ALUMNADO

Apadriñamento lector polo Día contra o acoso escolar.

Uxía, Roi e Borja apadriñan ao alumnado de tres anos co conto

"Orellas de Bolboreta" para concienciar contra o acoso escolar.

Está claro que lles gustou. A lectura axuda a traballar os valores.

Nesta ocasión Karen Leimdorfer será a transmisora da fermosa

historia de "El dragón Zog" o versionará en galego e inglés,

o seu idioma natal.

Será un agasallo para o alumnado de 2º de primaria.

Unha actividade de observación da paisaxe realizada polo alumnado de 1º.

A ver tamén se aprende, este é un ollar detido, mirar, reparar no que ves, achar,

ver cambios dun día ao seguinte, pois a natureza cambia, hai acción humana...

Por exemplo, un dos días apareceu un tractor a tocar na area, ao seguinte o

alumnado reparou nos cambios. As árbores dos tarais están nese cambio

primaveral, herbas e flores comezando a medrar...

O andar rápido, a rutina crea grandes problemas de observación,

hoxe máis ca nunca temos que ensinar a ver.

Estes pequenos e pequenas naturalistas están aprendendo a observar.

A través da Asociación Arce, recibimos a visita de Victorina Rey Quintiana,

Mari Carmen Rodríguez Tizón e María José Leira Ambrós biólogas coas que contactou

Camilo. Elas aportaron unha inmensa documentación ao proxecto, sobre a

flora e a fauna da nosa contorna, no que estamos inmersos.

Biólogas, alumnado e mestras conversaron sobre: cadeas tróficas, o paseo do Condomiñas,

o bosque de galería, a flora autóctona, as invasoras...

Adobiaron a conversa cunha presentación e un vídeo que quedou

para uso do alumnado e que consideramos de gran valor documental.

Agora con esa documentación e o tríptico realizado por elas e enviado polo

Concello de Cedeira, poderán realizar un percorrido para atopar as especies estudadas.

Agradecer a todos os implicados a súa colaboración!

Hoxe tivemos unha sorpresa! Carlos Labraña apareceu de improviso visitar

a súa e a nosa biblioteca. Pois como saberedes, leva o seu nome.

A rapazada púxose moi leda coa súa aparición no recreo,

mentres se facía o obradoiro de marcapáxinas. O alumnado correu

abrazalo e e a levarlle o marcapáxinas para ter unha dedicatoria súa.

Foi unha algarabía moi linda! Logo convidamos á rapazada que está inmersa

no teatro, pois sendo o dramaturgo máis importante da literatura infantil galega,

temos que empaparnos da súa sabiduría. Foi unha mañá máxica ao redor dos libros

e do escritor. Gracias Carlos por acompañarnos nun día tan sinalado!

Nesta ocasión foron Beatriz Macho e  Andy Brañas, profesores da FP quen xunto cos seus alumnos e alumnas

sumáronse á Biblioteca Humana. Un grupo da rapazada de sexto achegouse ata o

instituto para gozar dun obradoiro de circuítos. Sairon con dous taboeiros para

relacionar xéneros de cine con fotografías de películas. Un traballo que quedará exposto

na Feira dos Libros e do que poderá gozar toda a comunidade educativa.

Gracias rapazada e mestres!

Nesta ocasión Catuxa, Leire e Noa escollen un conto para lerlle ao

alumnado de 3 anos. Cambian verbas por bicos e abrazos.

Nada tan simple, fermoso e valioso coma unha historia para

facer felices ás persoas. Porque iso somos e diso nos alimentamos,

de contos, palabras... Unha iniciativa do alumnado de 5º de primaria

que está colmando de felicidade á rapazada máis pequena. Moitos parabéns!

Despois de aprender as reglas dos xogos, o alumnado de 1º convida ás nenas

e nenos de 4 anos de E.I. a pasar un anaco divertido na biblioteca.

Veñen acompañados por Jessica Martínez Urosa, mamá de Unai e Sofía

(que nos estivo ensinando as reglas dos xogos) e as mestras.

Os xogos de mesa introducen ao alumnado no xogo de reglas, axudan a socializar,

ser máis empáticos, respectar espacios e opinións, aprender a xestionar emocións

(como a frustración cando perden), mellora a atención... Ten unha serie de beneficios

que o fan unha actividade completa.

Só temos que ollalos neste vídeo para ver que o pasaron fenómeno!

 Esta actividade enmárcase na Biblioteca Humana/

Polos Creativos, do programa "Lectura e familias".

A rapazada de primeiro fai uns sementeiros para a horta.

Nestes días observarán o crecemento da semente e as súas

fases ata converterse nunha plantula que xa poidan transplantar.

O alumnado de primeiro observa a fauna da contorna

e inicia a creación dun caderno de campo.

As mochilas viaxeiras continúan as súas viaxes polas fogares do noso alumnado.

Dentro do proxecto documental o alumnado de 4 anos realizou un obradoiro

sobre paleontoloxía, tallaron pegadas e ósos con pasta branca, as mestras

crearon un mundo que semellara o espazo de traballo dun ou dunha paleontóloga

e por suposto, eles se fixeron cos materiais axeitados para ser, pois así aprendemos.

Atoparon as pezas e as identificaron.

