramos un xoieiro ben bonito con dúas xoias para regalar a cada familia.

Realizamos os seguintes pasos:

1. Pintamos círculos de cartón con témpera de diferentes cores.

2. Pintamos o lateral dunha caixa de queixiños e pegamos:

- Na parte superior: a ruleta ODS coa foto de cada neno/a.

- Na parte inferior: o planeta Terra.

- No interior: unha mensaxe preciosa sobre este día.

3. Cando secaron os círculos, os/as profes pegáronos con silicona e puxeron os cordóns, para formar colares e pulseiras.

Premendo no seguinte enlace podedes ver un vídeo da actividade.

FELIZ DÍA A TODAS AS FAMILIAS!!!

Mércores 8 de marzo de 2023

Con motivo da celebración do 8M, "Día Internacional da muller", estivemos a realizar varias actividades no centro.

Comezamos elaborando un mural cheo de cor sobre Frida Khalo. Contamos coa colaboración das familias para facer as flores.

Moita grazas pola colaboración! Quedou precioso!

Podedes velo na entrada do colexio, ao lado de Conserxaría.

Tamén investigamos en cada clase sobre mulleres pioneiras en desenvolver diferentes profesións: médica, bombeira, aviadora... Conseguimos moita información.

Ademais, os nenos e nenas voluntarios/as da biblioteca repartiron pins do 8M empregando no deseño a ruleta dos ODS.

ODS relacionados:

- número 5: "Igualdade de xénero"

- número 10 "Redución das desigualdades"

Venres 17 de febreiro de 2023

Despois de realizar ao longo da semana os mandatos do Meco...

CHEGOU O ENTROIDO ÁS BIZOCAS!!!

Comezamos sacando fotos por cursos no photocall elaborado polos nenos e nenas de 6.º de Primaria.

A continuación tivo lugar o desfile de disfraces reciclados baseados nos Obxectivos de Desenvolvemento Sostible (ODS). Cada curso elaborou dous carteis para logo formar un crebacabezas cos 17 obxectivos. Ao rematar cantamos e bailamos a canción do Entroido elaborada polo Sabichón, a mascota do colexio.

Logo, pasamos a merendar postres típicos achegados polas familias. Estaba todo riquísimo!

Por último puxemos rumbo ao IES As Bizocas para particpar no seu desfile, cantar e bailar a nosa canción, e asistir a unha parte do concurso de comparsas. Seguro que repetiremos!

Foi un día fantástico!

Premendo na seguinte imaxe, podedes acceder á galería.

Xoves 9 de febreiro de 2023

3...2...1...

A vindeira semana celebraremos o Entroido no colexio, así que xa estamos a preparalo todo para desfrutar desta celebración tan arraigada na zona do Grove.

• Mensaxe carnavaleiro do Sabichón.

(premede na imaxe)

• Mandatos do Meco (de luns a xoves): este ano os mandatos estarán relacionados coa reciclaxe. En breve, recibirides a información.
  

• Festa do Entroido: desfile e degustación de postres típicos de Entroido. Non esquezades o voso disfraz feito con material de refugallo e relacionado cos obxectivos ODS que vos indicamos.