Neste curso 2013-2014, novamente un grupo de alumnas e alumnos do IES Ramón Otero Pedrayo da Coruña fixemos equipo para poñer en marcha as tarefas que desenvolvemos no Club Matemático Durán Loriga.

Os temas sobre os que traballamos e os materiais que construímos servíronnos para levar á práctica as actividades que adoitamos realizar.

Iniciamos as actividades deste curso o día 14 de marzo (14 do 3) coa celebración do Día PI (PI = 3,14...) e puxémoslle colofón coa XV Semana Matemática do IES Otero Pedrayo que realizamos na primeira semana de xuño.

Para a celebración do Día PI creamos unha importante cantidade de materiais; podes ver algúns se buscas as etiquetas Arredor de PI que se atopan seguindo a ligazón As nosas publicacións que está na columna da dereita desta páxina como un dos contidos do Departamento de Matemáticas.

O material máis espectacular construído para o Día PI foi a grilanda que elaboramos coas 220 primeiras cifras do número PI (imprimindo cada cifra nunha folla DIN A4, ¡máis de 50 m de número PI!) e que colgamos no corredor principal do instituto. Este material presentámolo tamén á VIII Feira Matemática (PALEXCO, A Coruña, 26 de abril de 2014) e ao XIX Día da Ciencia na Rúa (Parque de Santa Margarida, A Coruña, 10 de maio de 2014).

 No seguinte vídeo podes ver as 220 primeiras cifras do número PI colgadas en PALEXCO do día da VIII Feira Matemática:

Durante este curso, ademais de manter a publicación de Mathesis, traballamos tamén sobre outros proxectos: Pirámides, Falacias Xeométricas e construímos dous xogos que chamamos O Movemove e o Xiravanza que abordan diversas facetas das matemáticas seguindo movementos baseados en coordenadas cartesianas e coordenadas polares.

Deixamos algunhas fotos na nosa galería, ás que podes acceder a través das seguintes ligazóns:

 Fotos na VIII Feira Matemática

Fotos no XIX Día da Ciencia na Rúa