CEIP de Arzúa

O venres, 24 de marzo, os rapaces e rapazas de 4º de EP visitaron o Museo Etnográfico Casa Do Patrón, en Lalín.

Neste museo Rural expóñense máis de 4.500 pezas recollidas por toda a xeografía galega. Dispón de varias salas de exposicións organizadas por temáticas, onde se poden observar as antigas escolas, a taberna, unha casa, pasando polos hábitos de vida dos nosos ancestros, oficios olvidados...

Deste xeito, o alumnado de 4º puido comprobar como era a vida dos seus avós, bisavós ou antepasados, facendo un percorrido polas distintas dependencias, acompañados por unha guía.

Ademais, participamos nun obradoiro de cerámica, do que saíron uns vasos e adornos ben bonitos.

Este museo defínese como "un canto silencioso á grandeza da historia, a cultura, a espiritualidade e a beleza do mundo rural galego".

Aquí vos deixamos un pequeno vídeo que resume ese día.

Esta semana as voluntarias e voluntarios da biblioteca baixaron ás aulas de Infantil para ler un conto aos máis pequenos do cole, preparando con moita ilusión unha pequena escenificación das historias que escolleron. Todes quedaron moi contentos e xa teñen ganas de repetir a experiencia! ...

Podedes ler máis no blogue da biblioteca, PULSA AQUÍ

Nesta xornada do 16 de marzo, a escritora María Canosa achegouse ao noso centro para ter un encontro co alumnado de 3º e 4º E.Primaria acerca do seu libro "O que nunca che contaron". 

María destacou a importancia da lectura cando dixo: "Cos libros vivimos cousas que non poderiamos vivir doutra maneira", "Conto as historias que levo na cabeza, pero cando as comparto xa deixan de ser miñas e pasan a ser vosas".

Os nenos e nenas puideron facerlle unha morea de preguntas e así enterámonos de moitas curiosidades como que: este libro naceu grazas á colaboración de tres persoas e María só escribiu as tres historias de mulleres que hai no mesmo (as historias de homes escribiunas un amigo seu); a historia que máis lle gusta é a primeira, que xusto non escribiu ela; sempre quedaba de finalista cando se presentaba aos concursos, pero grazas a Manuel Beiras García unha editorial interesouse polo libro que escribiu e así foi como conseguiu que llo publicaran; a súa escritora favorita é a súa nai; o primeiro libro escribiuno con 13 anos e cando llo publicaron tiña 17 anos; agora ten publicados 51 libros como autora e "A fotografía 51" é o título do último libro que está nas librarías; recorda con moito agarimo "Lobo Ramón" porque é unha historia que foi traducida a outros idiomas e fai pouco sacou a 2ª parte deste libro "Lobo Ramón, a vida é unha festa", etc.

Mais, quizais, o momento máis emotivo deste encontro foi cando María Canosa quixo salientar a importancia da nosa lingua, dicindo que ela sempre escribe en galego porque esta lingua é a que mellor a define. Manifestou que dámoslle valor a nosa lingua usándoa e os nenos e nenas de agora "sodes moi afortunados porque podedes ler libros que foron escritos en galego". 

Para rematar este encontro, María Canosa escribiu unha dedicatora para cada neno e nena e, como os últimos en abandonar a biblioteca foron os de 4º E. Primaria, tocoulles a eles e a elas entregarlle un pequeno agasallo da nosa terra.

 Moitas grazas María por visitar o noso centro!!

A semana pasada conmemoramos o DÍA DA MULLER (8 de marzo) no que se reivindica a igualdade completa de dereitos entre homes e mulleres. É un día adicado á loita pola igualdade, a participación e o empoderamento da muller en todos os ámbitos da sociedade.

Elaboramos un mural común onde decoramos o rostro de mulleres galegas que destacaron ou destacan nalgún ámbito:  Sofía Toro (regatista), Fina Casalderrey (escritora), Ana Peleteiro (deportista), María Casatres (actriz), Alicia Estévez (científica)…

Este mural quedou así de bonito e levou por título: Démoslles voz!

Ademais, a mestra de Música elaborou un videoclip con todo o alumnado do centro  versionando o tema “Así bailaba”. Podedes velo no apartado de Música.

Os alumnos e alumnas de 4º EP prepararon por grupos pequenas presentacións para explicar solfeo aos seus compañeiros do CEIP de Arzúa. Queredes estudar con eles? A ver que tal o fixeron na súa primeira presentación como mestres e mestras de música :)

O mércores, 8 de marzo o alumnado de 3º E.Primaria visitou o Parlamento de Galicia. 

