O pasado venres 19 de xaneiro, o alumnado de 4º da ESO visitou o Parlamento de Galicia nunha saída programada polo profesorado da materia de Xeografía e Historia.
Organizados en dous grupos e baixo a dirección de cadanseu guía, as alumnas e alumnos do insitituto coñeceron as principais funcións desta importante institución política e percorreron as diferentes dependencias do Pazo do Hórreo, sede do cámara lexislativa galega desde 1989. Dos diferentes espazos visitados cómpre salientar a biblioteca, onde se custodian fondos de figuras tan relevantes da cultura galega como son Ricardo Carvallo Calero, os irmáns Villar Ponte e a escritora Elena Quiroga e o seu marido.
Ademais, no salón de plenos non só sentaron nos escanos dos deputados dos diferentes partidos políticos galegos, senón que tamén algúns representantes do alumnado puideron subir ao estrado e facer propostas para mellorar a vida no instituto.
Ao longo da visita, cuxa duración foi de aproximadamente unha hora, rapazada e profesorado tiveron acceso á variada e valiosa colección de arte galega contemporánea, tanto pitórica como escultórica, que alberga o Parlamento, a cal por si mesma xustifica a visita desta institución.
Ao rematar, recibiron como agasallo unha banda deseñada sobre a historia do Parlamento galego e un pequeno catálogo da colección artística que se conserva no mesmo.
Álbum: Actividades Culturais -> Visita ao Parlamento de Galicia
