O luns 9 de xaneiro o grupo de 2º da ESO visitou a Torre de Castroverde coa profesora de Xeografía e Historia na primeira hora de clase. Visitamos a praza do rolo e imaxinamos o ambiente que podería haber na Idade Media, así como o trazado das rúas medievais. Observamos pedras con inscricións que pertenceron ao antigo castelo medieval e visitamos a Torre, recoñecéndoa como parte dun castelo que ocuparía a superficie de dous campos de futbol de primeira división e que tería dúas murallas, un foxo, a súa ponte levadiza, alxibe, capela, hospital de peregriños e cemiterio, así como dous patios: un de armas e outro de honra. Estudamos porque as portas está a esa altura, que habería en cada un dos 5 andares, identificamos o escudo dos Castro e especulamos sobre a figura esculpida sobre a porta que semella un gaiteiro, pero que probablemente se trate dun guerreiro. Analiamos a función do matacán da parte superior da torre, a importancia de estar situado o castelo a unha certa altitude e a importancia das familias propietarias deste Castelo durante a Idade Media. Por último estudamos o cambio das seteiras ao tipo de bola e cruz adaptado ás armas de fogo que se inventaron xa no cambio á Idade Moderna e o deterioro e estado de mala conservación do noso patrimonio.

Do 30 de novembro ao 7 de Decembro, conmemórase o Día da Constitución e do Estatuto de Autonomía de Galicia nos centros escolares. Os grupos de 3º e 4º da ESO recibiron formación, dentro da materia de Xeografía e Historia, sobre o  que é unha constitución, cando comezaron a redactarse e porqué e sobre a aprobación da Constitución Española na transición. Durante varias sesións, deseñaron un escape room: o grupo de 4º deseñouno para o de 3º e viceversa. Ambos grupos escolleron como fío condutor un secuestro do grupo terrorista ETA. Aínda que un escape room é un xogo e ten ese carácter lúdico, o tema do terrorismo tratouse de forma seria na aula, como require esta terrible lacra que padeceu o pobo español, incluíndo a visualización de noticias da época como o terrorífico atentado en Hipercor.

Este tipo de dinámicas educativas fomenta a aprendizaxe por descubrimento e combina a aprendizaxe de conceptos e a adquisición de diversas competencias como a dixital (deseñaron presentacións moi elaboradas en Genially, por exemplo), a competencia persoal, social e de aprender a aprender, a lingüística (estudaron o modo de expresarse do grupo terrorista nos seus comunicados, diversos artigos da Constitución Española, traduciron frases ao euskera...), competencia cidadá, competencia emprendedora  e incluso  algunha noción de costura para a realización dos disfraces.

Este é un dos geniallys que deseñou o alumnado de 3º e 4º da ESO para o escape room que realizaron do día 7 de decembro. No primeiro cadeado a clave é 104, que é o artigo da Constitución ao que fai referencia a imaxe. A data da segunda constitución redatada no mundo é 1791, data da primeira constitución francesa. A última clave é o día que se conmemora cada ano a Constitución: 0612. O genially completábase con pistas repartidas pola aula.

https://view.genial.ly/6388783edf2e9600181cfb11/presentation-presentacion-digital-basica