VOZ NATURA

Voz Natura é o programa de educación ambiental de La Voz de Galicia desenvolvido pola Fundación Santiago Rey Fernández-Latorre desde o curso 1997/1998. O seu obxectivo é concienciar e implicar á comunidade escolar de Galicia na recuperación e defensa da natureza.

Desde a súa posta en marcha, os equipos participantes -integrados por estudantes e profesores- executaron máis de 6.000 proxectos por toda a xeografía galega. Para iso, contan co asesoramento dun comité científico que, ao final da edición, recoñece os mellores traballos coa concesión do gran premio Galicia, os galardóns provinciais e o recoñecemento ao mellor proxecto infantil.

Para pór en valor o traballo do profesorado, a Consellería de Cultura, Educación, Formación Profesional e Universidade, a través da Dirección Xeral de Ordenación e Innovación Educativa, recoñece a coordinación dun proxecto Voz Natura como unha actividade de innovación educativa, co seu correspondente equivalencia como formación permanente do profesorado.