PROCEDEMENTO DE ADMISIÓN DO ALUMNADO PARA O CURSO 2017-2018

O pasado 1 de febreiro publicouse no DOG a Orde que regula o procedemento de admisión e matriculación do alumnado  de Educación Infantil, Educación Primaria, ESO e Bacharelato para o curso 2017- 2018.

 

O prazo de admisión nun novo centro abranguerá do 1 ao 20 de marzo.

 

·         As solicitudes de admisión para o curso 2017-2018, poderán realizarse a través de Internet, mediante a aplicación de xestión do proceso "admisionalumnado" (https://www.edu.xunta.es/admisionalumnado/) ou ben entregando o formulario presencialmente no noso colexio.

·         O formulario normalizado estará  dispoñible na sede electrónica da Xunta de Galicia, na aplicación admisionalumnado, na nosa páxina web como adxunto e tamén será entregado nos centros docentes.

·         Para a tramitación deste procedemento consultaranse automaticamente os datos de DNI, domicilio fiscal, renda anual, condición de familia numerosa, discapacidade do alumnado/proxenitores/titores ou irmáns.

·         Cando a familia se opoña a que a Administración consulte os datos, deberán indicalo no cadro correspondente do formulario e achegar os documentos que acrediten calquera destas circunstancias.

Para que as persoas interesadas poidan coñecer o noso centro realizaranse dúas xornadas de portas abertas para que poidades coñecer o centro, a liña de traballo, as instalacións e preguntar tódalas dúbidas que teñades.

As xornadas de portas abertas serán o martes 07 de marzo ás 17:30h e o venres 10 de marzo ás 10:30h.

 

NORMATIVA:

ORDE do 25 de xaneiro de 2017 pola que se modifica a Orde do 12 de marzo de 2013 pola que se desenvolve o procedemento para a admisión do alumnado en centros docentes sustentados con fondos públicos que impartan ensinanzas de 2º ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación.

 Anexo II: Documento de solicitude de admisión.

Roteiro mitolóxico con "premio"

Enviado por lois o Mér, 01/25/2017 - 15:09

 O alumnado de 6º A e 6º B saímos novamente de rota para coñecer as figuras mitolóxicas e lendas representadas na Zona Vella da nosa cidade. Para isto procuramos previamente  información na escola e preparamos por grupos unha pequena explicación sobre Cupido, Prometeo, O Bocoi de Santa Clara, as gargolas e gorgonas, etc.

Pasámolo moi ben explicando ás compañeiras e compañeiros todo sobre o que, o cando, o como e o por que das diferentes estatuas e figuras que abrollan polas paredes da zona vella. O mellor de todo é que aínda por riba nos deron un premio no concurso "A función social do patrimonio".

Aquí vos deixamos unha escolma das fotos sobre estes seres e lendas fantásticas!

 

 

Libro "Falemos da Nosa Historia"

Enviado por Julia o Mar, 12/20/2016 - 12:28

O  venres 16 de decembro tivo lugar no salón multiusos, a presentación oficial do libro resumo dos primeiros 10 anos do concurso de redacción histórica "Falemos da nosa historia".

Ao acto asistiron ademais do director, José Ramón Carril Vázquez e a xefa de estudos Mª José Sánchez;  o Secretario Xeral de Política Lingüística, Valentín García Gómez, a coordinadora dos equipos de normalización, Sabela Gil  o profesor de historia da Facultade de Ciencias da Educación, José Armas Castro e o exdirector do centro, Lois Trigo.

No acto celebrado participou o alumnado de 6º de E. Primaria

Pinchar na imaxe para acceder ás fotos do acto

 

Roteiro pola Compostela máis trovadoresca.

