Mariñeiro de ponte
Mariñeiro/a de ponte
ATRIBUCIÓNS
- Formar parte da garda de navegación en buques mercantes de arqueo bruto igual ou superior a 500 GT con excepción dos buques pesqueiros, desenvolvendo as competencias propias, a nivel de apoio, nas funcións de navegación de conformidade co previsto no cadro A-II/4 do Código de Formación.
- Goberno de embarcacións con fins comerciais de menos de 10 metros de eslora, a condición de que non transporten máis de 12 pasaxeiros, operen exclusivamente dentro de augas interiores e teñan unha potencia adecuada á embarcación, se acreditan realizar un período de embarque non inferior a 6 meses realizando servizos profesionais, como mariñeiro de ponte e fosen habilitados polos órganos periféricos da Dirección Xeral da Mariña Mercante.
CONDICIÓNS PARA A OBTENCIÓN DO CERTIFICADO DE SUFICIENCIA
- estar en posesión dun certificado emitido por un centro de formación acreditativo de ter superado satisfactoriamente o curso do Certificado de suficiencia de mariñeiro de ponte da mariña mercante.
- un período de embarque non inferior a 2 meses en buques mercantes ou de pesca realizando servizos profesionais relacionados coa garda de navegación, baixo a supervisión directa do capitán, do oficial encargado da garda de navegación ou dun mariñeiro cualificado.
- certificado médico do Instituto Social da Mariña acreditativo da aptitude física.
CONVALIDACIÓN
Poderán solicitar a convalidación polo certificado de suficiencia de mariñeiro de ponte da mariña mercante, quen achegue a documentación de conformidade coa Orde do 21 de xuño de 2001 e cumpran unha das seguintes condicións:
a) Estar en posesión do cartón de competencia de mariñeiro ou mariñeiro-mecánico, ter en vigor o certificado de suficiencia de formación básica en seguridade e realizar un período de embarque de polo menos 6 meses no servizo de ponte nun buque civil.
b) Estar en posesión dun certificado emitido por un centro de formación oficial que acredite que o alumno recibiu satisfactoriamente formación de acordo ás Seccións A-II/4 e A-VI/1 do Código de Formación do Convenio STCW.
DOCUMENTACIÓN NECESARIA PARA A MATRÍCULA
As persoas candidatas interesadas no curso de mariñeiro/a de ponte achegarán a seguinte documentación para realizar a matrícula:
- Modelo de solicitude. Descargue a solicitude AQUÍ.
- Copia do DNI/NIE polas dúas caras.
- Copia compulsada do certificado de formación básica
As solicitudes deberán presentarse:
- nos centros oficiais de ensino pesqueiro onde se examinen os/as aspirantes, ou
- por calquera dos medios establecidos no artigo 16.4 da Lei 39/2015, do 1 de outubro, do procedemento administrativo común.
IMPORTANTE: Con anterioridade á formalización da matrícula, as persoas interesadas informaranse nas secretarías dos centros para coñecer as datas dispoñibles de realización do curso.
PROGRAMA: MÓDULOS FORMATIVOS E TEMPORALIZACIÓN SOBRE OS COÑECEMENTOS TEÓRICO-PRÁCTICOS
Competencias, coñecementos e aptitudes (duración mínima 45 h) e probas prácticas mínimas para avaliar a competencia (duración mínima de 25 h).
1.1.1. Goberno do buque e cumprir as ordes ao temoneiro en inglés, 15 h.
- Utilización do compás magnético e do virocompás. Ordes en español e en inglés ao temoneiro. Paso do goberno manual ao piloto automático e viceversa.
1.1.2. Prácticas e avaliación de cada alumno, 7 h:
- Utilización dos compases magnético e virocompás. Exercicios prácticos e avaliación a bordo no mantemento co temón dun rumbo sostido, tanto co compás magnético como coa vgiroscópica e con diferentes réximes de máquina. Exercicios prácticos e avaliación a bordo de cambios de rumbo. Exercicios prácticos e avaliación a bordo da comprensión e acuse de recibo das ordes ao temoneiro segundo as boas prácticas mariñeiras. Exercicios prácticos e avaliación a bordo do cambio de goberno manual a automático e viceversa.
1.2.1. Mantemento dun servizo de vixía adecuado utilizando a vista e o oído, 10 h.
- Responsabilidades do vixía, incluída a notificación da demora e/ou marcación aproximada de sinais acústicos, luces ou outros obxectos ou avistamentos, en graos ou cuartas. Regulamento Internacional para a prevención de abordaxes. Código Internacional de Sinais. Sinais acústicos, luces e outros obxectos.
1.2.2. Prácticas e avaliación de cada alumno, 6 h:
- Práctica e avaliación a bordo ou en simulador da detección e recoñecemento de sinais acústicos, luces, outros obxectos e avistamentos, así como da notificación da demora e/ou marcación dos mesmos.
- Práctica e avaliación dos principios xerais do Regulamento Internacional para a Prevención de Abordaxes.
1.3.1. Contribuír á vixilancia e o control dunha garda segura. (Duración mínima 10 h).
- Nomenclatura ou definicións de a bordo con especial atención ás da ponte de goberno e cuberta. Utilización dos sistemas de comunicacións internas a bordo e de alarma. Comprensión das ordes e comunicación co oficial de garda sobre os aspectos relacionados coa garda. Procedementos da garda, entrega e substitución da mesma.
- Información necesaria para realizar unha garda segura.
- Procedementos básicos de protección ambiental.
1.3.2. Prácticas e avaliación de cada alumno, 6 h:
- A avaliación dos coñecementos e comprensión deste módulo farase de forma teórica e práctica polo centro de formación marítima correspondente durante o curso.
- A avaliación práctica tamén se realizará a bordo do buque onde se realice o período de embarque e que se acreditará mediante o certificado emitido polo Capitán.
1.4.1. Utilizar o equipo de emerxencia e aplicar procedementos de emerxencia. (Duración mínima 10 h).
- Coñecemento dos deberes en caso de emerxencia e dos sinais de alarma. Coñecemento dos sinais pirotécnicos de socorro; RLS por satélite e RESAR. Precaucións para evitar falsas alertas de socorro e medidas a tomar no caso de que se activen accidentalmente.
1.4.2. Prácticas e avaliación de cada alumno, 6 h:
- Exercicios prácticos e avaliación dos coñecementos teóricos sobre situacións de emerxencia, socorro e sinais de alarma.
- Así mesmo, avaliaranse estes coñecementos durante o período de embarque e que se acreditará mediante o certificado emitido polo Capitán.
NORMATIVA
* Orde do 21 de xuño de 2001 sobre cartóns profesionais da Mariña Mercante
