A Fundación Pública Galega Camilo José Cela acaba de lanzar na súa web a proposta educativa para o curso escolar 2022-2023.

Esta programación específica inclúe visitas dinamizadas ao Museo, proposta de obradoiros didácticos complementarios ás visitas, asesoramento personalizado e posta a disposición de recursos TIC sobre a figura do premio Nobel, así coma o préstamo de valixas didácticas coas que os propios centros educativos poderán traballar sobre as letras, a literatura e os Museos nas propias aulas/bibliotecas.

Todas as actividades incluídas na programación educativa da Fundación son gratuítas e precisan de reserva previa nos teléfonos e enderezos electrónicos habituais da Fundación.

O Ministerio de Educación e Formación Profesional impulsou a Alianza STEAM polo Talento feminino "Nenas en pé de ciencia", á que se adheriron máis dun centenar de entidades entre as que se atopan empresas, fundacións, asociacións, universidades, medios de comunicación, institucións e organizacións da sociedade civil, como unha iniciativa que abarca distintas accións para axuntar todo o talento.

Obxecto: Convocar os premios Alianza STEAM, en réxime de concorrencia competitiva, para o recoñecemento de proxectos educativos, materiais curriculares e innovacións educativas ou formativas que persigan o impulso das vocacións das nenas e mozas nas disciplinas vinculadas ás ciencias, a tecnoloxía, a enxeñería e as matemáticas, en conexión coas artes e as humanidades (STEAM) no ámbito educativo.

As modalidades, conforme ao artigo 6 da citada Orde EFP/87/2022, son as seguintes:

a) Premio para centros educativos de Educación Infantil e Primaria.

b) Premio para centros educativos de Educación Secundaria Obrigatoria, e Bacharelato.

c) Premio para centros educativos de Formación Profesional de grao medio.

d) Premio para centros educativos de Formación Profesional de grao superior.

e) Premio para entidades ou organizacións públicas ou privadas.

Requisitos:

- Os centros educativos de todo o ámbito nacional, sostidos con fondos públicos, que impartan as etapas e ensinanzas do sistema educativo español non universitario, correspondentes á ensinanza infantil e primaria, ensinanza secundaria obrigatoria e bacharelato, así como a formación profesional de grao básico, medio e superior, e que presenten proxectos educativos, materiais curriculares ou innovacións educativas que contribúan a fomentar a igualdade e que fomenten o impulso das vocacións das nenas e mozas nas disciplinas STEAM no ámbito educativo e formativo.

- As entidades públicas ou privadas sen ánimo de lucro que teñan entre os seus obxectivos o fomento das vocacións STEAM en nenas e mozas e a redución da fenda de xénero, sendo necesario que os proxectos educativos ou formativos, os materiais curriculares ou as innovacións educativas, teñan como ámbito de aplicación o sistema educativo, nos niveis non universitarios.

Dotación

A dotación de cada unha das 5 modalidades destes premios será de 10.000 euros, dos cales 5.000 euros corresponden ao primeiro premio, 3.000 euros ao segundo premio e 2.000 euros ao terceiro premio. 

Prazos de inscrición

do 01/09/2022 ao 07/10/2022

Máis información:

https://www.educacionyfp.gob.es/servicios-ao-cidadán/catalogo/xeneral/28/2894772/ficha/2894772-2022.html

No Museo MARCO retoman a  programación para escolares, con propostas educativas en torno ás exposicións temporais, dirixidas a todo o alumnado de Educación Infantil, Primaria, Secundaria e Bacharelato, abarcando un espectro de idade entre os 3 e os 18 anos.

Durante os meses de outono, as actividades toman como base a exposición de Francisco Leiro.

A experiencia consiste nun percorrido polas salas de exposición, e unha actividade-obradoiro relacionada, que se leva a cabo na sala de Didáctica (Espazo Anexo).

Tanto a visita como o obradoiro están especialmente adaptados aos distintos grupos, con contidos diferenciados para os grupos de infantil, primaria e secundaria/bacharelato.

Os grupos están limitados a 20/25 participantes.

Para participar, é necesaria reserva a través do email comunicacion@marcovigo.com ou o de taquilla recepcion.marco@gmail.com, cos datos básicos:

Nome do centro

Persoa de contacto (email + tfno)

Nº participantes

Cursos

Idades

Datas e horarios propostos

O IES Francisco Asorey, co patrocinio do Concello de Cambados, convoca na súa V edición, o Premio Literario “Cambados, Mar de Letras”.

