Enmarcado na segunda edición da Mostra Internacional de Cine e Educación (CINEDUCA), o Ateneo de Santiago convoca o II PREMIO ATENEO CINEDUCA, dirixido aos centros de ensino de todos os niveis educativos, procurando impulsar a creatividade, fomentar a expresión a través dos novos medios e dar a coñecer o traballo levado a cabo neste eido por ensinantes e alumnado.

Os traballos deberán tratar unha temática relacionada con experiencias educativas, procesos de aprendizaxe, historia e memoria da educación ou metodoloxías de ensino, podendo cada centro presentar as pezas que desexe.

Para participar deberase enviar un enlace privado ao enderezo electrónico ateneo@ateneodesantiago.gal, antes do 17 de febreiro de 2023.

O primeiro premio está dotado de 1000 euros e o accésit de 500 euros.

No documento anexo pódense consultar as bases do concurso.

A Federación Down Galicia vén de actualizar o seu "Punto Virtual de Educación", un espazo web que ten por finalidade favorecer a inclusión nas aulas e nos centros escolares, mellorar a coordinación e a colaboración entre os distintos axentes implicados no proceso educativo e apoiar ao profesorado galego neste eido.

Este Punto Virtual de Educación incorpora información, materiais e documentación moi diversa, facilitando así un recurso máis na atención á diversidade presente nas aulas.

Premendo nesta ligazón pódese acceder a todos os recursos dispoñibles.

O Real Patronato sobre Discapacidade, en colaboración coa Fundación ONCE e a UNED, ofrece formación en educación inclusiva, deseño para todas as persoas e Deseño Universal para a Aprendizaxe, ofrecendo ferramentas para a implantación desta formación nas aulas.

O curso MOOC (curso online gratuíto e aberto) comeza o 21 de novembro de 2022 e está recoñecido pola Cátedra UNESCO de Educación a Distancia e polo Instituto Universitario de Educación a Distancia da UNED. Ten unha duración de 3 semanas, non se precisan coñecementos previos e existe a posibilidade de acreditar a formación recibida.

Pódese consultar toda a información na seguinte ligazón:

https://iedra.uned.es/courses/course-v1:UNED-ONCE+DisenoTodos_002+2022/about.

O Ministerio de Educación e Formación Profesional vén de convocar senllos concursos de méritos para a provisión de postos vacantes de persoal docente e de asesorías técnicas no exterior.

Toda a información pode ser consultada a través das seguintes ligazóns:

• Convocatoria docentes  EXTERIOR 2022: convócanse 168 prazas en 16 países para docentes funcionarios/as de carreira.
• Convocatoria asesorías EXTERIOR 2022: convócanse 29 prazas en 12 países para docentes funcionarios/as de carreira.

Así mesmo, no apartado "Conoce nuestra red" da web UAEE pódese atopar toda a información sobre a acción educativa de España no exterior e as posibilidades que ofrece ás comunidades educativas.

Co obxectivo de dar a coñecer o retinoblastoma e de promover a inclusión de todos os nenos e nenas nas aulas, a Fundació La Nineta dels Ulls achega unha serie de ideas e propostas didácticas para todas as idades.

O retinoblastoma é o cancro ocular máis frecuente en menores de 6 anos e, malia que o diagnóstico precoz é fundamental para salvar a visión e a vida das persoas afectadas, o feito de que afecte a nenos/as tan pequenos/as dificulta a detección dos primeiros signos da enfermidade.

Por este motivo, ademais de material didáctico para levar ás aulas e promover a inclusión, o documento achegado por esta fundación describe este trastorno e os seus síntomas máis frecuentes, cuxa detección contribúe a un diagnóstico precoz e a unha mellora na calidade de vida dos e das pacientes.

A ONG Accem pon á disposición do profesorado e outros/as profesionais do ámbito educativo e social ferramentas audiovisuais e dinámicas para traballar sobre a diversidade da sociedade, co fin de normalizar e valorar a riqueza que esta representa.

A campaña REFERENTES destaca persoas nacidas ou criadas en España, cultural e/ou etnicamente diversas, que sobresaen en distintos ámbitos pola súa traxectoria e os seus logros. O seu obxectivo é inspirar a miles de nenos/as e adolescentes que medran nunha sociedade na que non se senten representados/as.

Accem invita a todas as persoas interesadas a visitar a web de REFERENTES e a descargar GRATUITAMENTE todos os materiais audiovisuais e didácticos para aproveitalos co seu alumnado ou grupo de traballo.

O próximo martes 15 de novembro ás 18:00 proxectarase, no marco do Festival Cineuropa, unha selección de curtametraxes creadas polo alumnado do IES de Cacheiras coa interpretación en directo dalgunhas das bandas sonoras por parte do CMUS de Santiago. Trátase de curtametraxes que acadaron máis de 60 premios en festivais de cinema nacionais e internacionais.

O proxecto pedagóxico Aturuxo Films – Imaxinando Músicas cumpre 15 anos desenvolvendo a alfabetización cinematográfica e mediática no IES de Cacheiras e o Conservatorio Profesional de Música de Santiago de Compostela, obtendo numerosos recoñecementos como o 1º Premio Proxecta 2018 da Consellería de Educación ou o Premio Nacional de Boas Prácticas Educativas do Ministerio de Educación 2019.

As entradas son gratuítas e poden adquirirse a través da seguinte ligazón: https://www.compostelacultura.gal/espectaculos/evento/programa-especial-aturuxo-films-imaxinando-músicas.

Ademais, estas curtametraxes estarán dispoñibles na sección do Festival da plataforma FILMIN, un gran recoñecemento á calidade do proxecto e do traballo e talento do alumnado.

Un ano máis, Patrimonio Nacional convoca o Concurso de Pintura Infantil e Xuvenil para centros escolares, cuxo propósito é divulgar os monumentos, palacios e monasterios reais entre a xente nova a través da expresión plástica.

Trátase dun certame cun obxectivo cultural, investigador e docente que pretende achegar os centros educativos á realidade artística e cultural dos Reais Sitios.

Pódese ampliar esta información nos documentos que acompañan esta nova e mais a través da seguinte ligazón: https://www.patrimonionacional.es/concurso-de-pintura-infantil-y-juvenil.

• Data límite de inscrición: 12 de decembro de 2022.
• Data límite de envío das obras: 15 de marzo de 2023.