Co motivo da celebración do Día das Letras Galegas, organizamos no noso centro unha serie de actividades moi variadas, nas que puido participar toda a nosa comunidade educativa, con diferentes actos que se foron desenvolvendo ao longo destes días:

• Correlingua
• Exposición de libros e carteis
• Mostra de letras e violino doces
• Concurso Rosco arredor de Luísa Villalta
• Contacontos a cargo do voluntariado da nosa biblioteca, unha adaptación do conto Violino, Inglesa e o libro xigante dirixido ao público infantil dos colexios públicos de Sarria (Escola Xela Arias e o Colexio Frei Luis de Granada).
• Saída ao Camiño de Santiago do alumnado de ciclos para espallar versos, verbas e xestas entre os peregrinos, agasallándoos cunha postal de Luísa Villalta e cun ramillo de xesta, flor típica da nosa terra. 

Tedes máis información e fotos das actividades no Instragam da Biblioteca e no blog da Biblioteca Fiz Vergara Vilariño: Contacontos Luisa Villalta, Rosco Luísa Villalta e Espallando versos, verbas e xestas no Camiño.

O mércores 8 de maio, o noso grupo de 1º ESO trasladouse ata Lugo para celebrar o Correlingua, unha festa na que nos xuntamos dezaseis centros de Lugo e da súa comarca para animar e reivindicar o uso da nosa lingua entre a xuventude en tódolos seus ámbitos, non só no escolar, co lema Dende aquí até acolá,  galego xa!

Podedes acceder ao seguinte álbum Correlingua 2024 para ver as fotos da actividade.

Seguimos no noso centro educativo con máis actividades para conmemorar o Día do Libro:

• Organizouse un obradoiro para facer libros en miniatura durante varios días no tempo de lecer no que os interesados/as crearon os seus libriños personalizados.
• Houbo unha mostra de libros antigos na entrada do edificio principal.
• Montouse un tendal con recomendacións literarias feitas polo noso alumnado.

Tedes información máis detallada no Blog da Biblioteca Fiz Vergara Vilariño, onde atoparedes tamén fotos e algún vídeo.

O mércores 3 de abril comezamos coas actividades que se están a desenvolver neste mes para celebrar o Día do Libro. Contamos coa presenza de María da Pontragha, quen co espectáculo "Contos de vellxs punkies para encarreirar á mocedá", nos achegou unha morea de contos que nos arrincaron máis dun sorriso e nos demostraron a grande sabiduría dos nosos avós e a importancia de seguir conservando a narración oral.

O 21 de marzo celebramos na Praza da Vila de Sarria o Día da poesía Eduardo Rey Moure adicado á amizade, con moito sentimento e con moita poesía. Foi unha edición moi especial para o noso centro, porque a partir de agora vai levar o nome do que foi o impulsor desta iniciativa, o noso grande compañeiro Eduardo, quen durante moitos anos foi compañeiro e amigo de todos nós. Fomos 13 centros da comarca de Sarria os que participamos nesta xornada, na que compartimos poemas que versan sobre a amizade de moi diferentes autores. O acto estivo dirixido por Xurxo Souto, amigo e excompañeiro do IES Gregorio Fernández, o noso centro foi o organizador deste acto e contamos coa colaboración do Concello de Sarria. Animávosvos a ler a noticia no Progreso Versos de amizade na honra de Eduardo Rey Moure. Tedes máis fotos e vídeos no Instagram da Biblioteca Fiz Vergara Vilariño e no seguinte álbum Día da poesía 2024.

Durante esta semana,  no noso centro celebráronse unha serie de actividades co gallo do 8 de Marzo: o concurso Bolboretas pola Igualdade, a proxección de curtametraxes e temas musicais relacionados con esta temática e unha exposición de libros e filmes, para profundizar e valorar o papel da muller ao longo da historia.

