Comezamos polos nenos e nenas que acaban de chegar ao cole. Houbo choros, risas, chamadas por mamá, por papá, empurróns, apertas....e tamén debullamos as fabas, collimos noces coas pinzas, coñecimos a asemblea, pintamos, xogamos....

CLAUSURA DO PROGRAMA CONTAMOS

    Coa historia dunha quenlla desdentada amiga dun polbo ferreiro, rematou o Programa Contamos do curso 2015-2016. Para pechalo tivemos a fortuna de desfrutar da compaña de Indalacio Cabana Leira,  Xefe Territorial da Consellería de Educación e, polo que puidemos ver, experto narrador de contos marinos. Con él, os nenos e as nenas de infantil de Centieiras navegaron polos mares preocupados pola azarosa vida da quenlla. Ao final, e xa coa grande axuda recibida do amigo polbo, o alumnado respirou con alivio e puido recompensar ao narrador cun fermoso cadro dun merlo afanado en comer cereixas, da autoría da clase de sexto de infantil, que, ademais, recitou un poema para todos os asistentes. E foron moitos, pois estaban con nós no colexio o noso alcalde, Juventino Trigo; os concelleiros, Amalia García e César Daniel Castro; as directivas da ANPA Ángeles Coira e María Permuy;  e a inspectora do centro, Elena Urtiaga (que foi quen no seu día inaugurou o Programa Contamos). O escollido, como non!, foi  o poema que inspirou o cadro,  O Merlo, de Manuel María, autor co que este ano celebramos as Letras Galegas.

Grazas a todos! Grazas a todas as persoas que, desde fóra da nosa escola, viñeron á nosa biblioteca e son así xa membros da nosa comunidade! Grazas ao traballo do equipo de profesorado de educación infantil  e, sobre todo, moitas grazas aos nenos e nenas de Centieiras por permitirnos gozar dunhas xornadas literarias e pictóricas tan espléndidas!

O Equipo de Biblioteca do CEIP Centieiras

Durante a primeira semana do mes de marzo tivemos moita actividade. Coñecimos a historia real de MALALA, fixemos traballos sobre ela, debuxos sobre a súa vida e estamos a rematar un mural no patio cuberto...Todo porque conmemoramos o 8 de marzo, Día Internacional das Mulleres. Tamén escoitamos o relato A CENICIENTA QUE NON QUERÍA COMER PERDICES que nos contaron as nenas e nenos de 5º de Primaria e vimos un conto sobre a vida de Malala.

Sabemos que as mulleres e os homes, as nenas e os nenos somos iguais en dereitos, oportunidades e temos as mesmas expectativas. Foi un día magnífico e aprendimos cousas que non esqueceremos.

“Contamos” no Día de Rosalía.

            Para celebrar con nós o Día de Rosalía, e contarnos moitas historias do seu pobo mariñeiro, de Porto do Son, estivo en Centieiras Ánxela Franco, deputada provincial responsable da área de Educación, Benestar e Igualdade de Xénero. Recibírona  no colexio o noso alcalde, Juventino Trigo, e a concelleira de Educación, Amalia García. Nós aproveitamos para ensinarlle uns debuxos moi fermosos (ela díxonos que lle gustaban moito) que fixemos sobre unha estrofa dun poema de Rosalía. Debuxamos en todas as clases, así que xuntamos máis de duascentas obras de arte. Estamos tan orgullosas e orgullosos delas que vos convidamos a vilas ver cando queirades!

            A Ánxela regalámoslle o cadro que pintaron os nenos e as nenas de quinto de infantil, e ela convidounos a ir a Porto do Son, para ver Baroña,  os petróglifos, as lagoas...