Enviado por lois o Mér, 11/30/2016 - 23:00

O luns 28 de novembro as nenas e nenos de 6º A e 6º B saímos de roteiro para coñecer in situ a historia trovadoresca da nosa cidade. Para isto contamos coa colaboración de Isabel  (profesora da Faculdade de Filoloxía e especialista en lírica medieval galego-portuguesa) que nos introduciu de cheo nas cantigas de Amigo, de Escanio e Maldizer, así como nas chamadas Pastorelas. Tamén falounos dos autores máis representativos da nosa cidade na época na que o galego era usado para compor,cantar e danzar por xentes de toda a peninsula e do estranxeiro. Por iso nós tamén "compuxemos" as nosas cancións, rimas e xogos para por ao día as cantigas e brincarmos polo camiño.

 

    

 

 

Visita ao Mercado de Abastos

Enviado por Julia o Mér, 11/30/2016 - 12:25

Os alumnos e alumnas de 5º de primaria, visitamos onte o Mercado de Abastos de Santiago. Puidemos descubrir os distintos postos do mercado e tamén entrevistamos a vendedores e clientes. Pasamos unha mañán estupenda e aprendemos moitas cousas grazas á xenerosidade da xente do mercado.

 

      

 

 

Cineuropa

Enviado por Julia o Xov, 11/24/2016 - 23:00

O alumnado de 5º de E. Primaria asistiron, o 24 de novembro, a unha sesión de Cineuropa, na que viron a película " Ma vie de courgette", que conta a historia dun neno de 10 anos, alcumado Courgette (cabaciña), que é enviado a un orfanato tras a morte da súa nai. A  historia narra como superará as dificultades e integrarase neste novo ambiente no medio dun pequeno grupo de nenos maltratados, coma el, pola vida.

        

Ciencia divertida

Enviado por admin o Xov, 11/17/2016 - 23:00

O alumnado de cuarto participou nos Obradoiros de Ciencia Divertida organizados pola biblioteca Ánxel Casal durante os xoves 10 e 17 de novembro. Todos os alumnos colaboraron na realización de experimentos divertidísimos cos que comprobaron os cambios nos estados dos líquidos, descubriron por medio do xerador de Van de Graaff como eles poden transmitir electricidade a outros compañeiros e literalmente se lles puxeron os pelos de punta! Realmente pasáronno xenial!

Magosto

Enviado por Julia o Mér, 11/16/2016 - 12:33

O mes de novembro é o mes do Magosto, e son dúas as datas máis correntes para a súa celebración: o día 1 de novembro, festa de Tódolos Santos, ou o día 11, festa de San Martiño.

Este ano escollemos o 11 de novembro, para celebrar o tradicional magosto no cole.

Fixemos xogos: carreiras de sacos, corda, bolos, goma,... e, como non,  comemos as castañas ¡que boas estaban!.

 


Tradición oral

Enviado por admin o Xov, 11/10/2016 - 23:00

 O xoves 3 de novembro, o alumnado de 2º e 4º E. Primaria participaron no cuarto maratón de tradición oral, organizado pola biblioteca Ánxel Casal.

Alí escoitaron os contos tradicionais, lendas e historias sobre a mitoloxía galega que algúns dos seus compañeiros relataron aos asistentes. 

 

 

 

 

 

Seguridade en internet e acoso escolar

Enviado por Julia o Sáb, 11/05/2016 - 11:46

Profesionais do Corpo Nacional de Policía, estiveron no noso centro, os pasados 3 e 4 de novembro, impartindo ao alumnado de 5º e 6º de E.Primaria unha charla sobre seguridade en internet e acoso escolar, completando así o traballo do profesorado nestos temas.

En vindeiras datas está prevista unha charla semellante para as familias, da que serán debidamente informadas.

      

Distribuir contido

Biblioteca

Os nosos blogues

Rebulindotic, blog de 6º

Rebulintic

O noso recoveco, blog de 5º

O noso recoveco

 

Olladas de cuarto, blog de 4º

  

Olladas de terceiro, blog de 3º

 

 

lopefri2, o blog de 2º

 

Os primeiros do cole, blog de 1º

Blog de dinamización lingüística

Educación Infantil