Unha vez dentro do edificio, o guía levounos ata o vestíbulo, onde puidemos admirar unha fermosa vidriera de Laxeiro no teito.

O Parlamento de Galicia está no Pazo do Hórreo desde 1989. O edificio actual foi construído para ser a Escola de Veterinaria, pero por falta de alumnado deixou este cometido desde 1925.

Leváronnos á Sala de Exposicións para visionar un vídeo acerca do Parlamento. Moitas das cousas que nos contaron xa as levabamos aprendidas e todo resultou máis doado.

Puidemos contemplar tamén unha serie de cadros que reflicten a composición do Parlamento ao longo da súa historia, desde a primeira lexislatura en 1981. Logo amosáronnos unha maqueta do Parlamento e soubemos dicir onde nos atopabamos. 

Mentres camiñabamos polos corredores puidemos contemplar moitas obras de pintores como Xaime Quessada, Urbano Lugrís, Peteiro... Achegámonos ata a biblioteca do Parlamento, lugar no que actualmente se grava un programa que emite a TVG os domingos pola mañá. 

Puidemos asistir a un pleno e ver como os deputados/as debatían un tema. Á saída do hemiciclo viñeron un deputado e unha deputada de Arzúa a charlar un ratiño con nós, posto que escoitaron como nos dedicaban un saúdo desde a mesa da Presidencia. 

Tanto na entrada como na saída pasamos polo Salón dos Reis e nas paredes están os escudos do Antigo Reino de Galicia. 

E xa para rematar, saíu saudarnos Mini, un dos deputados do Parlamento que é de Brates, unha aldea que está moi preto do noso colexio. Dedicounos unha pequena canción e despedímonos xa do lugar. 

Foi unha visita ben interesante!!

· Contacontos para Infantil polo voluntariado da Biblioteca escolar Solidaria

Neste libro, o artista David Pintor, a través dun divertido diálogo coa súa filla relata algunas das moitas e estrafalarias aficcións que poden facer soñar ás nenas. A partir das preguntas que lle tocou responder á súa filla naceu este libro, no que fala dos estereotipos de xénero co mellor instrumento: o humor.

Esta semana celebramos o 8M, Día da muller, e para a ocasión, en Música estivemos traballando con moito entusiasmo nunha versión en galego do tema "Así bailaba" de Amaia e Rigoberta Bandini, que transforman unha canción popular na que unha nena "non pode xogar porque ten que fregar" nun grito á liberdade e ao optimismo que rima " a nena non pode lavar poque ten que bailar". Coa enerxía de todos os nenos e nenas dende infantil ata Primaria, a cooperación das mestras e compañeiras, e a axuda inestimable dos alumnos e alumnas de 4º, 5º e 6º de EP que se esforzaron moito co seu papel de protagonistas levando a voz cantante do tema, o noso videoclip quedou tal que así... agardamos que vos guste!

Dentro da programación da 48 Festa do Queixo, o Departamento de Cultura do Concello de Arzúa convidou a escolares a asistir á proxección da longametraxe de animación "Os demos de barro" producida polo arzuán e gañador dun premio Goya, Xosé Zapata.

Tivo a sorte de poder asistir a esta proxección o alumnado de 4° de Educación Primaria. Tivo lugar o xoves, 2 de marzo na capela da Madalena.

Esta película conta unha fermosa historia de reencontro coa natureza e coas raíces na que a súa protagonista é unha muller forte e valente chamada Rosa.

Este luns, tivemos a sorte de recibir no salón de actos do noso colexio a dúas xogadoras de fútbol do Victoria FC de Santiago, Alba e Marta, e a dous xogadores do S.D. Compostela, Martín e Roque.

Fixéronse as presentación destes xogadores e xogadoras, no que se falou das súas traxectorias profesionais para dar paso a falar e debater sobre por que é importante practicar deporte.

Saíron respostas moi axeitadas tales como: é importante para a saúde física e mental, promove a igualdade, apréndese a respectar a autoridade, promove a disciplina…

Damos as grazas á Sociedade Deportiva do Compostela por achegar aos nosos cativos e cativas estes bos consellos sobre a importancia de facer exercicio e deporte e que sexan catro profesionais do deporte os que lles transmitan estas boas prácticas.

Ademais, tiveron o detalle de traer entradas para os partidos da próxima fin de semana e varios agasallos para sortear entre o alumnado. Estes foron os nenos e nenas premiados e premiadas:

PATROCINA COBRE SAN RAFAEL