Skip to Content

O machismo é pandemia, campaña viral do alumando do IES Agra de Raíces

O alumnado de 1º de Bacharelato do IES Agra de Raíces vén de constituír a plataforma "Colectivo XA", un espazo virtual con presenza nas redes sociais de Instagram, Tiktok e Twitter (@colectivoxa) desde o que tenderán pontes para a mocidade galega máis consciente e crítica.
 
A primeira campaña, de formato audiovisual, foi realizada con motivo do 25N e coa intención de denunciar e visibilizar a violencia machista que se desenvolve no seo dos fogares e que se oculta na invisibilidade que provoca o confinamento.
 
 
Detrás desta iniciativa figuran os nomes dos alumnos e alumnas Ángel Aba, Samuel Canosa, Alexia Fariña, Ana Fdz. de Larrinoa, Carla Ferrío, Lara Garrido, Ariadna Herrero, Yamila Lago, Óliver López, Laura Matínez, Miguel Pérez, Naira Puente, Carmen Sánchez e Adrián Villar, responsábeis do guión, e o do profesor Albero Pombo, que se encargou da edición e dirección.
 
Para facer viral esta campaña crearon o cancelo #omachismoépandemia co que convidan a encher as redes no próximo mércores 25 de novembro.

MATEO PÉREZ SOTO, PREMIO EXTRAORDINARIO DA ESO PARA CURSO 2019/2020

 

Comprácenos comunicar á comunidade educativa do centro a recepción do Premio Extraordinario da ESO ao rendemento académico ao noso alumno Mateo Pérez Soto (1º Bacharelato). O estudante recibiu a noticia o pasado xoves, 12 de novembro, recollida no DOG. O galardón está dotado con 750 €, xunto cun diploma acreditativo. Este recoñecemento figurará, ademais, no expediente académico do alumno ceense. Puideron acceder á convocatoria destes premios as alumnas e alumnos que cursasen o pasado ano académico o cuarto curso da Educación Secundaria Obrigatoria e que obtivesen no conxunto da etapa unha nota media igual ou superior a nove puntos. Os presentados deberon, así mesmo, realizar unha proba específica.

Mateo deu boa conta do excelente aproveitamento que lle tirou ao esforzo e á dedicación durante esta etapa, posicionándose coma o estudante coa mellor nota de entre todos os galardoados. A traxectoria académica de Mateo semella tomar unha dinámica exponencialmente ascendente, deixando constancia de toda súa capacidade. Móstrase sempre participativo no eido cultural e académico e, por iso, recibe cada vez máis recoñecementos á súa evolución. Xa no curso pasado foi convidado pola Asesoría de Bibliotecas Escolares a participar no Congreso internacional "Leer. Iberoamérica lee 2020" coma representante dos Clubs de Lectura Galegos. Trátase dunha distinción notable para un alumno que forma parte do círculo de lectura "Libros coma area", integrado por outros oito compañeiros de 4º ESO ("Baleas de Caneliñas"). Dito evento está pendente de datar para o 2021, xa que tivo que ser adiado das xornadas previstas inicialmente. Neste seminario, Mateo actuará en calidade de relator e trasladará a súa opinión e a súa experiencia sobre as lecturas e os lectores que o movemento emerxente dos clubs de lectura está a promover.

Son dúas grandes mostras de que Mateo seguirá dando que falar no futuro. Todo un orgullo para a comunidade educativa e, en particular, para o IES Agra de Raíces. Os seus compañeiros desexan compartir esta ledicia con el a través dunha entrevista que podedes ler na seguinte ligazón.

 

Estamos seguros de que non vos decepcionará.

 

Información sobre a solicitude de máscaras para o alumnado matriculado na ESO

Hoxe, día 13 de novembro, saíu publicado no DOG a orde do 6 de novembro pola que se regulan os criterios e procedementos de distribución de máscaras entre o alumnado en educación primaria, educación secundaria obrigatoria e educación especial en centros docentes públicos dependentes da consellería de cultura, educación e universisdade e en centros privados concertados no curso 2020/21.

As máscaras distribuiranse, directamente, entre o alumnado que resultou beneficiario das axudas de material escolar (vale de material).

O resto do alumnado que non foi beneficiario do vale de adquisisción de material escolar poderán presentar a súa solicitude. Para ser beneficiarios das máscaras, os criterios que se terán en conta serán os da renda per cápita familiar.

Deberán presentar a solicitde os pais, nais, titores ou representantes legais do alumnado que non presentou a solicitude de material escolar en tempo e forma ou resultou excluída.

As solicictudes deberán presentarse presencialmente no centro docente onde estea matriculado o alumnado, utilizando o formulario normalizado (anexo I) dispoñible na sede electrónica da XUnta de Galicia, http://sede.xunta.gal (tamén estará dispoñible no seguinte enlace ou na administración do centro).

O prazo para presentar as solicitudes é de 10 días hábiles contados a partir do día seguinte ao da publicación desta orde no Diario Oficial de Galicia. O prazo remata, opr tanto, o 26 de novembro.

En caso de exclusión na listaxe provisional, as persoas afectadas poderán formular reclamación ante o centro docente nos dous días hábiles seguintes ao da súa publicación.

Día non lectivo

Recordamos a toda a comunidade educativa que o 2 de novembro é o día escollido polo centro como día non lectivo para este curso 2020/2021. Polo que nesta xornada permanecerá pechado.

ADIADAS AS ELECCIÓNS DOS MEMBROS DO CONSELLO ESCOLAR

En base á Resolución do 22 de outubro de 2020, da Secretaría Xeral de Educación e Formación Profesional, queda adiada a celebración de eleccións para a renovavión dos membros dos consellos escolares dos centros docentes sostidos con fondos públicos.

Matrícula That´s English curso 2020-2021

O prazo de matrícula para os cursos That´s English vai dende o 7 de setembro ata 30 de outubro. 

A matrícula para este curso débese facer na seguinte ligazón.

No noso centro impartiranse os módulos B1 e B2 no seguinte horario:

  • B1: Martes de 11.15 h - 12.05 h e de 12.25 h - 13.15
  • B2: Venres de 9.20 h - 10.10 h e de 10.25 h - 11.15 h

Contaxio, un conto didáctico e emocional en tempos da COVID-19

"Contaxio", o conto sobre a COVID-19 que compartimos coa comunidade educativa do IES Agra de Raíces, constitúe unha proposta didáctica de UNICEF para promover os dereitos dos nenos e os adolescentes tanto á educación, como á información daqueles aspectos da realidade que lles afectan directamente. Por iso, "Contaxio" aborda un tema de plena actualidade que chegará, ao mesmo tempo, a formar parte da historia: as consecuencias da COVID.

O conto foi escrito de maneira colaborativa por María Solar, Ledicia Costas e Fran Alonso, e ilustrado por Leandro Lamas:

Datas comezo curso 2020-21

O comezo do curso escolar 2020-2021 organizarase este ano de maneira progresiva. Os días de incorporación ás clases por cursos son os seguintes:

23 de setembro: 1º ESO, 2º ESO, 1º Bacharelato e 1º ciclo CAE.

24 de setembro: 3º ESO e 2º Bacharelato.

25 de setembro: 4º ESO.

En todos os casos, desde o primeiro día asignado a cada curso (este incluído), manterase a xornada lectiva completa.

ENTRADAS:

Alumnado que viaxe en transporte escolar: 8.25h.

Alumnado que non empregue o transporte escolar: 8.35h.

ENTRADAS LUNS POLA TARDE:

Alumnado que viaxe en transporte escolar: 16.25h.

Alumnado que non empregue o transporte escolar: 16.35h.

SAÍDAS:

Alumnado que viaxe en transporte escolar: 13.55h.

Alumnado que non empregue o transporte escolar: 14h.

SAÍDAS LUNS POLA TARDE:

Alumnado que viaxe en transporte escolar: 18h.

Alumnado que non empregue o transporte escolar: 18.05h.

Durante os primeiros días de clase, é posible que a cafetería permaneza pechada. Polo tanto, ata a reanudación da súa actividade habitual, recoméndase que o alumnado traia da casa os alimentos que vaia consumir durante os recreos.


     Podedes atopar nos seguintes adxuntos as MEDIDAS DE PREVENCIÓN DA TRANSMISIÓN DA COVID-19 que é imprescindible cumprir pola seguridade de toda a comunidade educativa do centro, así como a ENQUISA DE AUTOAVALIACIÓN CLÍNICA que o alumnado ha de realizar no fogar antes da incorporación ao centro e a DECLARACIÓN RESPONSABLE que as familias asinarán a comezos de curso en relación coas medidas de actuación adoptadas polo Ministerio de Sanidade e a Consellería de Educación. 

       Pola súa parte, podedes acceder desde as seguintes ligazóns ao Protocolo de adaptación do centro ao contexto da COVID-19, ao Programa de acollida que se desenvolverá durante as primeiras semanas do curso e ao Plan de continxencia que manexaremos en caso de ter que acudir nalgún momento do curso ao ensino non presencial.

Medidas de prevención fronte á COVID-19

Durante o curso escolar que está a piques de comezar, será imprescindible extremar o coidado e o estrito cumprimento das medidas de hixiene e protección establecidas polas autoridades sanitarias. Unha das máis efectivas para a prevención da COVID-19 é o uso da máscara. Por iso, é fundamental cerciorarnos de que a empregamos correctamente. Se clicades na seguinte ligazón, podedes acceder a un vídeo explicativo sobre a súa axeitada colocación e utilización:

O seguinte vídeo constitúe, pola súa parte, un recordatorio das actuacións que todos debemos seguir e respectar para protexernos da enfermidade (manter a debida distancia social, tusir ou esbirrar cara o cóbado, non tocar a cara, nariz ou ollos, así como outros obxectos de uso común, lavar as mans con frecuencia...). Aínda que non se trata de recomendacións novas ou descoñecidas nos últimos meses, convén que as repasemos e as interioricemos plenamente polo ben de todos:

LISTAXE DEFINITIVA DE ADMITIDOS DO FONDO SOLIDARIO DE LIBROS DE TEXTO

Hoxe, día 14 de setembro, publicouse a listaxe definitiva de admitidos do fondo solidario de libros de texto. Poden consultar a mesma no taboleiro de anuncios do instituto (horario de 10:00 a 12:00). Asemade, as persoas solicitantes tamén o poden consultar a través da aplicación Fondolibros, usando a chave 365 ou o certificado dixital da FNMT.

Na listaxe aparece a relación de libros de texto outorgados a cada alumno/a.

Distribuir contido


by Dr. Radut