Está dirixido ao alumnado dos centros educativos de Galicia que estean cursando estudios de secundaria, bacharelato e ciclos formativos e sempre que non superen os 20 anos de idade.

Existen dúas modalidades:

-Poesía

-Relato curto

A finalidade deste premio é a de axudar a difundir a lingua galega e fomentar a creatividade entre as persoas máis novas.

Prazo de presentación do 17 de maio ao 22 de outubro de 2022

O próximo 15 de outubro de 2022 celébrase o I Congreso Nacional de Radio Escolar, que terá lugar no Palacio de Exposicións e Congresos de Villanueva de la Serena (Badajoz). Trátase dun evento promovido polo Ministerio de Educación e Formación Profesional e a Fundación COPE (en virtude dun convenio de colaboración publicado no BOE (BOE n.º 143, do 16 de xuño de 2022), que conta coa colaboración da Junta de Extremadura e ASPA e o patrocinio da Deputación de Badajoz. 

Ao longo dunha xornada de oito horas, o Congreso, que está dirixido principalmente a docentes de ensinos non universitarios, busca contribuír á reflexión sobre as posibilidades que ten a radio como ferramenta formativa e ofrecer información organizativa e técnica. Conta, para iso, entre os seus relatores, con docentes que puxeron en marcha proxectos de radio escolar, especialistas, comunicadores, etc. 

Achegamos a ligazón á nota de prensa (https://intef.es/Noticias/o-15-de-outubro-celebrásese--o-i-congreso-nacional-de-radio-escolar) e á web do evento (https://intef.es/congreso-radio-escolar/), na que se pode acceder ao programa. A inscrición para a asistencia presencial estará aberta ata o 28 de setembro de 2022. O encontro poderase seguir así mesmo en streaming , a través desta mesma páxina.  

A Federación Española de Asociacións de Profesores de Francés organiza en colaboración coa Universidade de Castela-A Mancha un congreso nacional que terá lugar en Cuenca entre os días 8 e 10 de setembro de 2022.

Máis información:

https://eventos.uclm.es/85229/detail/viii-congreso-nacional-de-a-feapf-lle-francais-vers-un-monde-plurilingue.html

https://www.educacionyfp.gob.es/mc/bachibac/novedades.html

A Coordinadora Galega de ONGD abre a convocatoria da segunda edición do Premio Galego de Educación para o Desenvolvemento e a Cidadanía Global co propósito de recoñecer experiencias educativas transformadoras que fomenten unha cidadanía solidaria, crítica e comprometida coa construción dun mundo xusto.

Que é a Educación para a Cidadanía Global?

Dende a Coordinadora Galega de ONGD, entenden a Educación para o Desenvolvemento e a Cidadanía Global (ECG) como un proceso socio-educativo orientado a xerar conciencias críticas. Isto pasa por promover que as persoas sexan responsables e activas na construción colectiva dunha sociedade solidaria e comprometida coa erradicación da pobreza e das desigualdades e a favor da xustiza social global.

A ECG ten por obxectivo, pois, promover unha cidadanía que participe activamente na transformación da sociedade dende o ámbito persoal, comunitario e político.

Quen pode presentarse ao Premio?

Premiaranse experiencias educativas, proxectos e iniciativas pedagóxicas realizadas durante os dous últimos cursos escolares: 2020-2021 e/ou 2021-2022.

Poderán presentarse docentes ou equipos de docentes de centros de ensino e universidades galegas de titularidade pública, concertada ou privada oficialmente recoñecidos pola Consellería de Educación. Así mesmo, poderán facelo os grupos gañadores da anterior edición deste premio, sempre que o fagan con proxectos diferentes aos xa presentados.

Prazo e forma de presentación

O prazo de presentación de solicitudes e documentación rematará o 30 de outubro de 2022 ás 23:59 horas. A solicitude deberá presentarse por correo electrónico no enderezo premiogalegoed@galiciasolidaria.org indicando en Asunto “Categoría A”, “Categoría B” ou “Categoría C”, segundo corresponda.

