INFORMACIÓN PARA AS FAMILIAS

A situación creada polo COVID-19 obrigou a toda a sociedade e, por descontado, ao centro a adaptarse e formular toda unha serie de modificacións importantes na vida académica para o curso 2020-2021. Para transmitir estas modificacións nos aspectos que afectan ás familias e ao noso alumnado enviamos esta circular.

Docencia presencial

Se non hai ningunha instrución en contra desde a Consellaría de Educación ao longo deste ano a docencia será presencial en todos os niveis e estudos.

Horario do centro:

Entrada e saída: o alumnado entrará ás 8:30 e sairá ás 15:00 horas os luns e xoves e ás 14:10 os martes, mércores e venres. Como regra as clases duran 50 min.

O centro estará aberto antes da hora de entrada (desde as 8:10). Para evitar aglomeracións no patio o profesorado de garda procurará que todos se comporten conforme ás normas de seguridade tanto no patio como no vestíbulo do centro.

Respecto da saída, para evitar aglomeracións, faranse dous agrupamentos de alumnado para saíren de modo diferenciado. Un grupo co primeiro toque de timbre, 3-5 min antes da hora de saída do día, e o segundo grupo co segundo toque de saída, na hora habitual.

Recreo:

O recreo durará 40 minutos. Para evitar aglomeracións os dous agrupamentos de alumnado  farán o recreo en dous momentos diferentes da mañá. Un dos grupos terá o seu tempo de lecer entre as 11:00 e as 11:40. O segundo grupo terá o seu tempo de lecer entre as 11:50 e 12:30. Deste modo evitamos ter mais de 250 alumnos en cada recreo e isto permite que nos días de choiva poidan estar todos ou a grande maioría en espazos cubertos. Para este fin marcáronse no chan puntos, liñas e frechas de diversas cores para indicar as zonas de circulación (como se explica abaixo) e zonas de “estacionamento”.

Alumnos e grupos

Seguindo a normativa, o alumnado debe estar situados a metro e medio un do outro polo que a capacidade das aulas ten diminuído. As aulas tipo onde antes estaban 30 alumnos terán agora, como máximo 20 (as que teñan o cargador de ordenadores pasan a 19) por ese motivo houbo que ampliar o número de grupos (habitualmente 3 por nivel). Agora son 5 grupos de 1º da ESO, 5 de 2º da ESO, 4 de 3º da ESO, 4 de 4º da ESO. En Bacharelato seguirá habendo 4 grupos por nIvel (4 de 1º e 4 de 2º Bach).

Aulas:

Este desdobre de grupos obrigou a ocupar todas as aulas “normais” ou “tipo” e ademais servirse de aulas especiais para convertelas en aulas de referencia para certos grupos. A consecuencia disto é que algunhas materias perden o seu espazo natural e adaptado (aula de música, aula de tecnoloxía, por exemplo) e as optativas dos niveis superiores (4º da ESO e 1º e 2º de Bach) poden ter certas limitacións pois van ser impartidas en espazos relativamente inadecuados (biblioteca, salón de actos, laboratorios...).

En todas as aulas haberá unha solución hidroalcohólica a disposición do alumnado para se hixienizaren as mans ao entrar na aula. Tamén haberá unha papeleira con tapa de pedal e virucida e panos de papel para proceder á hixienización por parte de cada alumno do posto, ao final do día ou cando teñan que ocupar un posto que non sexa o seu. Cada posto está atribuído en exclusiva ao alumno ou alumna que se sente nel, coa excepción dos casos en que haxa que compartilos (desdobres ou agrupamentos especiais). Inclusive no caso de aulas específicas (informática, p. ex.) o posto de cada alumno será sempre o mesmo.

Seguindo as indicacións do protocolo da Consellería, os alumnos non poderán deambular pola aula nos tempos entre horas nin ir a ningún lugar excepto coa autorización expresa do profesor ou profesora presente. O comportamento ha de ser exemplar e evitar o contacto físico con outros compañeiros/as e calquera uso compartido de materiais escolares (bolígrafos, papeis, cadernos, calculadoras, correctores...) ou produto, nomeadamente alimentos e bebidas ou doutro tipo.

Circulación no centro

O alumnado será “informado” e adestrado sobre a circulación no centro de maneira detallada nos primeiros días do curso. Con todo aproveitamos para dar unhas referencias básicas sobre como circular polo centro.

No corredor exterior:

Están pintados no chan puntos vermellos e verdes separados entre si 1’5 metros como referencia tanto para a distancia entre alumnos/alumnas como para indicar as liñas básicas de circulación.

