O alumnado de 5º e 6º de Primaria do noso centro foi recibido polas persoas responsables do Servizo de Normalización Lingüística da Universidade de Santiago de Compostela.

Máis de 50 nenos e nenas do CEIP López Ferreiro, desprazáronse ata o SNL, no Campus Sur.

Quixeron presentarlles a última fase da campaña fai un trato co galego! Aquí atendemos en galego. Tamén lles achegaron o adhesivo co que premiamos a quen se compromete co noso idioma.

Manuel N. Singala, Xusto Rodríguez e Manuel Bermúdez interesáronse polo traballo que levamos a cabo no centro, pola opinión que a nosa campaña lles merecía e a súa utilidade. Animaron a esta rapazada a seguir desenvolvéndose en galego. 

Agasalláronnos cunhas bolsas dunha iniciativa deste Servizo: Témoslle LEI.

Queremos presentarvos o Catálogo de Xogos que elaboramos este curso, no marco do Proxecto de innovación educativa en dinamización lingüística (Proxecta+) que estamos a desenvolver.  É unha guía dixital de enredos, un traballo no que participaron todos os ciclos do centro e que amosan que nesta escola se xoga en galego. Esta proposta realizouse grazas á colaboración do Equipo de Plan Dixital e recorreuse, maioritariamente, ao Libro da Memoria, elaborado polas aulas Maruxa e Coralia.

Animádevos a botar man deles, estes xogos forman parte da cultura que nos é propia! Premede na imaxe para acceder.

No mes no que se celebra o Día do libro, a biblioteca Helena Villar quixo renderlle  unha homenaxe con variadas formas de lectura (e de escritura).

Así, o 3 de abril compartimos con Marisa Irimia contos que viñan do Vietnam, do Chad e de Noruega. Presentounos mediante  a técnica do kamishibai, e foi todo un éxito do que gozaron as familias e a cativada para celebrar o Día Internacional do Libro Infantil e Xuvenil.

En horario lectivo, o alumnado de 5º explorou con Charo Pita as Xeografías máxicas da Península Ibérica, coas que pronto se compoñerá un podcast no que se dará a coñecer as figuras míticas ligadas a determinados lugares ou accidentes xeográficos e as súas historias.

Tamén o alumnado de educación infantil participou da biblioteca creativa, mediante o obradoiro Borranchobot: descubrindo  a electricidade  a través da arte, co que aprenderon o funcionamento dos circuítos eléctricos elaborando unha creación artística en equipo ao tempo que exploraron as posibilidades dos circuítos.

E os Encontros lectores continuaron as súas xuntanzas, nas que, ademais, recibimos a visita de Alba Míguez e Damián Gómez, autores de Os vagalumes de Marí, un dos títulos seleccionados. As nenas e os nenos, así como as súas familias, intercambiaron impresións e mesmo levaron tatuaxes creados por Alba e Damián.

E o día 30, entregáronse os premios do concurso de poesía “Versos que flotan” e do “Concurso de portadas coas familias”. Emoción e nervios polo recoñecemento a un traballo que xoga coa beleza das palabras e coas emocións que as historias lidas nos transmiten.

En resumo, na época da alfabetización múltiple, diferentes formas de ler na biblioteca Helena Villar do CEIP López Ferreiro.

Todas estas actividades desenvolvéronse grazas á dotación económica do PLAMBE, así como aos programas de Lectura e familias, Club de lectura, Radio na biblio e Biblioteca creativa, nos que o centro tamén participa.

O pasado 21 de marzo levamos a cabo unha actividade de concienciación sobre a importancia da auga para o planeta.

É unha actividade que se realiza en moitos colexios de distintos países, a longo do mapa. Participamos na actividade por invitación do colexio co que temos o intercambio en Lingua Inglesa, Petite École de Paris, de Brest, que nos visitará en breve.

Deixamos imaxes dos traballos realizados polo noso alumnado de 6º e imaxes dos traballos realizados por distintos cursos do colexio bretón.

O enlace á páxina onde podedes informarvos máis sobre o tema é https://www.lagrandelessive.net/avec-ou-sans-eau/

Para o desenvolvemento do Proxecto de innovación educativa en dinamización lingüística, que estamos a levar a cabo, o Equipo de Dinamización da Lingua Galega creou unha conta de Instagram:@edlglopezferreiro. Nesta conta estanse a subir os apoios das familias do alumnado do Equipo 21 e doutras persoas significativas que colaboran, desde os seus inicios, hai dous cursos, coa nosa campaña Fai un trato co galego!

