Novas

 



Contacontos en inglés e galego

     O xoves 15 de novembro os alumnos de terceiro e cuarto tiveron a oportunidade de disfrutar de novo da actividade de Contacontos en inglés e galego, da man das narradoras Patricia McGill e Charo Pita. Escoitamos contos con elementos tradicionais coma bruxas, cabaleiros, princesas e o rei Arturo, amenizados por estas profesionais do relato. Foi unha experiencia moi interesante! Aquí vos deixamos un fragmento da actuación:

Na Semana da Ciencia lemos "La evolución de Calpurnia Tate" de Jacqueline Kelly

     Neste mes de novembro celébrase o Mes da Ciencia nas Bibliotecas, e concretamente nestes días lévase a cabo a Semana da Ciencia. Con tal motivo pódese ver no vestíbulo unha pequena mostra de libros, ilustracións e obxectos relacionados coa física, a química, a bioloxía...

     Aproveitando que hoxe toca Hora de Ler, ofrecémosvos o inicio dun libriño ben xeitoso que fala  dunha rapaza -única muller entre sete irmáns- que, en contra do que era usual no seu tempo, amosa máis interese polas investigacións científicas do avó, a quen acompaña nas saídas de campo, que pola educación musical e doméstica que pretenden inculcarlle. Velaí vai o comezo da novela La evolución de Calpurnia Tate, en castelán.

     Se vos gusta, existe tradución ao galego, e tamén unha segunda entrega que se titula O curioso mundo de Calpurnia Tate.

 

Quen dixo medo?

     O pasado 30 de outubro celebramos na biblioteca co alumnado de 1º da ESO as xa tradicionais Lecturas “Quen dixo medo?” arredor das datas do Samaín e Defuntos.

     Léronse fragmentos de A neve interminable de Agustín Fernández Paz, o relato íntegro de Poe “El corazón delator”, narracións breves en galego e os microrrelatos de terror gañadores en anteriores edicións do concurso convocado desde a biblioteca.

     Os rapaces amosáronse participativos e os de 1º A e 1º B mesmo se animaron a contar eles mesmos historias de medo diante dos seus compañeiros nun ambiente preparado para o caso na biblioteca por Pablo Samartín e os seus alumnos de PMR.

Álbum: Curso 2018/2019 -> Quen dixo medo?

Ramiro Fonte: Martes, 30

 

Eu gardei no meu armario

Xunto ós revidos abrigos

E pantalóns, un mostrario

De días martes en Vigo.

 

A festa dos defuntos no mundo


A nosa biblioteca convida nestas datas a buscar información sobre o culto aos defuntos. Pódese participar nun concurso aberto ata o 6 de novembro. Foinos cedido polo noso compañeiro de LCL Pedro Iturburúa, procedente da biblioteca Mª Victoria Moreno do IES Torrente Ballester de Pontevedra.


Animádevos a participar. Quen gañe obterá un terrorífico premio!

"El dinosaurio" de Augusto Monterroso


     Aínda que foi escasa a participación, non queremos deixar de mencionar que algúns se atreveron a contar en dez linguas diferentes o famoso microrrelato de Augusto Monterroso “El dinosaurio”, no concurso convocado desde a biblioteca con motivo do Día Internacional da Tradución, o 30 de setembro.
     Ninguén acadou a perfección nas súas versións, algunhas a linguas ben afastadas da nosa,  pero os que máis se achegaron podémolos ver aquí recibindo un pequeno agasallo en recordo da súa incursión no eido da tradución.
     Parabéns a todos eles!

Ramiro Fonte

LUNS, 22

 

Que mala sorte a dalgúns!

Saír da casa en pixama

Non concede boa fama.

Isto sucédelle ós luns.

 

Debería o calendario

Desarquivar ese día

Que nos dá melancolía,

Que é a costa dun calvario.

 

Penso dun xeito contrario:

Na roseira das xornadas,

Para encher de tempo a nada,

Todo día é necesario.

 

É cuestión filosofal:

O luns non fai ben nin mal.

[Ramiro Fonte, Xardín do pasatempo, 2008]

Biblioteca "Ramiro Fonte"

        Desde a pasada semana a nosa biblioteca chámase “Biblioteca Ramiro Fonte”, en recordo do que foi profesor deste claustro durante máis de dez anos. Con tal motivo o día 11 de outubro (décimo aniversario do seu falecemento) celebramos un acto no que se descubriu unha placa en que se consigna esta denominación, e previamente falaron dúas persoas sobre o tempo e a figura de Ramiro, representando dalgún xeito o pasado e o presente do instituto.

En primeiro lugar interveu Marilar Aleixandre, directora do centro cando Ramiro se incorporou a el como profesor en prácticas tras aprobar a oposición de Galego; ela falou do ambiente cultural que se respiraba daquela, da gran cantidade de actividades e inquedanzas que bulían polo Calvario e polo instituto, razón pola cal falou del como un “fervedoiro intelectual”. E a continuación interveu Ramón Nicolás, profesor aquí desde este curso e proba vivente de que o centro segue a ser acredor á denominación da oradora precedente.

Moitos nomes ilustres do panorama cultural e concretamente literario, pasaron, efectivamente, polas aulas do Castelao (como docentes e como discentes) ao tempo que Ramiro Fonte; entre eles algúns – presentes no acto, como Xavier R. Baixeras- que seguramente nos acompañarán ao longo do curso para compartir connosco a súa particular lectura da obra do noso compañeiro.

Para rematar, un fato de rapaces de segundo de bacharelato leron algúns dos seus poemas. Foron Irene Pérez Vila, Marcos Domínguez Ordóñez, Desirée Cameselle Fernandes, Valeria Salazar Vázquez,  Ruth Carrera Fernández, Manuel Rodríguez Alarcón e Rebeca Zúñiga Camiña.

E os  actos arredor de Ramiro Fonte completábanse cunha exposición da súa obra, que non se podería ter feito sen as valiosas achegas bibliográficas da colección particular de Ramón Nicolás, do departamento de Galego, ou sen a pescuda minuciosa por parte do compañeiro de Lingua castelá Pedro Iturburúa, quen, xunto co alumno Ismael Piñeiro Gago, revisou íntegra –nos anos pertinentes- a colección da revista “Grial” ata dar cun bo feixe de colaboracións nela de  Ramiro. Ademais, un fermoso retrato realizado por Roberto Lamas en 2009, como exemplo ante os seus alumnos desta técnica, presidía a exposición.

Agardamos que todo isto vaia servindo para achegarnos a todos a Ramiro Fonte, que dá nome á nosa biblioteca.

Hernán Comesaña Cayetano, Premio Extraordinario de Bacharelato 2018

     O xoves día 4 de outubro espertamos cunha boa nova: recoñecérase o mérito deste xa exalumno do noso instituto.

     Desde aquí felicitámolo e felicitámonos por ter entre nós a alguén da súa valía. Despois duns tímidos comezos en 1º de bacharelato no que parecía non atopar ben o seu lugar, nun centro no que ademais se falaba outra lingua distinta á que el viña afeito desde Andalucía, soubo evolucionar ata chegar a pronunciar no nome de todos os compañeiros o  discurso final no acto de graduación de 2º de bacharelato: fora quen de gañar o respecto, a admiración e o cariño de todos eles. Non só dos compañeiros senón de todo o público alí reunido, que escoitou en máxico silencio a súa alocución.

     Parabéns, Hernán!

Discurso de Hernán no acto de graduación celebrado en Xuño de 2018

Hernán recibindo o 2º premio de Poesía do Certame das Letras Galegas no curso 2016/2017