IES Castelao

Do 4 ao 8 de marzo, o alumnado de 1º de Bacharelato desfrutou duns días na neve, en San Isidro. O tempo acompañounos e puideron esquiar os cinco días. Acompañados das profesoras de Alejandra e Sandra, viviron unha experiencia que non esquecerán endexamais. 

Álbum: Curso 2023/2024 -> Excursión á neve - San Isidro 1º BACH

Desfrutando da música clásica en directo! Alumnado de 3°, 4° e 1° de bacharelato asistiron ao concerto da Real Fillharmonía de Galicia o 7 de marzo ás 20:00 no Teatro A fundación. Unha experiencia para repetir!

Álbum: Curso 2023/2024 -> Concerto da Real Filharmónica de Galicia

O profesorado do IES Castelao xa está inmerso nas formacións de Polos Creativos. Neste mes de abril celebrouse a sesión de docencia de máquinas. Sergio Mejuto achegouse ata as nosas instalacións para instruírnos no manexo da cortadora láser e da impresora 3D. 

O Parlamento Xove é un programa da Xunta de Galicia baseado nunha formación e competición na que os diversos equipos inscritos investigarán e debaterán sobre un tema formulado pola organización, tanto ‘a favor’ como ‘en contra’.

Nesta edición o IES Castelao participou na categoría de Bacharelato. Alejandro, Sergio, Roi e Xoel constituíron o grupo para debater arredor da pregunta formulada: Os Estados deben tomar medidas para limitar o desenvolvemento da intelixencia artificial?

Álbum: Curso 2023/2024 -> Parlamento Xove

O club de lectura A pé de obra reuniuse para debater arredor do libro ‘Teño 14 anos e non é unha boa nova, de Jo Witek e tradución de Antía Veres .

Onde sucede a historia? Podería acontencer no noso país algo así? Está baseada en feitos reais? Foron algunhas das preguntas que intentaron responder. Tamén compartiron as sensacións experimentadas durante a lectura: anguria, emoción, ansiedade, pranto, felicidade… Todas as persoas coincidiron en que a medida que afondaban na historia de Efi máis empatizaban con ela, até o punto de sentila moi próxima.

Esta novela serve para non apagar o debate sobre os matrimonios concertados e na falla de liberdade das mulleres. Sen dúbida, un libro esperanzador.

Hai uns día despedimos o noso profesor Antonio Giráldez. Logo de anos no ensino, chegoulle a tan merecida xubilación. Mais, para finalizar a súa etapa laboral agasallou á comunidade do IES Castelao cunha conferencia sobre as orixes do conflito palestino-israelí. 

Deixamos por aquí o vídeo da interesante charla que impartiu explicando cal é a orixe dun dos conflitos bélicos de máxima actualidade. Ademais, podedes consultar as fotografías da xornada e escoitar a entrevista que deu ao equipo da radio escolar. 

Foi un verdadeiro luxo contar cunha persoa tan polifacética: historiador, escritor, divulgador, profesor... e un dos fundadores do Instituto de Estudos vigueses. Grazas Antonio, pola túa dedicación! 

Álbum: Curso 2023/2024 -> Despedida Antonio Giráldez

Dende a Biblioteca Ramiro Fonte, lanzamos o concurso de Haikus ilustrados sobre a primavera para festexar o vindeiro 21 de marzo, o Día  Mundial da poesía.

Ánimo, poetas! Buscade inspiración nas musas porque agardamos polos vosos versos. 

Lede as bases e achegade as vosas composicións ao correo electrónico: 

 bibliotecaramirofonte@gmail.com

Nais e país do alumnado de 2º ESO participan nunha nova charla sobre cómo afrontar os conflitos no eido familiar e a importancia de repensar, dialogar e chegar a acordos.

O conflito é un proceso natural na sociedade e un fenómeno necesario para a vida humana, pode ser un factor positivo para o cambio e o crecemento persoal e interpersoal.

Álbum: Curso 2023/2024 -> Afrontar os conflitos cos fillos e fillas

As alumnas e alumnos de 4º ESO participaron o 7 de marzo na 8ª edición da feira de ensinanzas artísticas e profesionais de Vigo.

En pequenos grupos, e acompañados por guías, foron visitando os distintos expositores das ensinanzas artísticas e profesionais que participaban na feira.

Álbum: Curso 2023/2024 -> Feira de ensinanzas artísticas e profesionais

O grupo de Igualdade do centro, Estela Morada, deseñou unha serie de actividades para comprometer o alumnado, profesorado e persoal non docente a conmemorar o 8m: Día Internacional da muller. 

Nesta semana realizáronse diferentes campañas de visibilización como a escrita de frases de mulleres célebres nas ventás do instituto, exposicións para visibilizar a mulleres inventoras, a revisión da baralla de cartas en clave feminista, ou pintacaras e entrega de chapas o venres 8. 

Álbum: Curso 2023/2024 -> 8m