A Semana das Letras Galegas avanza e este martes tivemos o pracer de recibir no noso centro o actor e humorista David Amor, que conversou co alumnado de 3º ESO. A charla xirou arredor das interioridades do mundo do espectáculo e a televisión, de todo o inmenso traballo que se realiza previamente e por tantos profesionais para que eses formatos de entremento cheguen ás nosas casas, ás pantallas do cinema ou ás salas de teatro, e da importancia da educación e da formación, da constancia e a vontade, para abrirse camiño naquel campo ao que nos queiramos dedicar profesionalmente na vida.
Tamén houbo tempo para achegármonos á persoa, aos seus inicios, á súa faceta deportiva ou á lingua galega, que David sempre fala e defende con orgullo e moi consciente das súas raíces.
Logo, o alumnado de 1º BACH entrevistouno para a radio escolar xa nun formato máis próximo, no que abordaron o noso convidado con preguntas sobre estes e outros temas. Coa súa experiencia nos medios, David axudounos con consellos e algunhas observacións nesta súa estrea radiofónica.
Noraboa a Hugo, Pablo, Raquel, Cristhian e Ángel, fixéstelo moi ben, e moitas grazas a David pola súa visita, pola simpatía e a cercanía. Até a próxima!