Ademais, o xoves achegáronse ao instituto tres mulleres de referencia da nosa contorna: Chelo de Gandeiría Quintián (O Páramo), Laura de Rural o Urbano (Paradela) e Benedicta Sánchez (O Corgo) para participar na Xornada Mulleres da nosa contorna, na que compartiron a súa experiencia como emprendedoras no mundo rural, no caso de Chelo e Laura, e para escoitar as vivencias dunha muller que tivo que emigrar a Brasil, que volveu á súa terra meiga e mesmo foi quen de conquistar moitos corazóns coa súa interpretación na película O que arde, gañadora dun Goya e da medalla Castelao pola súa contribución a poñer en valor a cultura galega e o galego en calquera lugar do mundo. Tamén se sentaron diante dos micros da nosa radio, Radio Bolboreta, e responderon unha serie de preguntas formuladas por un grupiño de alumnas con total sinceridade e espontaneidade.

O noso agradecemento a estas grandes mulleres pola súa participación e achega á nosa comunidade educativa: educación en valores, paixón pola lectura, emprendemento, valor do rural, afouteza, cooperación, equipo... e que  promoven a igualdade de oportunidades na nosa sociedade. 

Animádevos a ler a reseña do blog da nosa biblioteca Fiz Vergara Vilariño, na que se recolle algunha das frases que escoitamos durante a xornada! En breve, poderedes escoitar o programa en Radio Bolboreta...

Chegou o entroido e no noso IES celebrouse esta festa cun concurso de disfraces dirixido a toda a comunidade educativa, no que se valoraba especialmente a orixinalidade e o uso de materiais de refugallo para a elaboración dos disfraces. Houbo premios para as diferentes categorías que participaron, e sobre todo, houbo moito inxenio, animación, colaboración e ganas de troula por parte dos participantes (alumnado de diferentes cursos e tamén profesorado).

Parabéns a todos e viva o entroido!

O mércores 20 de decembro, un grupo de alumnos e alumnas do noso centro achegáronse a Residencia de Persoas Maiores de Sarria para facer entrega das postais realizadas polo alumnado de Formación Profesional das familias de Administración, Mantemento e Mecanizado e da ESA. Acolléronnos con moito agarimo e agradecemento por dita visita e compartimos sorrisos, abrazos e mesmo consellos para a vida que foron toda unha lección maxistral, sen dúbida, unha experiencia para volver repetir. Grazas á nosa xente maior que tanto nos deu e tanto nos segue a dar!

Durante todo o mes de novembro, celebramos no noso centro educativo o Mes da Ciencia en Galego. Foi unha iniciativa xurdida desde o Departamento de Tecnoloxía e na que o Equipo de Dinamización da Lingua galega (EDLG) e a Biblioteca traballamos en conxunto para que todos os xoves deste mes durante o recreo, alumnado e profesorado de diferentes departamentos compartiran coa comunidade educativa coñecementos científicos a través de retos, experimentos, xogos, mostras... 

Os Departamentos que participaron nestas xornadas foron o de Tecnoloxía, Física e Química, Matemáticas, Bioloxía e Mantemento/Mecanizado. Se accededes ao seguinte álbum podedes ver fotos das diferentes xornadas do Mes da Ciencia en Galego no Gregorio.

Mes da Ciencia en Galego no Gregorio 

O xoves 30 de novembro, na biblioteca do noso centro celebrouse a presentación do libro "A Paradela dos máis novos" e lembrouse con moito agarimo o traballo realizado polo noso benquerido compañeiro Eduardo Rey Moure, que foi o coordinador dos traballos aportados polos alumnos/as de Paradela do noso centro.

Asistiron ao acto o alcalde de Paradela, José Manuel Mato, a Secretaria da Delegación Territorial en Lugo da Xunta de Galicia, Marta Barreiro, o xornalista e escritor Xulio Xiz, Lola Chaos como coordinadora dos traballos realizados polo alumnado do IES Xograr Afonso Gómez e Ana Isabel López Valín, coordinadora do EDLG do noso centro. Ademais, achegáronse á biblioteca moitos dos alumnos e alumnas que colaboraron na creación deste fermoso libro, algúns deles procedentes do IES Xograr. Compartiron cos asistentes a súa experiencia neste proxecto, leron algún texto do libro e lembraron con moito afecto a dedicación ao que fora o seu profesor e impulsor neste proxecto, Eduardo. Foi un acto moi emotivo, de agradecemento, de recordos e de posta en valor do patrimonio cultural, turístico, de lecer... do concello de Paradela.