IES Castelao

     Achegándonos ao Entroido, o alumnado de 2º de ESO preparou uns fermosos traballos coa súa profesora Liliana Carro nos que se recolle información e fotos sobre distintas celebracións das que se fan por toda Galicia.

     Os traballos están expostos no vestíbulo para que todos poidamos velos e quen queira opte a gañar un concurso respondendo as preguntas que se fan sobre eles.

     Pódese participar ata o 21 de febreiro!!

          Hoxe 11 de xuño visitounos Luís Ferreiro, director da Fundación Celso Emilio Ferreiro e fillo do poeta Celso Emilio. Ao longo deste encontro, que mantivo con alumnado de Lingua Galega e Literatura de 4º ESO A e C, desenvolveu un relatorio sobre Celso Emilio no País dos Ananos, con especial referencia ás vivencias que o autor de Longa noite de pedra experimentou no seu exilio venezolano e tamén a como se proxectaron na súa obra literaria. Á súa conclusión o alumnado tivo ocasión de dialogar sobre distintos aspectos da vida cotiá de Celso Emilio co seu fillo.
          Un pracer escoitar e aprender sobre un dos poetas máis salientables da literatura galega contemporánea. A Fundación, ademais, doou á biblioteca do centro un exemplar dunha edición non venal do poema "Miña matria Galicia", que gañara o primeiro premio dos Xogos Florais de Buenos Aires en 1967 e un exemplar facsímile da publicación Adiante! A nosa gratitude por esta visita.

Álbum: ->

          O IES Castelao celebrou o Día das Letras Galegas da man da profesora Malores Villanueva: unha das especialistas máis reputadas no ámbito da investigación sobre a figura de Antonio Fraguas, docente, etnógrafo e antropólogo ao que este ano se lle dedica o 17 de Maio.
          Diante dun auditorio conformado por alumnado de 4º de ESO e primeiro de bacharelato, a profesora Villanueva debullou aqueles socalcos biográficos máis salientables de Fraguas: desde a súa orixe en Cotobade, pasando polo contorno familiar, os seus primeiros estudos, a chegada a Santiago, o seu compromiso docente e galeguista, a represión sufrida tras a guerra civil ata o seu principal legado como foi a posta en marcha do Museo do Pobo Galego que el cofundou e presidiu.
          Non se desatendeu, nun discurso ameno, a análise da súa produción bibiográfica, orientada como é sabido cara aos estudos de carácter etnográfico e antropolóxico. Grazas á profesora Malores Villanueva por compartir o seu coñecemento coa comunidade educativa do IES Castelao.

Álbum: Curso 2018/2019 -> Charla de Malores Villanueva

O pasado 6 de maio, o alumnado de 1º bacharelato A e B viaxou  ata Celanova para coñecer a vida e obra de dous ilustres escritores nados nesta vila: M. Curros Enríquez e Celso E. Ferreiro. Os alumnos estiveron acompañados polas profesoras Helena Fernández, Marta Álvarez e Gloria Paredes. En Celanova visitamos a  casa de Curros, hoxe convertida na Casa dos Poetas,  o mosteiro de San Salvador e algúns lugares que inspiraron tanto a Curros como a Celso E. Ferreiro.  Tamén  nos achegamos a Vilanova dos Infantes, terra dos pais de Méndez Ferrín,  e finalizamos a visita  no xacemento arqueolóxico de Castromao. Foi unha xornada ben completa!

Álbum: Curso 2018/2019 -> A Celanova de Curros Enríquez

O 2 de maio Gonzalo Navaza veu ao noso centro a falar cos alumnos de 1º de Bacharelato da súa obra Erros e tánatos. O autor comentounos varios dos relatos e como xurdiron as historias. Tamén nos explicou algunhas das “regras” que empregan os autores para escribir relato e anécdotas sobre a elaboración dos textos. Foi unha charla moi amena na que algún dos alumnos aproveitou para preguntarlle ao autor dúbidas sobre as historias do libro.

Álbum: Curso 2018/2019 -> Conferencia de Gonzalo Navaza

O 2 de abril, os grupos de 3º da ESO A, B e 3º de PMAR, acompañados polas  profesoras Irene Mera, Helena Fernández e Gloria Paredes, dos Departamentos e Historia e Lingua e Literatura Galega, visitamos o Museo de Pontevedra e a Casa Museo de Rosalía de Castro.

A primeira parada foi no Sexto Edificio do Museo de Pontevedra, onde unha guía nos explicou as  pezas de pintura e escultura dalgunhas salas e un dos cadros estrela prestado polo Museo do Prado: “Retrato de médico”, de El Greco.

A continuación levounos ás salas onde teñen a exposición permante de Castelao, un dos obxectos da nosa visita. Ensináronnos a súa obra gráfica, os álbums de cegos, algún dos seus  cadros e mesmo as carautas e deseños para a representación de Os vellos non deben de namorarse  que alí gardan celosamente.

Álbum: Curso 2018/2019 -> Visita ao Museo de Pontevedra e casa de Rosalía de Castro

     O pasado 25 de febreiro conmemoramos o Día de Rosalía con lecturas da súa obra en varios idiomas. Neste vídeo podedes ver un fragmento desta actividade:

          O departamento de Lingua Galega e Literatura do IES Castelao organizou unha xornada didáctica centrada na figura de Daniel Rodríguez Castelao que dá nome ao noso centro.
          Deste xeito, o alumnado de 2º de Bacharelato que o desexou, visitou, en primeiro lugar, as instalacións do Museo de Pontevedra, onde se lle dedicou especial atención aos fondos depositados na Sala Castelao, alén de visitar outros espazos do museo como os dedicados á arqueoloxía ou á pintura galega.
          A continuación, en xornada vespertina e no espazo compostelán de San Domingos de Bonaval, o alumnado e profesorado acompañante tivermos ocasión de seguir as explicacións que nos guiaron polas diversas seccións que compoñen a magnífica exposición "Alba de gloria", onde a experiencia final dun paseo pola significación do discurso que Castelao pronunciou o Día de Galiza de 1948 a través do recurso da realidade virtual puxo o punto e final a unha xornada intensa e, dalgún xeito, memorable.

Álbum: Curso 2018/2019 -> Visita ao Museo de Pontevedra e á exposición "Alba de Gloria"

     O departamento de Lingua Galega e Literatura do IES Castelao organizou unha saída  didáctica á Casa Galega da Cultura que se celebrou o  30 de xaneiro de 2019. Asistiron todos os grupos de segundo de bacharelato do centro e nela, os anfitrións do acto, Quico Domínguez, director da Fundación Penzol, e Antón Vidal, presidente do Consello de Administración da Editorial Galaxia, realizaron un percorrido sobre a xénese da Fundación Penzol e a súa evolución ata a actualidade, ademais de abrir as portas aos fondos depositados da devandita fundación e os que custodian do fondo pertencente a Francisco Fernández del Riego, alí depositados.

Álbum: Curso 2018/2019 -> Visita á Casa Galega da Cultura