Excepto na hora de entrada (8:30) e na hora de saída do centro (14:10 ou 15:00), para entrar no centro o alumnado,ou calquera outra persoa, debe seguir a liña formada por puntos verdes. Para saír o alumnado debe seguir a liña formada por puntos vermellos.

No vestíbulo:

Unha vez hixienizadas as mans con xel hidroalcohólico, deberán percorrer o vestíbulo polos “carrís” destinados á circulación. Un para aproximarse ás escaleiras de subida, na parte dereita do vestíbulo, e outro para abandonar o centro na parte esquerda do vestíbulo (sempre para quen entra). Un terceiro corredor permitirá atravesar o vestíbulo desde as escaleiras de baixada até a cafetaría. Aínda un corredor permite ir do vestíbulo ao Dep. de Orientación ou Ximnasio.

Tamén haberá “carrís” específicos para facer cola e dirixirse á cafetaría, á biblioteca ou aos baños do vestíbulo, marcados con diversos signos no chan, a distancias de 1’5 mts para serviren de referencia para a distancia de seguridade.

No 1º, 2º e 3º andar

A circulación polos andares onde se sitúan as aulas farase sempre percorrendo os corredores pola dereita, seguindo as frechas azuis do chan. A distancia entre a punta dunha frecha e doutra é de 1’5 metros de modo que sirva de referencia para manter a distancia interpersoal. A circulación será dirixida polo profesorado de garda e o das aulas de onde proceda o alumnado.

O ascensor será de uso individual e unicamente para o alumnado ou profesorado que teña dificultades de mobilidade.

Uso de máscara

O uso da máscara é obrigado en todo momento, tanto na aula como no vestíbulo e exterior. Recoméndase que os alumnos traian, ademais da máscara posta, unha ou máis máscaras de reposto por se for necesario o seu uso por rotura, degradación, perda...

O uso debe axustarse ás normas publicadas na cartelería do centro (vestíbulo, corredores, aulas...). Unicamente pode baixarse para inxerir alimentos ou bebidas o tempo necesario para realizar esta acción.

Xel hidroalcohólico

Hai xel hidroalcohólico a disposición do alumnado tanto nas aulas como no vestíbulo. Porén recomendamos os alumnos levaren no seu estoxo ou mochila un bote pequeno de xel hidroalcohólico para hixienizar as mans en calquera momento sen necesidade de moverse pola aula ou o vestíbulo. Este bote poderá recargarse, baixo supervisión do profesorado, co contidos dos botes presentes na aula.

Limpeza do posto

Sempre que un/ha alumno/a ou alumna acceda ao posto que teña sido ocupado por outros, nunha aula de uso común (como a informática) ou de desdobre, debe hixienizar co virucida e o papel que lle forneza o profesor ou profesora. Esta limpeza inclúe a superficie da mesa e as partes inferiores dos laterais, o respaldo da cadeira e calquera outra superficie que poida tocarse coas mans. No caso de ter “anteparo” de separación o seu posto (por exemplo nos ordenadores da biblioteca) deberá desinfectar a súa parte. Tamén deben limpar o teclado, o rato e a pantalla do ordenador.

Titoría e entrevistas

A presenza de persoas no centro fica limitada ao alumnado ao persoal do centro. Os familiares do alumnado NON PODEN ACCEDER ao centro sen cita previa.

Para a comunicación ordinaria das titorías ou doutro tipo utilizaranse os medios telefónicos ou electrónicos a disposición. Unicamente poderán acudir ao centro en caso de teren cita e sempre fora do horario de recreos e cambios de aula, para evitar contacto co alumnado.

COMPROBACIÓN DIARIA DE SÍNTOMAS

Os familiares do alumnado do centro están obrigados segundo o estabelecido nas “Instrucións de actuación coordinadas en materia de saúde pública...” (DOG. 174 bis do 28-08-2020) a realizar unha comprobación diaria, antes de viren ao centro, da temperatura e o estado xeral da alumna ou alumno.

Se tiver calquera síntoma compatíbel cos síntomas propios da COVID-19 (febre, tose seca e persistente, dificultade respiratoria, debilidade...) deberán comunicalos ao centro, mediante chamada telefónica, así como ao pediatra e ficar na casa á espera das decisións médicas pertinentes.

Como mostra do compromiso dos familiares nesta comprobación pedimos asinen a DECALARACIÓN RESPONSÁBEL que enviaremos a través do alumnado no primeiro día de clase.

Enquisa de (auto)avaliación clínica

Síntomas fundamentais

¨ Febre superior a 37’5º C          Cando comezou o síntoma? ____________________________

¨ Tose seca                                      Cando comezou o síntoma? ____________________________

¨ Dificultade respiratoria             Cando comezou o síntoma? ____________________________

Outros síntomas

¨ Fatiga severa (cansazo)            Cando comezou o síntoma? ____________________________

¨ Dor muscular                                Cando comezou o síntoma? ____________________________

¨ Falta de olfacto                            Cando comezou o síntoma? ____________________________

¨ Falta de gusto                              Cando comezou o síntoma? ____________________________

¨ Diarrea                                            Cando comezou o síntoma? ____________________________

Tivo contacto nas últimas 2 semanas

¨ cunha persoa con COVID19 confirmado

¨ cunha persoa en illamento por sospeita de infección por COVID19

Tipo de contacto:

Duración

Periodicidade

Distancia

Uso de máscara

Conviviu nas últimas 2 semanas

¨ cunha persoa con COVID19 confirmado

¨ cunha persoa en illamento por sospeita de infección por COVID19

O domingo 28 de xuño relizarase a actividade da TROCA DE LIBROS, Feira do libro usado, adiada polo Estado Alarma. Levade os vales e disfrutade do evento.

Con motivo do fin do curso o departamento de francés convoca un concurso para esta semana "Questions pour un champion" desde o luns 8 até o venres 12. Para máis detalles ver a imaxe. Moita sorte aos participantes

1.- NORMAS XERAIS

Dirixida ao alumnado do centro, que pode solicitar:

• ALUMADO DE 1º E 2º DE ESO: Só axudas para adquirir material escolar. Este alumnado non poderá solicitar a participación no fondo solidario de libros de texto xa que ao ser o noso centro un centro EDIXGAL todo o alumnado destes niveis teñe garantidos un mínimo de 6 libros dixitais gratuitos.
• ALUMADO DE 3º E 4º DE ESO: Participación no fondo solidario de libros de texto e/ou axudas para adquirir material escolar.

2.- OBRIGAS DAS PERSOAS BENEFICIARIAS

• Devolver os libros de texto recibidos do fondo solidario no curso 2019/2020. 
• Conservar en bo estado os libros de texto recibidos do fondo solidario no curso escolar 2020/2021.
• Destinar o importe do vale de material a adquirir o material escolar que necesite.

3.-PRESENTACIÓN DE SOLICITUDES

PRAZO: As solicitudes poderán facerse entre o 20 de maio e o 19 de xuño de 2020.

MODO: O solicitante será o pai/nai/titor legal do alumno.

• Presentación electrónica: unha solicitude por fillo/a.
• Presentación non electrónica: unha solicitude única para todos os fillos admitidos no mesmo centro docente

LUGAR: As solicitudes poderán facerse:

• Preferiblemente por vía electrónica nos formatos dispoñibles na aplicación fondolibros: https://www.edu.xunta.gal/fondolibros a través da sede electróncia da Xunta de Galicia.https://sede.xunta.gal.
• Presencialmente no centro docente no que estea admitido o alumno para o curso 2019-2020.
• Calquera dos lugares e rexistros establecidos na normativa reguladora do procedemento administrativo común.

FORMULARIO: (Anexo I) dispoñible:

• No portal educativo, http://www.edu.xunta.gal
• Nas dependencias das xefaturas territoriais da consellería.
• Na sede electrónica da Xunta de Galicia: https://sede.xunta.gal.

DOCUMENTACIÓN COMPLEMENTARIA:

Xunto coa solicitude haberá que entregar a seguinte documentación, referida á situación a 31 de decembro de 2018:

• Anexo II: comprobación de datos dos membros computables da unidade familiar.
• Copia do libro de familia onde figuren todos os membros computables.

Segundo a situación do alumno/a haberá que entregar outra documentación (sentencia xudicial de separación ou divorcio, documentación xustificativa da situación de violencia de xénero no ámbitofamiliar, resolución administrativa o xudicical que acredite a situación de acollimiento...).

4.- CALENDARIO DE APLICACIÓN

• Presentación de solicitudes: do 20 de maio ao 19 de xuño de 2020 (incluídos).
• Listaxes provisionais de admitidos e excluídos: 10 de xullo de 2020.
• Listaxes definitivas de admitidos e excluídos: 14 de setembro de 2020.
• Entrega de vales de material: do 16 ao 25 de setembro de 2020.
• Entrega de libros do fondo: do 16 ao 25 de setembro de 2020.

5.- LEXISLACIÓN APLICABLE

• Orde do 12 de maio de 2020 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostidos con fondos públicos, para o curso escolar 2020/21 (código de procedemento ED330B).

Informamos que nos seguintes cursos temos que realizar o proceso de baremación de solicitudes de admisión de alumnado para o curso 2020-2021

1º ESO

2º ESO

 O prazo de presentación de documentación xustificativa dos criterios do baremo é dende o 19 de maio ao 26 de maio de 2020 (ambos incluídos).

En cumprimento das instrucións da Consellería de Educación damos publicación nesta páxina (ademais de nas respectivas páxinas da AULA VIRTUAL) as adaptacións da programación didática, motivadas pola crise do COVID19, pra o terceiro trimestre. 

No DOG de hoxe, 6 de maio de 2020, sae publicada a RESOLUCIÓN da Secretaría Xeral Técnica da Consellería de Presidencia, Administracións Públicas e Xustiza, do 5 de maio, pola que se dá publicidade a diversos acordos do Centro de Coordinación Operativa da situación de emerxencia sanitaria no territorio da Comunidade Autónoma de Galicia (Cecop). 

Entre outros, o acordo sobre o RESTABLECEMENTO DO PROCEDEMENTO DE ADMISIÓN de alumnado do 2º ciclo de educación infantil, educación primaria, educación secundaria obrigatoria e bacharelato en centros docentes sostidos con fondos públicos para o curso académico 2020/21.

Os días habilitados para este procedemento serán desde o luns 11 de maio até o luns 18, ambos os dous incluídos em horário de 9’00 horas a 14’00 horas

NOTA: en vista das numerosas consultas lembramos que OS ALUMNOS DO CENTRO NON NECESITAN RESERVAR PRAZA para continuar cursando os seus estudos o próximo ano. Terán que matricularse nos primeiros días do mes de xullo, do que se dará cumprido aviso por este medio. 

Unha vez recibidas instrucións das autoridades educativas da Consellería, a dirección do centro, en coordinación cos xefes e xefas dos departamentos das diversas materias que se imparten no IES Torrente Ballester, acordou elaborar un cronograma para a realización telemática de probas para os alumnos que non teñan superado as materias pendentes por outros mecanismos establecidos polos departamentos. A concreción deste cronograma será publicado en próximos días.

As datas desas probas de materias pendentes de cursos anteriores estarán comprendidas entre os días 18, luns, e 29 de maio, venres para o alumnado da ESO e na semana do luns 25 ao venres 29 para o alumnado de 2º bacharelato.

Estimadas famílias

Na tarde de hoxe, venres 27 de marzo, recibimos instrucións da Consellaria de Educación para realizar a 2ª avaliación antes do 3 de abril (venres da próxima semana), data prevista antes do Estado de Alarma, con instrucións de non termos en conta a materia dada nin os exercícios feitos desde o día 16 de marzo.

Con esta decisión das autoridades, o profesorado vese na obriga de calcular a nota da avaliación (unha vez acordadas polos departamentos as rectificacións oportunas da programación no apartado de avaliación) co, mais ou menos abundante, material avaliábel do que se fixo no trimestre até o momento da Alarma.

Tamén será necesario revisar, nas respectivas programacións, o peso da nota da 2ª avaliación na nota final do curso, do que procuraremos informalos nun momento futuro, cando saibamos a que aternos respecto do confinamento e das datas para finalizar o curso.

Espero teñan em conta estas circunstancias para sopesar os resultados (tanto positiva como negativamente).

As notas serán remitadas o día tres, sempre que sexa posíbel, por ABALAR ás familias que estean dadas de alta e por correo electrónico para os que non estean en ABALAR e teñan deixado un correo para contactar. Noutro caso recomendo se poñan en contacto co tutor para, na medida do posíbel estabelecer un mecanismo (correo ordinário, p.ex.) para informalos das notas dos seus fillos.

Um saúdo e moito ánimo

NOTA INFORMATIVA

A consecuencia do ESTADO DE ALARMA decretado polo goberno de España (Real Decreto 463/2020 de 14 de marzo) o CENTRO PERMANECERÁ PECHADO a todos os efectos até o día 29 de marzo.

Porén os profesores do centro manterán a comunicación cos alumnos a través dos diversos sistemas informáticos dos que se dispón (abalar, aula virtual, correo electrónico e, nos casos en que xa existise comunicación previa, polos medios que se estiveran utilizando).

O Decreto citado determina que os prazos de solicitude de praza e matrícula ou calquera outro proceso administrativo fican adiados até a normalización da situación (en principio o prazo ampliarase unha semana despois da normalización da situación)

Para informacións doutra índole, de carácter urxente, poderán chamar por teléfono, entre as 10 e as 13 horas, ao número 886159156, por email ao correo ies.torrente.ballester@edu.xunta.gal ou a través da páxina web do centro.

En relación coa reserva de praza no noso centro, todo o alumnado dos centros adscritos ao IES Torrente Ballester que a solicitaron foi admitido. Lembramos ao alumnado e ás familias deste alumnado que no mes de xuño deberán formalizar a matrícula no centro no día ou días que se sinalen coa antelación suficiente. 

CALENDARIO DE ADMISIÓN para o próximo curso 2020-21

Presentación de solicitudes de admisión de novos alumnos

a)    

PRAZO: do 1 ao 20 de marzo

b)    

PROCEDEMENTO:

a.    

Presencial (nas oficinas do centro que se solicita en primeiro lugar (de facerse en máis de un perderíase o dereito de prioridade)

b.    

A través de sede electrónica: http://www.edu.xunta.es/admisiónalumnado

c)    

DOCUMENTACIÓN:

a.    

Copia do DNI da persoa solicitante e dos membros computables da unidade familiar (cando denegue consulta)

b.    

Documento acreditativo da idade da alumna ou alumno

c.     

Documento acreditativo dos requisitos académico exixidos en cada nivel educativo

d.    

Se é o caso, convenio regulador do divorcio ou separación

Prazas vacantes no IES Torrente Ballester para o próximo curso 2020-21

O centro publicará listaxes provisionais de admitidos/non admitidos antes do 25 de abril e definitivos antes do 15 de maio

Para a consulta do estado do procedemento de tramitación as familias poden consultar na web http://www.edu.xunta.es/admisiónalumnado

FORMALIZACIÓN DE MATRÍCULA

Para conservar o dereito á praza solicitada, os alumnos deberán formalizar a matrícula nos prazos que seguen:

a)    

Prazo ordinario: 25 de xuño ao 10 de xullo

b)   

Prazo extraordinario (alumnos con pendentes de xuño): 1 ao 10 de setembro

Estimadas familias:
Ante as últimas novas sobre a evolución do 2019-nCoV (Coronavirus) en Italia, convocámolas a unha reunión de urxencia que terá lugar mañá venres 28 de febreiro ás 20:00 horas no salón de actos do IES Gonzalo Torrente Ballester.
Nesta reunión abordaranse as distintas alternativas que se poden adoptar e tomarase unha decisión consensuada.

Para todo o alumnado que vai participar na viaxe de estudos a Roma é recomendable que tramiten a solicitude da Tarxeta Sanitaria Europea. O procedemento é moi sinxelo e chega nuns 10 días.

Para solicitala poden visitar a seguinte páxina ou no teléfono 901-166-565

Próximos xa á realización da viaxe de estudos a Roma, compre asegurarse de que contamos con toda a documentación necesaria. Tal como se especifica na web do Ministerio do Interior deben cumprirse dous requisitos indispensables:

• Todos os menores españois deberán levar o seu DNI en vigor para viaxar fose do territorio nacional, e dentro da Unión Europea, o Espazo Económico Europeo e a Confederación  Helvética, ou o seu Pasaporte en vigor se viaxa fóra dos devanditos territorios (terceiros Estados).

• Os menores de 18 anos españois que vaian viaxar ao estranxeiro, non acompañados de calquera dos seus representantes legais (proxenitores ou titor/é), precisarán ademais do DNI ou Pasaporte en vigor, unha declaración asinada de permiso de viaxe fóra do territorio nacional.  Para a súa formalización deberá comparecer nunha Comisaría de Policía Nacional ou nun Posto da Garda Civil. Unicamente é necesaria a comparecencia dun dos representantes legais do menor, sempre que posúa a potestade, a capacidade legal oportuna e o consentimento do outro proxenitor, e no seu caso, o dos terceiros dos que facilita datos. Para a comprobación da súa identidade, debe levar consigo un documento de identidade en vigor (DNI ou pasaporte) e a documentación que acredite a filiación e patria potestade do menor (DNI, pasaporte, libro de familia, etc.).

Poden descargar o formulario premendo no título desta entrada ou en:

• Garda Civil https://www.guardiacivil.es/es/servicios/Procedimientos_administrativos/Permiso_para_salida_de_menores_al_extranjero.html

• Policía Nacional https://sede.policia.gob.es/portalCiudadano/sede/inf_documentos_viaje.html

DATA LÍMITE DE ENTREGA NO CENTRO: 28 DE FEBREIRO

O alumnado e o claustro de profesorado do IES Gonzalo Torrente Ballester quérenlles desexar unhas boas festas e un feliz Nadal.

No IES Sánchez Cantón de Pontevedra, o próximo dia 14 novembro, xoves, ás 18'30 horas psicóloga Rocío Ramos-Paúl pronunciará unha conferencia co título de "La difícil tarea de educar hoy"