Dende o Departamento de FOL a tarefa que desenvolvemos co alumnado da optativa Iniciación á actividade emprendedora e empresarial de 4º da ESO consistiu en traballar a oralidade á vez que se coñecían e se poñían en práctica ferramentas de procura de emprego.
A tarefa consistiu en que o alumnado buscase nalgún portal de emprego da rede unha oferta de traballo relacionada cos seus intereses profesionais. Posteriormente, debía de obter un pantallazo de devandita oferta e subila á aula virtual.
Coa axuda de videotutoriais a profesora facilitoulles instrucións sobre como redactar unha carta de presentación adaptada a unha oferta de traballo concreta. Igualmente, a profesora proporcionoulles uns enlaces onde podían atopar diversos exemplos de cartas de presentación para tomar como referencia.
Unha vez redactada a carta de presentación debía de ser subida á aula virtual a través do correspondente buzón de entrega.
Finalmente, tras traballar preguntas tipo e respostas adecuadas nunha entrevista de traballo tipo, pedíaselle ao alumnado que simulase o rol de ser entrevistador e entrevistado en relación a devandita oferta e que gravase en audio as preguntas e respostas que suscitaría e respondería no seu caso.
Fotos da execución da tarefa:
