O pasado 8 de novembro, celebramos un magosto tradicional.

A ANPA do centro contratou un castañeiro profesional que nos explicou o proceso de recollida e asado das castañas. Posteriormente enchemos os nosos cucuruchos con este rico froito, e degustámolo.

Esa mesma mañá fixemos unha demostración de xogos populares no patio, tal como a corda, o pano, os zancos e a carreira de sacos. Estreamos tamén o xogo da ra, que foi o que máis éxito tivo.

Leuse o Manifesto do Día do Peón, e todos intentamos bailar as nosas buxainas.

Xosé Cendán, pai dunha alumna de 3º, deunos unha charla para explicarnos ben a festa do Samaín, algo que se está intentando recuperar en moitas zonas de Galicia.

Foi un día marabilloso, como podes comprobar aquí.

No mes de outubro, os alumnos de 2º, 3º e 4º  de primaria fixemos a visita deste trimestre á Casa do Mel en Goente.

Alí explicáronnos moi ben a vida das abellas, as súas particularidades e todo o bo que estes  insectos aportan ao ser humano.

Rematamos a xornada cunha cata de mel e queixo; tamén elaboramos nós unha candea feita de cera.

Se queres ver algunhas imaxes deste día, podes facelo premendo aquí.

    O día 31 de outubro os nenos de 5º e 6º de primaria fixemos unha interesante viaxe a Santaballa para visitar a súa antiga escola. Alí decatámonos da dureza da emigración e da importante contribución das persoas que, a pesar de ter que abandonar a súa terra, nunca a esqueceron e velaron polo seu progreso.

    Podedes ver algunhas imaxes deste día premendo aquí.

      O día 22 de xuño tivo lugar o acto de entrega das orlas fin de curso.

      Foi un día moi emotivo  tanto para os nenos que remataron a etapa de primaria no noso colexio como para os rapaces de infantil que comezan a súa andaina neste ciclo.

      Se queres ver máis imaxes deste día, preme aquí.

Este ano, o Día das Letras Galegas estivo dedicado a Valentín Paz Andrade.

Todos os nenos e nenas do colexio participamos nun festival no cine Alovi, onde ensalzamos a nosa lingua, os nosos escritores e a nosa cultura.

Podes ver máis instantáneas deste día premendo aquí.

 O noso centro desenrolou o día 23 de abril un programa de actividades para fomentar a lectura e acercar ao alumnado ao mundo do libro.

O centro de interese foi "Libros que deixaron pegada".

Cada alumno aportou o libro que nalgún momento lle deixou pegada e con todos fíxose unha exposición.

Podes ver outras imaxes deste día premendo aquí.

O pasado 17 de febreiro celebramos o Entroido no colexio, unha das festas coa que os alumnos e mestres máis desfrutan.

Este ano o disfrace elixido foi o de pallaso, que foi elaborado nas clases con bolsas de plástico e recortes de cores.

Cada curso preparou unha actuación baseada nas  cancións dos coñecidos pallasos da tele, lembrando así unhas cancións infantís de sempre.

Despois das actuacións desfilamos ata o Concello e recollemos os freixós na freixoeira para degustalos no patio do colexio, xunto coas orellas doadas pola ANPA.

Como remate, queimamos o "entroido".

Resultou un día moi bonito no que todos pasamos  a converternos en pallasos multicores.

Para ver outras imaxes desta celebración, pulsa aquí.

O 30 de xaneiro é o Día Internacional da Paz e Non Violencia Escolar. Celebramos este día dando ambiente ao colexio con murais, árbores da paz, pombas, cancións, mans brancas...

Tamén celebramos este día cunha Carreira solidaria, colaborando así con Save the Children, unha ONG que axuda aos nenos da República Democrática do Congo.

Nesta carreira recadáronse en torno a 1300 euros, aportados polos patrocinadores que tiveron os nenos/as (familiares, amigos).Esta cantidade foi entregada nun acto simbólico á directora da surcursal do Banco Santander de As Pontes, para posteriormente enviala a Save the Children.

A comunidade educativa do CEIP Santa María agradece a colaboración de pais, nais e demais patrocinadores que fixeron posible que esta carreira resultase unha actividade moi solidaria e á vez de gran valor para celebrar o Día da Paz.

Para ver outras imaxes deste día, preme aquí.

O Nadal forma parte das nosas tradicións. Como todos os anos, esta celebración reflectiuse en distintas actividades que levamos a cabo no noso colexio, das cales podes ver algunhas instantáneas se premes aquí.