Traballar co Asistente

Imos comezar a explorar as posibilidades dunha presentación feita co Asistente.

1. Se optamos por seleccionar Desde modelo, veremos que aparecen na parte inferior un cadro de lista despregable e un cadro no que se mostran os diferentes modelos dispoñibles. Se facemos clic sobre a frecha do cadro de lista despregable aparecen dúas opcións: Presentacións e Fondos de presentación.

2. No paso número dous, teremos que seleccionar un estilo de diapositiva e un medio de presentación.

Retroalimentación

O Estilo de diapositiva ofrécenos un cadro despregable coas dúas opcións xa vistas no paso 1 aínda que aparece, de forma predeterminada, Fondo de presentación.

A través do Medio de presentación, indicamos en que soporte imos presentar as diapositivas:

Orixinal: é a opción seleccionada por defecto, indica que se utilizará o formato da diapositiva orixinal do modelo seleccionado no paso anterior.

Transparencia: se a nosa presentación vai ser exposta en transparencias a través dun retroproxector, marcaremos esta opción.

Papel: marcarémola se imos traballar con presentación impresa.

Pantalla: se a nosa presentación vai ser exposta nunha pantalla, esta opción deseñará as diapositivas cunha proporción de 4x3, como nun monitor de computador.

Diapositiva: esta opción destínase a unha presentación en diapositivas. Con ela a diapositiva terá unha proporción de 36x24 (como nunha diapositiva auténtica).

O medio que escollamos é importante de cara ao deseño da nosa presentación xa que non é o mesmo facela para a pantalla que para entregar impresa. Tamén podemos modificar esta opción máis adiante, despois de finalizar o Asistente.

3. Na seguinte pantalla, móstrase o terceiro paso do Asistente.

Retroalimentación

En Efecto, podemos especificar algún efecto para a transición entre diapositivas cando se estea realizando a presentación en pantalla.

A transición é o xeito en que unha diapositiva é substituída por outra. Por exemplo, podemos facer que a diapositiva desapareza desprazándose cara á dereita e a seguinte apareza pola esquerda. Non importa se non marcamos as opcións neste momento, temos a posibilidade de facelo máis adiante. Deixaremos para os pasos finais unha explicación máis detallada destes efectos.

Coa opción Velocidade, configuraremos a velocidade coa que se verá o efecto elixido para a transición entre as diapositivas.

Na metade inferior podemos configurar unha presentación automática axustando os tempos de duración das páxinas e das pausas:

Predeterminado: fai que o transcurso das diapositivas na pantalla se faga manualmente, cando premamos no botón esquerdo do rato ou calquera tecla definida para iso.

Automático: a presentación realízase automaticamente. O paso dunha diapositiva a outra e a pausa entre elas establécese nas dúas subopcións (Duración de páxina, Duración de pausa).

4. No paso 4, teremos que especificar o nome do autor ou autora, o tema da presentación e a descrición das ideas básicas que se van abordar.

5. Xa por último, se eliximos a opción Crear desde modelo, aparecerá unha pantalla onde podemos ver a lista de páxinas. Deixaremos as opcións como están e xa só nos queda premer en Crear.