Skip to Content

ESO

Dancemos contra a guerra

Ven, 2023-11-10 13:33 — secretaria

O alumnado de 4º da ESO quixo participar no III Certame Coreografíate da AS-PG, evento organizado e xestionado pola Asociación Socio-Pedagóxica Galega, nun apoio a música realizada en galego como forma de divulgación da lingua e música galega.
Neste caso escolleron e presentáronse a este concurso, cun tema musical de Fillas de Cassandra, LISÍSTRATA (varre vasoira).
Animámosvos a botarlle unha ollada a esta marabillosa coreografía, “DANCEMOS CONTRA A GUERRA”.
Desexámoslle moita sorte!

Saída Á Coruña. 1º ESO

Ven, 2023-11-10 04:28 — secretaria

O pasado martes día 7 de novembro o alumnado de 1º ESO realizou unha saída á cidade da Coruña para participar en tres actividades relacionadas coas materias de Tecnoloxía, Lingua Galega e Literatura e Bioloxía e Xeoloxía. Pola mañá, asistiu na fundación de Abanca a unha obra de teatro sobre o acoso escolar cun coloquio posterior. A continuación, no Aquarium Finisterrae realizou un obradoiro sobre as focas que crían nel e visitou as súas instalacións. Finalmente, despois de xantar, acudiu ao MUNCIT para realizar un obradoiro sobre electrónica e percorrer posteriormente o museo acompañado por un guía. Foi unha xornada moi aproveitada na que aprenderon e disfrutaron moito.

Álbum: Curso 23-24 -> Saída Museos Científicos 1º ESO

Scape room terrorífico

Ven, 2023-11-03 03:40 — secretaria

O martes 31 de outubro o alumnado da ESO foi encerrado no centro e tivo que superar un terrorífico SCAPE ROOM para poder saír.

Dividíronse en dez equipos formados por alumnos e alumnas dos diferentes cursos. O obxectivo era superar probas de distintos ámbitos (linguas, científicas, artísticas, deportivas) coas que acadar bonificacións e conseguir puntos para lograr que o gardián da entrada lles permitise a saída.

Ao final ninguén quedou a durmir e foi unha entretida tarde onde non faltou a diversión, ademais foron premiados os tres equipos que conseguiron máis puntos.



Álbum: Curso 23-24 -> Scape room

Vísita ao rádar meteorolóxico do monte Xesteiras

Xov, 2023-10-05 03:02 — secretaria

Un curso máis, o pasado xoves 28 de setembro visitamos o rádar meteorolóxico do Monte Xesteiras (Cuntis). Trátase dun roteiro lineal de sendeirismo que atravesa o monte por unha pista desde Magán (Cuntis) ata o rádar, e logo volve de regreso ata o punto de partida. Unha vez no rádar, percorremos co alumnado de 4º ESO as súas instalacións e os técnicos de MeteoGalicia explicáronnos o seu funcionamento e a información que nos achega para elaborar a predición meteorolóxica.

Álbum: Curso 23-24 -> Visita ao rádar Metereolóxico do Monte Xesteiras

Inspección de Outono do río Gallo

Xov, 2023-10-05 02:44 — secretaria

 O pasado martes 26 de novembro o alumnado de 1º ESO B realizou unha saída ao río Gallo para coñecer o seu "estado de saúde".

 Acompañados pola profesora de Bioloxía e Xeoloxía e por Paco Brañobre, o educador ambiental da asociación ecoloxista ADEGA, que é a que coordina o Proxecto Ríos, analizaron diferentes parámetros: características físico-químicas (ph,nitratos,..), a flora, fauna (presencia de macroinvertebrados), o caudal, os impactos medioambientais, etc. que determinaron que a calidade da auga do río é boa.

Álbum: Curso 23-24 -> Inspección do Río Gallo

Xornada de Convivencia do Equipo de Mediación

Lun, 2023-10-02 05:25 — secretaria

O pasado martes, 26 de setembro,  o alumnado pertencente ao Equipo de Mediación Escolar participou nunha xornada de convivencia na ría de Aldán.
Co obxectivo de cohesionar o equipo e iniciar a  formación neste curso 2023-2024 realizamos unha andaina desde o Bosque Encantado ata o miradoiro Balcón do rei, onde puidemos contemplar a ría de Vigo.
Desfrutamos dun fermoso día na costa e volvemos con moitas ganas de traballar neste curso que iniciamos.

Álbum: Curso 23-24 -> Xornada de Convivencia Mediación

Graduación 4º ESO

Mér, 2023-06-21 16:20 — secretaria

O pasado 20 de xuño fixemos un pequeno acto de despedida e recoñecemento para o noso alumnado de 4ºESO. Deixa o centro para comezar unha nova etapa da súa vida despois de trece anos compartíndoa connosco. A madriña do acto foi a profesora de inglés Dolores Sánchez González e actuaron como presentadoras do acto as profes Silvia Diéguez e Alba Márquez.

Desde o CPI Aurelio Marcelino desexamos que todo vos vaia moi ben na vida.

Álbum: Curso 22-23 -> Graduación 4º ESO

Xornada de Badminton (3º e 4º da ESO)

Mér, 2023-05-24 12:09 — secretaria

O martes 23 de maio o alumnado de 3º e 4º da ESO participou nunha xornada con alumnado do IES nº1, IES Manuel García Barros e do Colexio Nosa de Lourdes de A Estrada que xirou arredor do deporte do badminton.

Esta xornada está enmarcada dentro do programa XOGADE de deporte escolar e foi organizada pola Agrupación Deportiva Escolar de A Estrada.

Podedes ver algunhas fotos da xornada abaixo.

 

Álbum: Curso 22-23 -> Badminton XOGADE ESO

SPRINGWEEK. 3º ESO

Mér, 2023-05-24 12:05 — secretaria

Nervios, alegría, entusiasmo, incertidume…o pasado domingo 30 de abril, a rapazada de 3ºESO partíu rumbo Os Peares cheos de emocións. Diante tiñan unha aventura de 7 días de inmersión lingüística xunto a mozas e mozos de diferentes centros educativos da comunidade galega, guiados por instrutores de moi diversas nacionalidades. O río Sil e o Miño foron os testigos dunha intensa pero gratificante aventura, con milleiros de actividades e proxectos en inglés. Logo de compartir tantas vivencias con xente de todas os currunchos de Galicia e do mundo, a despedida fíxose dura. O sábado 6 de maio tocou voltar para o pobo, coa amargura de decir adeus, pero co corazón cheo de ledicia por todo o vivido e coa promesa dun novo reencontro con toda esa xente que fixo desta experiencia un recordo inesquecible.

Se queredes ver as fotos desta actividade podedes entrar na seguinte ligazón, introducindo a contrasinal que foi enviada aos participantes da actividade: https://centropeares.es/spring-week-quenda-3

 

Premios Videopoemas

Lun, 2023-05-22 11:03 — secretaria

Na foto podedes ver todas as persoas finalistas do Concurso de videopoemas da Casa museo de Manuel María en Outeiro de Rei (Lugo), a onde fomos o sábado 13 de maio de 2023.
Están acompañados do xurado do certame, á esauerda na parte superior, o realizador Omar Rabuñal Varela, o profesor e guionista Eduardo Álvarez González e a profesora e guionista Anxa G. Refoxo.
Na seguinte ligazón podedes ver a noticia relacionada co evento:
http://www.casamuseomanuelmaria.gal/portada.htm;jsessionid=80DAEAAE482889F18E47A25213183A37

Distribuir contido


by Dr. Radut