Actividades na biblioteca

Este tempo outonizo de defuntos, de Samaín e de magostos, no que os días xa son máis curtos e gozamos dunhas longas noites, a lectura sempre é boa compañía, aínda que ás veces nos dea medo. Así que, ao longo do mes teremos na biblioteca, na parrilla de novidades, unha exposición de materiais relacionados co medo: Novembro de medo!!

Pasade a visitala pois nela poderedes atopar libros, películas, revistas, cómics... pero iso si, tede coidado porque pódevos aparecer algún vampiro. Andan ceibos!!!

Ao longo do mes de outubro celébrase o mes das bibliotecas escolares, data fixada pola IASL (International Association of School Librarianship). Neste ano escolleu o lema "Biblioteca Escolar: o gran cadro", (School Libraries: The Big Picture).

Queremos un ano máis facer o máis visible posible a biblioteca do noso centro e para iso, planificamos unha primeira visita á biblioteca de todos os grupos  en colaboración coas titorías.

Comezamos co grupo de 1º A, o xoves 1, dado que é o alumnado que acaba de chegar ao centro e queremos que coñezan canto antes o funcionamento da mesma, as normas, os servizos ofrecidos... Nesta sesión entrégase a cada alumno o tríptico da biblioteca e o carnet de lector. Ademais, farán unha actividade á que lle chamamos Mergullámonos na biblioteca.

Na seguinte semana, visitarán a biblioteca os grupos de 2º da ESO: o martes 6, 2º B e o mércores 7 o grupo de 2º A. E na semana do 19 ao 23 a actividade farémola cos grupos de 3º A, 4º A e 4º B. Cada grupo asistirá cos seus titores e realizará unha actividade distinta. Nesta semana tamén faremos algunha actividade sorpresa durante os recreos.

Como xa comentamos na sección de Efemérides, hoxe, 23 de abril celébrase o Día do Libro.

Na biblioteca preparamos unha actividade especial con ánimo de agasallar aos usuarios máis habituais. Tratábase de sorprender a todos cantos se achegasen á biblioteca no recreo e que atopasen o inesperado. Pois si, nun lugar onde sempre pedimos silencio, hoxe ofrecemos voces, música e imaxes. Voces que recitan poemas dos clásicos da literatura e música e imaxes para amenizar o recital.

As reaccións dos asistentes foron moi variadas (alegría, indiferencia, risa nerviosa, sorpresa, emoción...) como era de esperar. Pensando nos que si valoran estes agasallos, pero tamén naqueles que, con tempo e dedicación, sexan quen de aprender a saborear novos pratos, seguiremos planificando actividades deste estilo.

Prestade atención, pois calquera destes días, pode haber outras sorpresas. Contra vento e marea, quédanos a palabra!

RECITAL POÉTICO: 13 de febreiro do 2009

O equipo de biblioteca está preparando esta actividade para renderlle homenaxe á poesía. Estade atentos, seguiremos informando!!

Estamos pedindo persoas voluntarias para recitar os seus poemas preferidos pois queremos levar a poesía a todas as aulas do instituto e involucrar o alumnado, o profesorado, os PAS, as limpadoras...neste circuíto literario. Escolle o teu poema xa!!

Pasou o día do festival pero permanece o bo recordo que nos deixou, pois foron moitas persoas as que se animaron a recitar e fixemos das aulas un lugar para a poesía. A continuación (se clicas no nome dos participantes) podes ver as fotos:

Vanessa, profesora de Lingua Galega

Lucía, de Lingua Castelá

Benxa, de Educación Física

Pepe, de Pedagoxía Terapéutica

Renée, de Lingua Francesa

José Manuel, de Matemáticas

Marisé, de Relixión Católica

Susana, de Orientación

Merche, unha das mozas da cafetaría

Xosé, de Lingua Inglesa en compañía de dous alumnos de 4º, Ramón e Abel.

Marisol, de Matemáticas

Ariadna e José Manuel de 4º que ademais cantáronnos o "Negra sombra".

Tamara, de 2º da ESO

Evelyn, de 2º tamén

Iria,  tamén de 2º

Modesto, profesor de Ciencias Sociais

Lúa, alumna de 1º da ESO

 

Se queredes, tamén podedes escoitar as gravacións.

Aproveitamos para darlles as grazas a todas estas valentes persoas que nos axudaron a facer un día especial. Graciñas tamén a María (profesora de Plástica) porque, a pesar de recitar e tirar todas estas fotos, quedou ela sen foto e non foi a única; o mesmo lles pasou a David (profesor de Sociais), a Luz (de Ciencias) e a algunhas alumnas de 1º, de 2º e 4º (Demi, Uxía, Ariadna, Cristina, Maite e José Martín). 

Tamén lles agradecemos a colaboración aos demais membros do claustro por axudarnos na celebración da actividade ao cedernos as clases. Pero cremos que pagou a pena pois todos gozamos coa actividade. 

O día 24 de outubro celébrase o Día da Biblioteca Escolar e na nosa tamén nos quixemos sumar á conmemoración. 

Elaboramos carteis e pegámolos por todo o instituto, así como os que mandaron da Asesoría de Bibliotecas Escolares (Biblioteca, Servidor Central) e anunciamos a data pola radio do centro para convidar a participar na actividade.

O propio día 24 realizamos varias actividades:

- Enchemos algunhas bolsas de patacas fritas ou doutras lambetadas da cafetaría con fragmentos de prosa e poemas para sorprender ao alumnado. Quen quixese ler o texto completo ou a obra á que pertencía, debía achegarse á biblioteca e alí continuar a lectura.

- Colgamos fragmentos de obras polas paredes do instituto. Algúns dos textos eran de Roald Dahl, de Ana Frank, de Kafka... e tamén pegadas polo vestíbulo que encamiñaban aos lectores á biblioteca, onde remataba o texto.

- Todo o alumnado do primeiro ciclo da ESO tivo unha sesión de lectura na biblioteca que, nalgúns casos foi motivada polas lecturas atopadas nas bolsas ou nas paredes. Nestas sesións os textos foron lidos por algunhas profesoras do equipo de biblioteca e tamén polos propios rapaces e rapazas.  Para esta actividade contamos coa colaboración do profesorado que tiña clase nesas horas e baixaron á actividade co seu alumnado.

Moitas grazas a todos por participar!!