Bases e máis información en

https://galiciasolidaria.org/ii-edicion-premio-galego-educacion/

O Instituto Galego de Física de Altas Enerxías (IGFAE) convoca a V edición do Concurso de Comunicación Científica (IGFAE C³), que ten como obxectivo fomentar o interese pola cultura científica e estimular a aprendizaxe da Física e os seus fundamentos. Dividido en catro categorías (fotografía científica, artigo e video divulgativo, e proxectos orixinais) que pretenden desenvolver diferentes habilidades comunicativas e utilizando ferramentas virtuais e Internet, o concurso está aberto a persoas de calquera país, con especial énfase no persoal investigador dos organismos públicos de investigación; en estudantes de doutoramento, máster e grao; en alumnado de ESO e Bacharelato e profesorado que traballa no ámbito da docencia da Física, así como profesionais da divulgación científica e xornalistas. Os traballos poderán ser presentados de forma individual ou en grupo, nese caso especificarase a persoa de contacto que actuará como representante. Pódese participar en varias modalidades, pero só se poderá gañar un premio nunha categoría. Haberá un premio por categoría: 400 euros á mellor fotografía, 400 euros ao mellor artigo, 400 euros ao mellor vídeo e 400 euros ao mellor proxecto orixinal.

Co obxectivo de promover a formación profesional no marco da colaboración público-privada, o Ministerio de Educación e Formación Profesional impulsa diversas accións de colaboración coas principais empresas.

Nesta liña, o grupo Telefónica ha convocado unha nova edición das bolsas Talentum incorporando entre os destinatarios aos titulados de Formación Profesional.

Trátase dun programa de Impulso ao talento novo que ofrece oportunidades aos recentemente titulados a través do seu extenso programa de bolsas, formación e retos en equipo. As titulacións de formación profesional ás que está asociada esta nova convocatoria 2022 corresponden a todos os Ciclos Formativos de Grao Superior das Familias Profesionais de Administración e Xestión, Artes Gráficas, Comercio e Marketing, Imaxe e Son, Electricidade e Electrónica, Informática e comunicacións e Instalación e mantemento.

Os requisitos de participación neste programa son os seguintes:

- Nacer con posterioridade ao 31 de decembro de 1993.

- Obter o título académico de que se trate con posterioridade ao 31 de decembro de 2017.

- Nivel medio /alto do idioma inglés.

- Estar disposto a fixar a residencia no lugar onde vaia a recibir a súa formación práctica.

- Non ser beneficiario ou beneficiaria dalgún programa de bolsas da FUNDACIÓN SEPI, nin renunciar a algunha bolsa outorgada por esta institución durante o período formativo, fóra das bolsas pertencentes aos programas TELEFÓNICA TALENTUM (corporación Telefónica).

- Para as bolsas para desenvolver en Cataluña e Baleares, será preciso o dominio do catalán.

A información da convocatoria atópase na páxina da Fundación SEPI, Bolsas Talentum de Telefónica España https://www.fundacionsepi.es/becas/telefonica-fsepi.asp.

A preinscrición estará dispoñible na seguinte ligazón: https://www.telefonica.com/es/.

Con motivo da conmemoración do Día Universal dos Dereitos da Infancia, a Plataforma de Organizacións de Infancia de Galicia coa colaboración da Xunta de Galicia, organiza un proceso participativo para nenos, nenas e adolescentes para a formación, toma de conciencia e divulgación dos seus dereitos recollidos na Convención sobre os Dereitos do Neno das Nacións Unidas.

Como pasados anos e este baixo o lema "PARTICIPAMOS! É O NOSO DEREITO" ás actividades divídense por grupos de idade: 6-8, 9-12 e 13-17.  

Pódese elixir realizar a totalidade delas ou as que máis se adapten aos vosos grupos.

Con posterioridade á realización das actividades, cada grupo debe reenviar as conclusión que se acaden, as cales serán achegadas aos responsables das políticas de infancia estatais e de Galicia en diversas conmemoracións que terán lugar na semana do 20 de novembro en coordinación coa Xunta de Galicia.

Para participar nas actividades, só hai que inscribirse e realizar as actividades antes do 15 setembro. 

As conclusións acadadas coas actividades serán recepcionadas ata ese mesmo día. 

Ligazóns a ter en conta: 

• Índice resumo das actividades: https://www.plataformadeinfancia.org/wp-content/uploads/2022/05/GUI%CC%81A-DE-ACTIVIDADES-2022-GALLEGO.pdf
• Máis información e acceso ás actividades a desenvolver divididas por grupos de idade: https://www.plataformadeinfancia.org/dia-de-la-infancia-2022/ 
• Inscrición ao proceso participativo: https://docs.google.com/forms/d/e/1FAIpQLScRogSOOb4z2YLlAItd76zohwfXZ93xog6VvHMfDSmOA_AufA/viewform 

Para calquera outra consulta podedes poñervos en contacto coa Plataforma de Organizacións de Infancia de Galicia noteléfono 747491242 ou no seguinte email participación@infanciagalicia.org