Nesta etapa debemos analizar con moita exactitude cal é o problema ou necesidade que queremos resolver: pensa que unha mala identificación pode dar lugar a solucións que non o resolvan ou o fagan de xeito parcial.

Tamén é importante ter en conta que condicións iniciais debe cumprir; estas poden afectar a aspectos funcionais, construtivos, económicos, estéticos, ecolóxicos ou de seguridade.

Posto que unha persoa non pode posuír todos os coñecementos necesarios para resolver calquera problema técnico, é necesario facer unha busca de información.

Para seleccionar a información de xeito doado, hai que coñecer que datos precisamos (normalmente están establecidos nas condicións iniciais) e consultar fontes de información adecuadas ao noso nivel de coñecementos. As principais son os libros, catálogos, a web, calquera obxecto da nosa contorna e as conversas que poidamos establecer con con persoas especialistas.

Nesta etapa póñense en xogo a creatividade e os coñecementos científicos e tecnolóxicos.

Antes de iniciar o deseño compre determinar como dar solución ao problema ou necesidade identificado. Facémolo mediante a xeración e a concreción de ideas, é dicir, achéganse unha serie de solucións que aínda que poidan parecer correctas deben ser analizadas con detalle, para elixir aquela que sexa considerada a mellor. Se o traballo se realiza en grupo, un recurso moi eficaz é levar a cabo unha tormenta de ideas.

Nesta etapa levamos á práctica as ideas que se expresaron sobre o papel na fase de deseño e planificación. Para iso é necesario aplicar as destrezas no manexo dos materiais, compoñentes e ferramentas e procurar facer un traballo preciso e limpo e para coidar a estética do obxecto construído.

Nesta fase poden xurdir problemas inesperados que, nunhas ocasións, teñen solución, pero que noutras, obríganos a volver a deseñar unha parte do obxecto.

Trátase de analizar o obxecto construído coa finalidade de comprobar que cumpre coa necesidade orixinal, coas condicións iniciais e que o seu funcionamento é correcto. Ademais a avaliación debe servir para evitar que se repitan os mesmos erros en proxectos posteriores.