Normalización Lingüística

XOGOS POPULARES NO PENEDO REDONDO POLO NADAL

Pero que boa forma de finalizar o trimestre tivo o grupo de 2º D grazas a gañar o concurso de Nadal: subida ao Penedo Redondo, xornada de xogos populares e degustación de rosca e chocote quentiño!!

 

XOGOS POPULARES NO PENEDO REDONDO POLO NADAL

CONCURSO DE NADAL

EDDLG principal.png

XOGOS POPULARES NO PENEDO REDONDO

O pasado mércores 2 de decembro o alumnado de 1º B puido recibir por fin o premio por gañar o concurso do Magosto Terrorífico.

Tal como estaba previsto saíron andando ás 11.30 h. cara ao Penedo Redondo.

 

Primeiro houbo un tempo para tomar a merenda.

Ao acabar, gozaron competindo cos seguintes xogos tradicionais:

  • Chave
  • Aro

 

  • Pincha
  • Pai fillo nai

A final disputouse coa corda de soga tira.

 

Para rematar e deixar un bo sabor de boca antes de regresar ao instituto, entregóuselles un paquete de lambonadas.

 

 

EDDLG principal.png

OS MÁRTIRES DE SOBREDO

Este ano a situación sanitaria non permitiu realizar a tradicional concentración de alumnado de Tui e de Salceda de Caselas que se vén realizando desde hai anos para homenaxear os Mártires de Sobredo, Cándida Rodríguez, Xaquín Estévez e Venancio González, asasinados por disparos da forza pública o 28 de novembro de 1922 no lugar de Sobredo (Guillarei), no contexto da loita antiforal.

Nesta ocasión só o Instituto de Estudos Agrarios organizou o pasado sábado 28 de novembro unha ofrenda floral íntima para conmemorar o 98º aniversario do asasinato dos tres veciños que loitaron contra a fin dos foros.

Desde aquí tamén o IES Pedras Rubias quere renderlle homenaxe virtual, esperando poder facelo presencialmente o curso que vén.

EDDLG principal.png

CONCURSO IMAXES DO PATRIMONIO

A alumna Noelia Cabaleiro Rodríguez de 4º de ESO resultou gañadora no 3º Certame Imaxes para o Patrimonio de Recollida de Fotografías do Patrimonio Inmaterial Galego-Portugués.

O alumnado que quixese participar neste concurso de Ponte nas Ondas debía buscar, na compaña dos seus familiares, aquelas fotos que contivesen elementos do patrimonio inmaterial galego-portugués. Debían completar a participación no certame coa inclusión dun texto explicativo da imaxe. 

A imaxe coa que Noelia obtivo o accésit é esta:

E o texto é o seguinte:

Cando se comezaron a facer os primeiros “botellóns”?

Nesta imaxe de 1961 aparecen un grupo de mozos, entre eles está o meu avó Manuel Cabaleiro e o seu irmán Francisco Cabaleiro (os da dereita de todo), gozando dunha das romarías máis famosas de Salceda de Caselas, a subida ao penedo de San Cibrán. O meu avó cóntame que subían andando ata o penedo, detrás das distintas procesión que o facían dende as parroquias da contorna; ía moita xente, pero sobre todo mozos e mozas. Alí pasaban todo o día. Aproveitando a romaría, os rapaces e rapazas levaban comida, e sobre todo viño branco, viño tinto, augardente, licor café… Tamén había gaiteiros que tocaban e amenizaban a festa e os grupos de mozos e mozas que alí se xuntaban porque daquela aínda non había radios portátiles para que os grupos puidesen escoitar música. Con todo isto os grupos de rapaces e rapazas podían pasalo ben e divertirse, a foto non deixa lugar a dúbidas, e segundo me din tamén sempre había algún mozo que acababa un pouco prexudicado polo viño. E así era como a xuventude se relacionaba entre ela. Agora que o penso, non se vos parece un pouco isto a algo que fai a xuventude de agora? Aí deixo a pregunta.

Todas as imaxes gañadoras poden visualizarse ao completo na seguinte ligazón: http://pontenasondas.org/iii-certame-de-fotografia-imaxes-do-patrimonio-as-ganadoras/

 Nas anteriores edicións do Certame a entrega dos premios facíase nun acto presencial con representantes de todas as escolas, pero este ano, debido á incidencia da pandemia nas nosas vidas, a Xunta Directiva da Asociación tomou a determinación de non facelo así e enviar os premios co nome dos gañadores/as ao enderezo da escola para que alí se faga a entrega. 

