O Centro de Formación e Recursos da Coruña é un órgano, dependente do servizo de Formación do Profesorado
da Consellería de Educación e Ordenación Universitaria, que ten como obxectivos a formación permanente do profesorado,
o intercambio de experiencias e reflexión sobre os procesos educativos
xunto coa  dinamización pedagóxica dos centros como elementos vertebradores do sistema educativo.

Este Centro desenvolve a súa actividade de forma coherente cos plans de formación que demanda
o sistema educativo e coas necesidades de actualización pedagóxica e científica sentidas e manifestadas polos docentes.

O Centro de Formación e Recursos da Coruña debe estar vencellado aos centros educativos do seu ámbito territorial.
É responsabilidade de todos conseguir que este centro sexa un lugar de colaboración, contribuíndo a consolidar o labor docente entendido
non como un simple traballo illado na aula senón como unha actividade máis complexa e creativa, que desenvolve e adapta os currícula ao contexto socio-educativo.

A que nos dedicamos

A rede de formación permanente do profesorado definiu a calidade como parte fundamental da súa política e da súa estratexia, e adoptou un sistema de xestión baseado na calidade como modelo de referencia para a xestión da Institución. Este sistema de aseguranza da calidade está baseado na Norma UNE-EN ISO 9001:2015.

Máis en concreto, dende a súa creación adoptou a calidade como unha filosofía de actuación que se identifica coas seguintes directrices:

• O traballo ben feito e a mellora continua das nosas actividades, dos servizos que prestamos e dos procesos de traballo.

• A achega de valor ao profesorado, ao persoal do centro, ás escolas de nais e pais escoitando a súa voz e procurando satisfacer as súas expectativas.

• A adopción de metodoloxías de traballo baseadas na cultura da evidencia, a xestión a partir de datos e a disciplina do traballo en equipo.

• A xestión dos procesos orientada á mellora continua mediante a planificación, o desenvolvemento e a revisión e mellora destes.

• A mellora dos resultados definindo os indicadores e obxectivos, e avaliando o seu nivel de logro.

• Requisitos implícitos, explícitos, do usuario, regulamentarios e os propios da nosa organización.

   

Estas directrices despréganse a través dos seguintes procesos e proxectos:

• Mantemento dun sistema da calidade segundo UNE-EN ISO 9001:2015.

• Medición e análise periódica da satisfacción de servizos polos usuarios.

• Revisión do sistema da calidade e actualización periódica de procesos.

• Auditorías internas e externas do sistema da calidade.

   

Así mesmo, despréganse nos Obxectivos de Calidade a través da formulación e o seu cumprimento. Os obxectivos da rede de formación permanente serán computables e medibles a través de indicadores; todos eles constitúen os obxectivos da calidade. O grao de cumprimento será avaliado periodicamente.

O compromiso coa calidade afecta a toda a organización. Todas as persoas da rede de formación aceptan este compromiso e a súa responsabilidade no cumprimento dos requisitos establecidos no Sistema de Xestión da Calidade, así como o de participar activamente na mellora da calidade e da xestión, e no logro dos obxectivos institucionais.

POLÍTICA PEDAGÓXICA

A rede de formación ten en conta as seguintes directrices:

• Detectar e recoller as necesidades de formación nos centros do seu ámbito de actuación, e propoñer iniciativas e accións formativas que satisfagan esas necesidades ou demandas.

• Coordinar e xestionar as actividades formativas que integran os plans anuais de formación do profesorado aprobados pola Dirección Xeral de Educación, Formación Profesional e Innovación Educativa e conseguir un alto grao de satisfacción por parte do alumnado.

• Promover accións formativas nos centros, encamiñadas a impulsar a investigación educativa, preferentemente no campo da innovación e experimentación didácticas.

• Facilitarlles un servizo de documentación, elaboración e difusión de material didáctico e pedagóxico ao profesorado e aos centros de ensino do seu ámbito territorial.

• Realizar actividades de intercambio, debate e difusión de experiencias educativas entre o profesorado.

• Impulsar e apoiar a participación do profesorado en seminarios, grupos de traballo e proxectos de formación en centros ou calquera outra modalidade de formación.

• Contribuír á dinamización social e cultural das zonas educativas de especial dificultade do seu ámbito de influencia.

• Favorecer o coñecemento e utilización efectiva de materiais e recursos técnicos.

• Dar soporte ás Escolas de Nais e Pais.

• Calquera outra que a Administración educativa lle encomende en relación cos obxectivos propios do centro.

• Asegurar a profesionalidade e compromiso das persoas da rede de formación, proporcionándolles o clima adecuado, os recursos precisos e a formación necesaria.

• Desenvolver unha relación baseada no beneficio mutuo co profesorado, para proporcionar un servizo eficaz e eficiente.

• Conseguir o máis alto nivel de desempeño en todos os procesos e especialmente naqueles que teñen relación directa coa satisfacción dos grupos de interese.

• Asegurar o comportamento ético nas relacións con todos os grupos de interese, así como no cumprimento dos requisitos legais e regulamentarios aplicables.

Esta Política de Calidade é o marco de referencia que se utiliza para a fixación e o seguimento dos obxectivos anuais.