II CONGRESO NACIONAL DA ESCOLA RURAL

Estamos moi contentos/as de formar parte dun evento a nivel nacional, ao que asistiron cinco nenas/os e dúas mestras que amosaron a asistentes de toda España como é o noso "pequeno gran cole" e algunhas das actividades e proxectos que levamos a cabo.

O programa comezou coa conferencia Patróns e compromiso coa escola rural da profesora da Universidade de Zaragoza Pilar Abós. Ao longo da mañá, os participantes puideron asistir á presentación Escola rural vs escola urbana en Galicia da man do secretario xeral técnico da Consellería de Educación, Manuel Vila. Tamén se desenvolveu a mesa redonda Presente e futuro da escola rural, elementos de sustentabilidade coa presenza de representantes da Fundación Princesa de Girona, da Universidade da Coruña e das comunidades autónomas de Aragón, A Rioxa e Extremadura, coordinada polo director xeral de Centros e Recursos Humanos da Xunta, Jesús Álvarez. Continuou cun panel de expertos sobre a escola rural en Galicia con directores de centros galegos de diferentes etapas e tipoloxías.

A xornada matinal rematou cunha feira, na que 15 centros rurais de Galicia (entre os que se aropaba o noso) puideron promocionar o seu traballo. Contamos cun posto onde dimos a coñecer o noso centro e amosamos os nosos proxectos.

Pola tarde leváronse a cabo talleres e proxectos de boas prácticas e experiencias. Os asistentes ao congreso puideron coñecer obradoiros de espazos de centros e aprendizaxe, coidado do benestar, atención á diversidade, innovación e internacionalización, entre outros. Ademais, déromse a coñecer proxectos de aulas multigrado, de metodoloxías activas, inclusión, dixitalización, internacionalización e o Programa Xeración Docente, entre outros.

VER ALBUM DE FOTOS