              

Aproveitamos para comunicarvos que xa se convocou o IV Certame de Recolla de Imaxes do Patrimonio para o presente curso 2020/21. Proximamente publicaranse as bases que rexerán esta nova edición.

Noraboa, Noelia e familia! Toda a comunidade do IES Pedras Rubias séntese moi orgullosa de ti. Déchesnos luz nesta noite escura e longa que estamos a vivir. Agardamos que sigas a recoller premios na túa traxectoria e tirando bonitas fotos coa nova cámara fotográfica que recibiches de premio por parte de Ponte nas Ondas! 

 

EDDLG principal.png

MAGOSTO TERRORÍFICO

Desta volta non foi a meteoroloxía a que puxo impedimentos, senón a ben coñecida epidemia que nos deu por acompañar este ano 2020.

Aínda así, organizamos na semana de San Martiño a festa tan arraigada a nós do Magosto Terrorífico, na que fusionamos as dúas tradicións: o magosto e o samaín.

Para ir creando ambiente, nos días previos, nas aulas de Lingua Galega falouse do magosto tradicional galego e da Santa Compaña.

Desde o luns 9 toda a comunidade educativa se involucrou coa actividade e, por un lado, o profesorado fixo cucuruchos, picou castañas, aportou leña... e, polo outro, o alumnado foi traendo os seus calacús, que este curso se expuxeron nas escaleiras da entrada principal, e enviando os vídeos en Tik Tok ou curtametraxes terroríficas á aula virtual ou por correo electrónico. Ambos elementos, cabazas e vídeos, formaban parte do concurso por aula.

                  

E o xoves 12, os nosos asadores, Pepe, Juan Carlos e Rubén, coa axuda incondicional de Begoña, asaron quilos e quilos de castañas que logo se repartiron entre o alumnado durante o recreo. Desde aquí queremos felicitalo (o alumnado) porque cumpriron á perfección as dúas encomendas: non enfarruscar a ninguén e depositar os restos nas papeleiras. Parabéns!

Preme no vídeo

Premiouse a aula que mellor organizou a actividade de forma global (elaboración de calacús e vídeos de medo) e a gañadora indiscutible resultou 1º B, da titoría da profe Ana Varela. Noraboa!

Se queres ver os vídeos, preme nos enlaces:

1º A

1º B (gañadores):

Vídeo 1
Vídeo 2
Vídeo 3

1º C

1º D

Agora só resta desfrutar da xornada de xogos populares no Penedo Redondo que terá lugar un día da próxima semana desde as 11.30 da mañá.

EDDLG principal.png

DÍA DAS BIBLIOTECAS E DAS ESCRITORAS GALEGAS

Para conmemorar o día das Bibliotecas, o Día das escritoras 2020, que este ano xa fixo a súa quinta edición e que tivo lugar o luns da pasada semana baixo o lema “O esforzo cotián das mulleres”, e inaugurar as emisións de radio durante os recreos, o xoves 29 de outubro durante o recreo e a hora de lecer alumnado de diferentes niveis educativos leu poemas e fragmentos narrativos de escritoras galegas durante o programa especial de radio.

As lecturas escollidas foron as que seguen:

·         Un poema do libro Feliz Idade de Olga Novo, homenaxeada co Premio Nacional da Crítica Española en Poesía (María 2º D).
·         Un fragmento narrativo de Mª Xosé Queizán do libro Amor de tango (Lúa 2º D).
·         Un poema de Marta Dacosta do libro Na casa da avoa (Ainhoa 2º D).
·         Un fragmento de Adiós María de Xohana Torres (Naia 1º B).
·         Un fragmento da novela Nena e o mar de Érica Esmorís (Karina 1º B).
·         Un parágrafo de Memoria do silencio de Eva Mejuto (Maruxa 1º E).
·         O poema “A xustiza pola man” de Rosalía de Castro (Lucía Fernández 1º B).

Agradecémoslle a axuda técnica recibida por parte do profe Rubén e de Alba de 3º A, sen os cales non sería posible facer esta actividade.