Un traballo de creación, recreación e observación calmada que enriquece á rapazada!

O alumnado de catro anos leva unhas mochilas viaxeiras os luns,

cheas de historias, xogos e risas que voltan á escola os xoves.

Cada unha leva un conto e un obxecto relacionado con él.

O alumnado de primeiro recibíu a visita de Alicia Freire Vera, escritora,

guionista, realizadora audiovisual... Despois de traballar sobre a súa

biografía fixéronlle unha pequena entrevista para recabar máis información.

Alicia foi quen de amosarlles que que as historias están na súa man, para iso

tornan os papeis, sendo ela quen pregunta e poñendo os contos nos beizos da rapazada.

As xornadas dos venres, o alumnado de 4 anos leva a cabo unha

actividade extraordinaria. As portas das dúas clases ábrense de

par en par para converterse nun só grupo, cun ambiente preparado

con diversas actividades que convidan a xogar, aprender, descobrer, experimentar...

O alumnado vai pasando e escollendo onde quere estar, se atopa sitio libre pode

quedar e pasar alí o tempo que desexe, tamén pode facelo se rapidamente

decide marchar. Son as nenas e nenos onde deciden estar.

Tomar decisións é algo moi importante xa dende as primeiras idades.

A biblioteca actúa como banco de recursos.

Pero para ver a dimensión da actividade nada mellor que unha imaxe.

A nosa biblioteca foi seleccionada para recibir a visita de Radio Voz.

O alumnado de sexto recibe unha pequena charla formativa e posteriormente,

gravamos un programa de Étimos de aves e paxaros.

Programa enmarcado no proxecto "Aprendendo, naturalmente!" e emitido o

9 de marzo, Día do Naturalismo Galego, Día de Martín Sarmiento!

Quixemos alzar a nosa voz para facer valer a nosa lingua, a que falamos

a diario, a das nosas avoas e avós e por suposto aprender moito das aves

e paxariños, moitos deles que viven moitas aventuras nas súas migracións.

Agora ides escoitar o producto final, pero este tipo de actividades conlevan

un traballo laborioso.

Primeiro deseñouse en enviouse ás familias e coñecidos

unha pequena folla de recollida de información, dos étimos de nove aves e

da cultura popular referida a elas. O alumnado de sexto de primaria recolleu

as entrevistas e fixo un cadro centralizando as aportacións que se fixeron de

cada paxariño.

Posteriormente, buscaron información sobre a apariencia, canto, costumes de

cada un deles e a rexistraron. Con todos eses datos elabórase unha escaleta ao

que se adobía con poesías, recitados, ditos, refráns sobre estas aves e tendo moi

presente que estamos próximos á data de Rosalía de Castro e queremos adicarlle

a súa Alborada. Todos os niveis do centro saen representados neste adobío, que xunto

coas gravacións sobre étimos e características destes paxariños fan o programa

de radio que agora ides escoitar.  Será emitido por Radio Voz Ferrol, na frecuencia 105.4

Orgullo de cativada! Feliz Día do Naturalismo Galego! Parabéns Martín Sarmiento!

 Engadimos a escaleta e a bibliografía, por se é de interese.

O Concello de Cedeira acaba de impartir unha xornada de

sensibilización cara a reciclaxe do aceite

usado ao alumnado de 5º e 6º de Primaria.

Aprenderon como evitar que chegue o aceite ata o río e

o dano que fai o aceite ás diversas especies que viven no mar.

Proporcionáronlles tamén, un coador para facer o trasvase na casa

e un folleto de diversos entornos ao redor do Río Condomiñas.

Agora, só temos que comezar a reciclar!

Este venres 3 de marzo, o alumnado en xornada de mañá e o

profesorado en xornada de tarde, gozou de formación en Biblioteca Creativa.

Realizouse un obradoiro de creación de monicreques.

Primeiro aprenderon a manexar a voz e relaxarse para contar historias e

posteriormente crearon un monicreque.

Para iso Ton Arenas, da compañía Mircromina, asesorou na creación e amosou

como con materias reciclados, como o cartón, un pode crear títeres únicos e fantásticos

aos que darlles un nome e crear, con eles,  un guión para unha pequena representación.

Foi unha formación moi productiva, na que alumnado e profesorado,

poderán guiar a outro alumnado na creación de máscaras, monicreques, disfraces...

O alumnado, guiado polo Club de Ciencias,

mergúllase nun obradoiro/experimento

onde crean area cinética e logo inventan figuras con ela.

Por suposto experimentaron as súas propiedades: sempre húmida,

moi modelable, apégase a ela mesma...

Experimento, xogo e risas acompañaron a actividade!

Agora xa poden experimentar en familia!

A xornada de bimbio amosou o verdadeiro poder da arte.

O alumnado dirixido por Geraldine Jones e coa guía e acompañamento

dos axudantes da artista e das mestras, foron quen de dominar o material

para convertelo en fermosas estrelas, que logo adobiaron con cintas brancas

e azuis, as de  Galicia e de Rosalía. Non esqueceron, non, realizar uns recitados

 de poesía para celebrar o seu día, o seu nacemento.

Agradecer a Geraldine Jones e  Lugares Comúns este fermoso obradoiro.