Iniciamos o trimestre e con el os grupos interactivos!

Estas semanas traballamos unha variedade de propostas lingüísticas e matemáticas.

En mar de palabras, afondamos na gramática: singular e plural, feminino e masculino, incluso repasamos as palabras primitivas e derivadas. Tamén houbo tempo para a expresión e comprensión oral a través dunha adaptación do coñecido xogo "Que teño no coco?" e para a ortografía reforzando o uso do "r" suave e do "r" forte tamén a través dun xogo, o tradicional xogo da oca. 

En matemáticas sempre intentamos que haxa propostas de cálculo mental, nesta ocasión foron duas: por unha banda, un xogo de dados "Math dice", no que os nenos e nenas tiñan que usar os máximos posibles para conseguir unha cantidade dada realizando diferentes operacións e por outra, os "crucinúmeros" -unha actividade semallante aos crucigramas pero con números- nos que traballamos as operacións de +1, -1, +10 e -10. Ademais repasamos o sistema monetario e a composición e descomposición de números de 3 cifras con material manipulativo.

Grazas familias por facer posible esta actividade, este momento da semana é moi esperado polos nenos e nenas!

Este curso grazas a que fomos admitidos no programa de innovación educativa da Consellería: EDUINNOVA, estamos a conseguir dar un pequeno cambio nas aulas de 1º e de 2º de Educación Primaria, tentando construír espazos máis acolledores que faciliten a aplicación de metodoloxias activas así como adquirindo materiais didácticos manipulativos para favorecer as aprendizaxes.

Un día recibimos uns paquetes bastante grandes na aula e claro o interese foi enorme!

En canto os abrimos vimos que eran uns pequenos taboleiros de madeira que non sabiamos moi ben para que servían... menos mal que nos traían as instrucións para a súa montaxe e cunha pequena axuda puxémonos ao choio: interpretación de texto instructivo, razoamento espacial…

Todos e todas formamos parte destes pequenos cambios.

Este trimestre en “Contos de boca” tivemos dúas visitas moi especiais, por unha banda, Juana, a nai de Roque a cal non nos contou unha historia nin dúas, senón tres! Estas tres historias máis concretamente eran fábulas, falounos de que as fábulas estaban protagonizadas por animais  e que sempre ao final, nos proporcionan unha ensinanza.

As tres fábulas que nos contou tiñan un mesmo protagonista: o raposo!

Encatáronnos tanto que lle pedimos que nos deixase o libro en clase para poder lelas outra vez. 

Por outra, Sonia, nai de Paula, que nos contou “Aventuras dunha pinga de auga”, este conto trata dunha pinga que viviu durante moito tempo baixo terra e un día quixo sair a ver a luz. Nesta aventura vaise atopando con outras personaxes: outras gotiñas de auga coas que forma un río, vaquiñas, unha nena… é unha fermosa historia de agradecemento.

Paula tamén nos emprestou este conto para a biblioteca de aula e que puideramos gozar del noutros momentos.

Grazas por acompañarnos e por facer destas horas de ler un tempo compartido e especial.

Esperámosvos no vindeiro trimestre.

Nestas últimas semanas traballamos arreo nos grupos interactivos. En "mates en familia" xogamos ao cinquillo das centenas, traballamos a orientación espacial co xogo de mesa Ubongo, repasamos o anterior e o posterior de números de tres cifras e tamén seguimos a afianzar o cálculo mental. En "mar de palabras" repasamos o adxectivo, os campos semánticos, a ortografía de palabras con "h" e traballamos a comprensión lectora a partir de diversos caderniños interactivos de diferente temática: receitas de cociña, vestimenta de piratas, tesouros... 

Logo dos talleres sempre facemos unha avaliación sobre o nivel de dificultade, sobre as preferencias dunhas propostas sobre outras... e a verdade é que as opinións son moi diversas, como a nosa aula! O único no que estamos todas e todos de acordo é que nos encanta ter as familias a aprender con elas.

O vindeiro trimestre máis e mellor! Grazas!