Tamén o mar está presente no mundo relixioso. O alumnado da materia de Relixión, dirixido pola súa profesora, achegounos algunhas pinceladas deste binomio cristianismo-mar, unha dicotomía moi interesante, pois o mar representa un medio de vida e, polo tanto, de riqueza; pero tamén supón un perigo. Serán precisamente estes dous eixos os que vinculan a relixión co mar: a xente pídelle a Deus por intercesión da Virxe do Carme ou dalgún santo a protección ante os perigos da faena marítima e por outra banda, unha boa pesca ou colleita.
Desde as súas orixes, o cristianismo tivo sempre unha estreita vinculación co mar. Palestina, o país de Xesús, vivía fundamentalmente da pesca e da agricultura, e non en van os apóstolos eran na súa meirande parte pescadores, tal e como aparece recollido nos relatos evanxélicos. Partindo deste feito, parte do alumnado traballou sobre a xeografía do país de Xesús, así como sobre a súa cultura, os seus costumes, festas... Outra parte fixo o seu traballo sobre os apóstolos pescadores.
Redondela é vila marítima, polo que unha segunda dimensión do traballo levou ao alumnado a traballar sobre “patróns e patroas” da xente do mar. Isto levounos inmediatamente a pensar na Virxe do Carme, que desde a Idade Media substituíu a S. Telmo no papel de protectora das persoas mariñeiras. Unha parte do alumnado, fundamentalmente de Cesantes, recolleu datos nas súas casas, pois en moitos casos teñen barcas nas que levan a imaxe da Virxe en procesión pola Ría de Vigo. Outra parte afondou na orixe á devoción da Virxe do Carme como advocación protectora dos mariñeiros e así descubrimos que nun primeiro momento o patrón da xente do mar era S. Telmo, o que nos levou a estudar a súa biografía para explicar a orixe deste dato. Ademais, algunhas rapazas e rapaces escolleron a figura de S. Pedro, o primeiro entre os doce apóstolos de Xesús, pois era o patrón da súa parroquia, concretamente de S. Pedro de Cesantes, parroquia mariñeira. Asemade, como en Redondela hai unha grande devoción ao Cristo dos Navegantes, tamén nos mergullamos na historia desta devoción.