Bioloxía e Xeoloxía

Aproveitando que esta semana se celebra a Semana da Prensa, o alumnado das  materias de Cultura Científica de 4º da ESO e 1º de Bacharelato compartiu algunhas das noticias nas que traballou ao longo do curso. Estas noticias publícanse no xornal da materia, Miraciencia, fundado no 2022.

O venres 27 de xaneiro un grupo de 25 alumnos de bacharelato pertencentes ás materias de Bioloxía e Xeoloxía, Xeoloxía e Ciencias da Terra e do Medio Ambiente, viaxou ata a Mariña Lucense acompañado polos seus docentes, para participar nun roteiro xeolóxico guiado polo divulgador e doutor en Xeoloxía Francisco Canosa Martínez.  
As baixas temperaturas non impediron que que gozásemos dunha formidable clase de Xeomorfoloxía e descubrísemos paisaxes sorprendentes e inexploradas como os “Cantís de papel”, formacións graníticas de extraordinaria beleza, esculpidas pola acción do vento e a influencia do mar.  
Visitamos tamén a Praia das Catedrais, unha das máis bonitas do mundo, onde aproveitando a marea baixa, investigamos cales eran os principais materiais da contorna: capas de dura cuarcita alternando con lousas máis brandas. Máis de un deixou alí as unllas! Entendemos tamén a orixe destes materiais a partir da compresión de sedimentos de areas e fangos, depositados fai centos de millóns de anos nas costas do hemisferio Sur. Case nada!  Abraiados pola beleza dos arcos mariños, rematamos a mañá observando in situ as catro etapas da súa evolución temporal.

Finalizamos o día en Burela visitando a zona do Perdouro, recoñecida como Geosite (lugar de importancia xeológica de relevancia internacional) onde nos explicaron o tren de dobras de preto de 300 millóns de anos, orixinado a consecuencia da oroxenia Varisca.  
Non hai mellor aula que a propia Natureza!

Nunha intensa visita á Facultade de Ciencias, o alumnado de Bioloxía de 1º Bach tivo a oportunidade de coñecer e participar no traballo de varios grupos de investigación. Dende a reconstrucción paleocimática da lagoa de Doniños pasando pola creación e avaliación de materiais de descontaminación ata a realización dun dactilograma empregando ferramentas da policía científica. Agradecemos ao Decanato da facultade e aos Departamentos de Química, Xenética, Microbioloxía e Ciencias da Terra a súa amabilidade e acollida.

Alumnas e alumnos de 4ESO e 1BACH do IES Miraflores foron investigadores forenses por un día.

Utilizando mostras reais e equipamento dun laboratorio de xenética molecular traballaron nos "laboratorios abertos da DOMUS" na investigación da escea dun crime. Empregaron as técnicas da PCR e a electroforese en xel de agarosa para comparar as mostras atopadas na escea do crime co perfil xenético dos sospeitosos.

Nas últimas semanas, os alumnos e alumnas de bioloxía e xeoloxía de 4º da ESO e os de CTMA de 2º de BACH, participaron nunha actividade promovida desde a Deputación da Coruña para dar a coñecer a realidade do cambio climático na nosa provincia. O investigador principal do proxecto Climaco, Alberto González, despois de repasar os elementos do clima e a forma de rexistralos, explicoulles a orixe do noso clima oceánico "con matices" e a diferenza entre o efecto invernadoiro natural e o incremento do efecto invernadoiro. Fixo especial fincapé no papel deste último no cambio climático. En relación ao cambio climático, o alumnado puido coñecer de primeira man, os resultados dunha investigación pioneira desenvolvida na nosa provincia. Investigación na que, tras comparar as características do clima de dous períodos concretos (1971-1990) e (1999-2018), queda probada a existencia de dito cambio: 15 días máis ao ano con temperaturas por riba dos 25 ºC, 10 días menos de xeada, máis noites tropicais... Ademáis da valiosa información aportada, a charla tiña como obxectivo fomentar comportamentos sostibles e por en valor a importancia da acción local para aportar solucións a un fenómeno de repercusións globais. Sen dúbida, unha charla interesante á vez que necesaria, trala que xurdiron numerosas preguntas que foron respondidas por Alberto González.