"Todos temos unha historia que nos encanta contar unha e outra vez.

O meu avó, a vosa nai ou aquel curmán da tía segunda do papá que se perdera no Brasil.

Son historias e anécdotas que naceron na vosa familia,

que sempre se contan cando estades xuntos e que hai que coidar coma tesouros". 

A tarde do pasado 2 de abril tivemos na biblioteca un obradoiro impartido por Pablo Otero. Nel familias e alumnado elaboraron os seus libros de familia. Deixaron voar a súa creatividade e partindo dalgunha anécdota, chiste ou relato comezaron a traballar. Para iso, utilizaron material de refugallo e con paciencia e agarimo fixeron as obras de arte que vos deixamos a continuación. 

Grazas Pablo, foi unha tarde fermosa. 

Gatiza apareceu novamente na escola e, coma sempre que vén por aquí, é porque necesita da vosa axuda. Esta vez quere que gravedes un vídeo curto, dun minuto como máximo, dándolle algún consello sobre ecoloxía, reciclaxe, sostibilidade ou medio ambiente. Tedes ata o venres día 19 de abril para traelos á escola nunha memoria usb co voso nome escrito.

Lembrade, o vídeo ten que estar en galego e gravado en horizontal.

Gatiza conta con vós!

O pasado 21 de marzo conmemoramos no centro o Día Mundial da Síndrome de Down.

Para isto, levamos a cabo dúas actividades, por unha banda, todos e todas trouxemos calcetíns desparellados como símbolo de diversidade. 

Por outra, o alumnado de 2º de Educación Primaria, como verdadeiros e verdadeiras expertas acudiron ás diferentes aulas da escola a facer unha campaña de sensibilización e visibilización sobre as persoas non verbais e o emprego de comunicadores.

Comezaban a sesión lendo o conto de Mimo, un pequeno paxaro que non podía piar. Por isto, pensaba que tampouco sería quen de voar nin de contar sementes. Estaba moi confuso. Ao final, unha pomba moi sabia ensínalle outro xeito de expresión: a música. Así, Mimo pode expresar cando está triste, cando está contento… Mimo tamén descobre que a través da pintura pode contar moitas cousas.

Logo os nenos e nenas explicaron o que era un comunicador, os aspectos fundamentais para facer un bo uso do mesmo e incluso o que tiñamos que facer se queríamos comunicarnos cunha persoa que o empregue, sempre sendo respetuosos e respetuosas.

Parabéns nenos e nenas polo voso traballo! Sodes un verdadeiro exemplo!

“Non poder falar, non significa non ter nada que dicir”

O pasado 8 de marzo celebramos no centro o Día Internacional da Muller. Este ano quixemos reflexionar sobre as desigualdades que existen entre mulleres e homes en canto a postos de traballo de relevancia en empresas, outros postos donde se toman grandes decisións e o tempo adicado para os coidados e as labores domésticas.

Dende o equipo de mestras que formamos parte do PFPP de centro e dentro do contrato programa igualaT, propuxemos ao resto de claustro e ao alumnado uns datos para a súa análise e reflexión e a realización de diferentes talleres nos que se pretende reflectir a importancia das actividades diarias que homes e mulleres deberían compartir igualitariamente.