 

Agardamos que fose do voso agrado e gozásedes tanto coma nós. Ata a próxima!!

EDDLG principal.png

3º CERTAME "AS IMAXES DO PATRIMONIO"

Xa se publicou a convocatoria para o III Certame de recollida de imaxes de patrimonio inmaterial galego-portugués proposto pola Asociación Cultural e Pedagóxica Ponte... nas ondas!

Con esta iniciativa preténdese recuperar e pór en valor as fotografías antigas con valor patrimonial.

Seguindo as bases, as fotografías presentadas deben recoller diferentes aspectos relacionados co Patrimonio Cultural Inmaterial (oralidade, saberes tradicionais, ciclo festivo anual...), pero teñen que ser anteriores a 1970. Ademais, cada imaxe debe ir acompañada dun texto no que se incluían os seguintes aspectos: lugar, data aproximada, persoas que aparecen e relación da imaxe co Patrimonio Cultural.

O prazo rematará o 30 de abril de 2020.

Animádevos a participar!

 

3º CERTAME "AS IMAXES DO PATRIMONIO"

PREMIOS CONCURSO IMAXES DO PATRIMONIO PNO

 

Tres ex alumnas do IES Pedras Rubias, Lucía Fernández Pérez e as irmás Ariadna e Yashira Álvarez Ramírez, resultaron gañadoras no 2º Certame Imaxes para o Patrimonio de Recollida de Fotografías do Patrimonio Inmaterial Galego-Portugués.

       

O pasado luns 25 de novembro acudiron ao Centro Veciñal e Cultural de Valadares en Vigo para asistir ao acto de entrega de premios.

Das trescentas cincuenta imaxes recibidas a concurso, premiáronse oito imaxes, das cales dúas pertencían ás alumnas do IES Pedras Rubias.

O xurado destacou a gran calidade das imaxes recibidas, así como tamén dos textos que acompañaban as fotografías con referencias explicativas.

O evento estivo conducido polo narrador e poeta Lois Pérez. O alumnado premiado fixo lectura dos textos explicativos das imaxes galardoadas.

A continuación, escoitaron un poema recitado por Lois Pérez acompañado dos acordes dunha guitarra elaborada con material reciclado.

A festa concluíu cunha actuación de Cé Orquestra Pantasma, quen puxo en pé a un auditorio entregado coas súas animadas pezas musicais.

As imaxes gañadoras poden visualizarse ao completo na seguinte ligazón: http://escolasnasondas.com/certame2019-fotografias-recibidas/

Noraboa mozas! O IES Pedras Rubias séntese moi orgulloso.

Agardamos que sigades a recoller premios nas vosas traxectorias!

EDDLG principal.png

Magosto Terrorífico

Este curso a climatoloxía non nos deu tregua e, en consecuencia, non nos permitiu celebrar, tal como tiñamos organizado, o noso xa tradicional magosto terrorífico, fusión das dúas festas próximas no tempo: o magosto e o samaín.

Inicialmente, estaba previsto que o martes 5 de novembro todo o IES Pedras Rubias saíse en procesión disfrazado de Santa Compaña e se desprazase ata o Espicho do Faro. Como o prognóstico metereolóxico era adverso, adiouse para o martes 12 de novembro. Chegada esta data, houbo que suspender a saída polo mesmo motivo e só se asaron e comeron as castañas no propio centro. Menos mal, que nos acompañaba a calor do equipo de Onda Raia coas súas preguntas sobre o magosto.

 

A semana anterior, nas aulas de Lingua Galega e Titoría, traballáronse aspectos como o magosto tradicional, a santa compaña, o texto instrutivo...

Tamén se decorou o vestíbulo do centro con motivos de medo (ataúde con esqueleto, pantasmas, arañas, morcegos...) e realizouse unha exposición de calacús e de receitas escritas elaboradas con produtos de outono.

 Dada a boa acollida que tivera o curso pasado o concurso de sobremesas cos devanditos produtos de outono, este curso volveuse ofertar.

Premiouse a aula que mellor organizou a actividade de forma global (calacús, receitas escritas e receitas elaboradas). A gañadora foi 1º A, da titoría da profe Loli Calvo.

 Noraboa!

EDDLG principal.png

Powered by Drupal - Design by artinet