Animámosvos a sumarvos a esta iniciativa remitíndonos os vosos vídeos ao correo electrónico do EDLG: edlglopezferreiro@gmail.com. No Concello, onde onte presentamos a nosa campaña, xa nos están a apoiar!

Como cada curso, desde Seccións Bilingües tentamos destacar este día dalgún xeito.
O alumnado traballou de forma colaborativa en dous carteis para os corredores do centro e repartiron mensaxes para as aulas. 
Pequenos xestos que esperamos consigan grandes cousas :)

O López Ferreiro conmemorou o 8M, coa actuación do dúo galego de música folk tradicional galega Caamaño & Ameixeiras. Coa acordeonista Sabela e coa violista e vocalista Antía, celebramos o Día Internacional das Mulleres, unha xornada para reivindicar a igualdade e facer balance sobre a situación das mulleres na nosa sociedade.

Este concerto, organizado polo EDLG do noso centro, desenvolveuse grazas á iniciativa dos Contratos-programa Inclúe (CPInclúe), nos que estamos a participar, concretamente do IGUÁLA-T.

O EDLG do CEIP López Ferreiro, quere convidarvos a acceder ao seu novo blog, Fai un trato co galego!

A través del poderedes seguir o proxecto de innovación educativa en dinamización lingüística, que estamos a desenvolver no centro.

Esta é unha proposta que está a realizar, sobre todo, o alumnado de 5º e 6º de Primaria. A través dela quérese convidar a todos e a todas a xogar, a relacionarse e a atender en galego!

TODAS AS SOLICITUDE PRESENTADAS PARA EDUCACIÓN INFANTIL, ESTÁN ADMITIDAS POSTO QUE O NÚMERO DE VACANTES É IGUAL OU SUPERIOR AO NÚMERO DE SOLICITUDES.

AQUELAS FAMILIAS QUE SOLICITARON PRAZA PARA EDUCACIÓN PRIMARIA, dada a insuficiencia de postos dispoñibles, terán 10 días hábiles para presentar, se non o fixeron, a documentación xustificativa dos criterios do baremo alegados.

Calendario de actuacións

• Xornadas de portas abertas 

•  27 de febreiro- Sorteo público do número para resolver os empates no procedemento de admisión de alumnado.

• Antes do 1 de marzo - Publicación dos postos escolares vacantes 

*De acordo coa normativa vixente reservaranse 3 prazas por unidade do total das vacantes previstas para atender a escolarización de alumnado con neae (necesidades especificas de apoio educativo). Para o vindeiro curso reservaranse 6 prazas en 4º de Ed. Infantil e 3 en 1º de Ed. Primaria.  As devanditas prazas non adxudicadas, asignaranse dentro do procedemento ordinario de admisión e, se é o caso, no subsidiario.

•  Do 1 ao 20 de marzo- Presentación de solicitude de admisión

Presentarase unha única solicitude segundo o modelo ANEXO II (ED550B) preferentemente por vía electrónica mediante o formulario normalizado que estará dispoñible na aplicación informática admisiónalumnado (https://www.edu.xunta.gal/admisionalumnado/) a través da sede electrónica da Xunta de Galicia.

Opcionalmente poderase presentar presencialmente no centro docente indicado en primeiro lugar.

A partir do 1 de marzo, poden recoller o formulario en papel no colexio. O horario de secretaría do CEIP López Ferreiro é de luns a venres de 09:00 a 14:45h e os martes tamén de 16:30 a 18:30h.

Cando o número de solicitudes sexa superior ao de postos dispoñibles, abrirase un prazo de 10 días hábiles para presentar presencialmente no centro a documentación xustificativa dos criterios alegados.

• 25 de abril - Publicación das LISTAXES PROVISONAIS de alumnado ADMITIDO e NON ADMITIDO.

Ábrese un prazo de 5 días hábiles para presentar reclamacións.

• 15 de maio - Publicación das LISTAXES DEFINITIVAS DE ADMITIDOS/AS e NON ADMITIDOS/AS.

Prazo de interposición de recurso de alzada ante o Xefe Territorial: 1 mes.

• Do 20 ao 30 de xuño - Formalización de matrícula do alumnado admitido.

PODEN CONSULTAR MÁIS INFORMACIÓN NOS ARQUIVOS ADXUNTOS: información sobre o proceso de admisión, información sobre o centro e a ANPA, tríptico informativo, criterios do baremo, rúas do CEIP López Ferreiro

O criterio complementario do centro outórgase por "domicilio familiar ou lugar de traballo dos pais ou titores legais na área de influencia do centro".