Mañá comenza o prazo de matrícula anticipada para a convocatoria ordinaria do 2022 da AVALIACIÓN DE BACHARELATO PARA ACCESO Á UNIVERSIDADE (ABAU).
¡¡É importante non confundir a matrícula anticipada coas outras modalidades de matrícula da convocatoria ordinaria: Matrícula ordinaria e matrícula extraordinaria!!.
A matrícula ordinaria é para o alumnado de centros da Comunidade Autónoma de Galicia que teña superado o Bacharelato na convocatoria ordinaria deste curso 2021/22 (debe ser realizada polo alumnado, a través da aplicación NERTA, nos centros correspondentes de Educación Secundaria do 19 ao 23 de maio ) A vindeira semana engadiremos na páxina web información detallada sobre este procedemento.
A matrícula extraordinaria está destinada ó alumnado de centros de Galicia que obteña resolución favorable da súa reclamación ás cualificacións do Bacharelato ante a Xefatura Territorial correspondente. Este alumnado poderá matricularse a través da aplicación Nerta, das 9:00 ás 14:00h. do día seguinte a comunicación da resolución,
Prazo da matrícula anticipada:
Do 7 de maio ó 25 de maio de 2022
Destinatarios da matrícula anticipada:
Poderase matricular no prazo sinalado para a Matrícula Anticipada o alumnado que obtivese en anos anteriores ao curso 2021-2022 o titulo de Bacharelato ou un título declarado equivalente ou o título de Técnico Superior de FP, Técnico superior de Artes Plásticas e Deseño ou Técnico Deportivo Superior español ou declarado equivalente e se atope nalgunha das seguintes situacións:
a) Alumnado que teña aprobado o bacharelato ou un título equivalente en convocatorias anteriores e que non superase a proba ABAU poderá matricularse obrigatoriamente da Parte obrigatoria (das 5 materias) da ABAU e, se o desexa, da Parte Voluntaria.
b) Alumnado que teña aprobado o bacharelato ou un título equivalente en convocatorias anteriores e que xa superase a proba ABAU poderá matricularse da parte obrigatoria (das 5 materias) da ABAU e/ou da Parte Voluntaria.
c) Alumnado de FP de anos anteriores que estea en posesión do título de Técnico Superior de FP, Técnico Superior de Artes Plásticas e Deseño ou Técnico Deportivo Superior ou equivalentes poderá matricularse unicamente da Parte Voluntaria.
d) Alumnado de anos anteriores en posesión do título de Bacharelato Europeo que acredite a súa residencia en Galicia poderá matricularse unicamente da Parte Voluntaria.
e) Alumnado procedente de sistemas educativos estranxeiros que obtivese ahomologación dos seus estudos aos títulos de bacharelato ou de Técnico Superior de FP, de Técnico Superior de Artes Plásticas e Deseño ou de Técnico Deportivo Superior español e que acredite a súa residencia en Galicia poderá matricularse unicamente da Parte Voluntaria.
f) Alumnado procedente de sistemas educativos da UE ou equivalentes que estea en posesión da credencial de acceso expedida pola UNED e que acredite a súa residencia en Galicia poderá matricularse unicamente da Parte Voluntaria.
g) Alumnado de Formación Profesional pertencente a centros de Galicia que estea en disposición de acadar o título de Técnico Superior de FP, Técnico Superior de Artes Plásticas e Deseño ouTécnico Deportivo Superior ou equivalente na convocatoria de xuño do curso 2021/22, aínda que estea pendente da finalización da Formación en centros de Traballo (FCT) e, se é o caso, o módulo de proxecto, e desexe mellorar a súa nota de acceso á universidade mediante a realización da Parte Voluntaria. Os resultados estarán condicionados á superación da FCT e/ou proxecto.
Procedemento de matriculación anticipada:
A matrícula anticipada realizarase a través da aplicación informática Nerta (https://www.edu.xunta.es/nerta) e, de non ser posible, enviarase a documentación por correo electrónico ao correspondente Lugar de Entrega e Recollida de Documentación (LERD, véxase Anexo I) que procederá á súa matrícula.
Só excepcionalmente poderá facerse in situ, previa cita, nos LERD habilitados en cada un dos sete campus de Galicia (véxase Anexo I).
O alumnado dos Centros de Galicia que ten os seus datos académicos informatizados na aplicación Nerta e con conta de usuario fará a súa matrícula a través desta aplicación (https://www.edu.xunta.es/nerta/).
Documentación para a matrícula anticipada
Documentación común:
1. Fotocopia do DNI ou Pasaporte.
2. Impreso oficial de matrícula na ABAU debidamente cumprimentado (datos persoais,
académicos e de matrícula para a ABAU) que poderá baixar da páxina web da CIUG.
3. Resgardo acreditativo de ter aboados os prezos públicos de matrícula ou, no seu caso, documentación que acredite a exención destes, segundo o estipulado nesta convocatoria de matrícula (consultar o extracto da convocatoria no arquivo adxunto "Prezos públicos e exencións").
Documentación específica
Consultar o extracto da convocatoria no arquivo adxunto "Documentación para a matrícula anticipada"
Normativa e máis información:
