2015/2016

O vindeiro luns 20 de xuño teremos a última reunión do club deste curso. Nela charlaremos sobre o libro de Ledicia Costas: "O corazón de Xúpiter"

.

O xoves 31 de marzo reunímonos os membros do club para falar do libro de Eduardo Mendoza, El secreto de la modelo extraviada.

Estivemos de acordo en que a narración é por veces máis que divertida, difícil quedar á marxe e non ceibar a gargallada ante certas pasaxes, as intrigas que se sucéden  puxan pola lectura. O disparate e, por veces, o absurdo impregnan a obra e crean un estilo que os máis dos membros do club gabaron, algún fala de exceso.

Foi comentado o valor simbólico do nome dalgúns personaxes : señorita Westinghouse, Cándida…; a trama resulta divertida, pero tamén se deixa ver un pouso de denuncia social, contrasta ao longo da novela a presenza de seres marxinais nunha Barcelona caótica xunto a unha alta sociedade vacía moralmente.

Diversión pois nesta escolla.

.

O xoves 28 reunímonos arredor do noso xa tradicional chocolate para falarmos do libro La mecánica del corazón, de Mathias Malzieu.

Coincidiron todos os membros do club en que fora unha obra moi do seu gusto, coa que disfrutaron lendo, e coa que reflexionaron sobre os valores de respecto aos demais, de solidariedade, amor…

Destacaron o personaxe principal por amar ata tal punto que fai sufrir ao seu particular corazón, así como a profundidade doutros personaxes que percorren as páxinas do libro: as prostitutas, a doutora, o inventor do cine, etc., que pese a pertenceren a ambientes marxinais e levaren unha  vida distinta, están cheos de humanidade, sensibilidade e tenrura.

Claudia e Rocío comentan o libro no seguinte vídeo:

.

O, 26 de novembro, durante o recreo, o club de lectura “Quiosco Cocó” reuniuse arredor da nosa tradicional chocolatada para falar sobre a obra elixida para esta primeira xuntanza, Escarlatina, a cociñeira defunta, de Ledicia Costas.

A obra foi do gusto de todos os presentes, que comentaron aspectos destacables, como a tenrura coa que está tratada a protagonista do libro, a pequena Escarlatina, así como o aspecto gastronómico do libro, que seica incitou a algún a poñer mans á obra nas cociñas das súas casas para ensaiar algunha das receitas de Román.

Tamén se falou da morte, tema tratado con naturalidade e incluso con comicidade, e que a alguén lle evocaba outras obras da literatura galega como Memorias dun esquelete, de Castelao.

E, como algún dos rapaces xa leran o libro, decidiron ler tamén outra obra da autora, O corazón de Xúpiter, polo que esta obra  tamén foi obxecto de comentario.  Como pode verse, a reunión foi do máis completa e interesante.

En resumo, quedamos satisfeitos co chocolate e as galletas, pero quedamos con ganas de ler máis. Así que a semana que vén temos una xuntanza para decidirmos, tras escoitar as propostas que se traían, cal será a vindeira obra para o noso “Quiosco Cocó”