Actividades na biblioteca

Ante a previsible retirada de formadores específicos no ámbito das bibliotecas escolares no  Servizo de Formación do Profesorado, no Centro Autonómico de Formación e Innovación e nos centros de formación e recursos dependentes da Dirección Xeral de Educación, Formación Profesional e Innovación Educativa, segundo o borrador da orde que convocará concurso público de méritos para cubrir postos de persoas directoras e asesoras nestes centros queremos manifestar o seguinte:

A insoportable levedade das bibliotecas escolares galegas

Hai proxectos que nacen marcados pola vulnerabilidade e a razón desta circunstancia non ten nada que ver coa falta de rigor ou a pouca entrega das persoas que os poñen en marcha. Máis ben ten que ver co feito de que nacen destinados a nadar contra corrente. Con todo, esa é a principal razón da súa existencia: xorden porque responden a unha necesidade non satisfeita pero compartida por un número crecente  de persoas que senten que é posible compartir e facer viable o proxecto xuntos. Así naceu o movemento que cristalizou na  iniciativa que todos coñecemos como PLAMBE. De xeito que dende hai algúns anos,  esa iniciativa levou o mellor da creatividade e o esforzo de moitos docentes que xenerosamente regalaron o seu tempo e a súa capacidade de formar equipos e ilusionar a outros docentes  en centros e centros de toda a nosa comunidade. Xuntos aprendemos a ser rigorosos e esixentes nos nosos proxectos, a crear espazos de aprendizaxe colaborativo, de cambios de estratexia, de achegamento ás novas tecnoloxías, de racionalización na xestión da información. Que ninguén se equivoque: os responsables das bibliotecas escolares non son  seres evanescentes perdidos en vanas quimeras que tentan “roubar” horas a materias “importantes” para que o alumnado esmoreza entre mundos de ficción. Nada máis lonxe da realidade. Nun centro onde hai un equipo que xestiona a biblioteca de forma eficaz nótase. Os fondos adquírense con criterio, establécense acordos para xestionar a información, créanse espazos de colaboración e docencia compartida. Non é doado porque a maquinaria educativa ten unhas inercias difíciles de combater. A pesar de todo, estes docentes fórmanse e exercen a súa dura misión en horas non retribuídas, roubadas ás súas familias, ao descanso, ao lecer. Fomos coordinados con rigor e seriedade pola Asesoría de Bibliotecas Escolares pero sempre nos faltou o marco legal axeitado. A nosa misión é dura porque queda moito por definir. Na nosa inxenuidade e boa fe esperabamos conseguir progresivamente tempos e formación para seguir mellorando na nosa función se demostrabamos que eramos rigorosos e eficaces. Os nosos méritos como colectivo son dabondo coñecidos polos nosos gobernantes e acreditados por diferentes administracións e ámbitos a nivel estatal. *Os numerosos e constantes premios anuais* de boas prácticas concedidos polo Ministerio de Educación y Ciencia non caeron do ceo. Durante todos estes anos a formación recibida foi fundamental para levar a cabo actuacións rigorosas e enfocadas na dirección correcta.

Sabemos das cuantiosas axudas que a Dirección Xeral de Educación, Formación Profesional e Innovación Educativa, destina a outros proxectos, dos  incentivos para a elaboración de contidos dixitais por parte das empresas editoriais, entre outras iniciativas. Non sería tamén interesante fomentar a produción de materiais propios e promover desde cada  centro a estandarización de procedementos que axuden a xestionar a información entre o noso alumnado sen confiar todo a eses materiais externos que proceden da industria editorial, por valiosos que poidan ser? Por que non seguir aproveitando a experiencia e valía dos equipos das bibliotecas escolares nestes cometidos?. O noso empeño sempre foi crear nos centros pequenos focos que tentan estender esas boas prácticas de innovación e excelencia. Non entendemos este novo e repentino  xiro na política de formación desta Dirección Xeral. Non nos parece xusto posto que, podemos dicir honestamente que, pola nosa banda, cumprimos con fartura. Ao desmantelar as estruturas que nos sosteñen o deterioro  será proporcional ao entusiasmo e o esforzo investidos: inmenso e imparable. Algúns lembramos como o noso Conselleiro lanzou un bico ao aire ao despedirse dos asistentes aos últimos encontros despois dunhas entusiastas palabras de eloxio polos éxitos logrados polas bibliotecas escolares galegas a nivel estatal.

Onde quedou ese entusiamo?

Que interpretación debemos facer?

O noso país pode permitirse tirar pola borda todo este traballo? E nós?.

En que situación quedaremos agora diante das nosas comunidades educativas se despois de tanta insistencia é a propria Consellería a que nos invisibiliza?.

Colectivo  dos   equipos  das  bibliotecas  escolares   integradas  no  PLAMBE (Plan de Mellora das Bibliotecas Escolares Galegas)

Ao longo do segundo e o terceiro trimestre estivemos traballando na actividade SALVAR UN LIBRO GALEGO.

Cada centro foi salvando o seu libro e agora faremos unha exposición nos centros, arredor do 17 de maio, Día das Letras Galegas. Cada centro organizou a actividade do xeito que considerou máis oportuno e entre todos presentamos unha exposisición conxunta de todos os títulos salvados.

No noso centro, como xa sabedes, organizamos unha votación na biblioteca na que puido participar toda a comunidade educativa e finalmente, o noso libro máis votado foi Memorias dun neno labrego de Xosé Neira Vilas.

Se queredes ver todos os títulos salvados podedes velos nesta magnífica presentación:

Queremos dar  moi especialmente as grazas a Jaime Eizaguirre Santillán, ex-alumno do IES Sánchez Cantón, que unha vez máis deseñou estes carteis tan fermosos para facer posible a actividade.

Un ano máis queremos conmemorar o 25 de novembro desde a biblioteca. Pensamos que segue sendo necesario traballar co noso alumnado cuestións básicas para axudalos a reflexionar sobre a violencia, concretamente a de xénero.

Son moitos os titulares na prensa que nos lembran esta lacra social a diario e cremos importante traballar os valores de tolerancia, respecto, solidariedade, da convivencia en igualdade... cuestións todas que os farán mellores persoas. Con este fin, estamos preparando actividades para cada un dos niveis e dedicaremos varias sesións de biblioteca a traballar esta temática co alumnado. Agradecemos de antemán a colaboración dos distintos profesores que van posibilitar o desenvolvemento destas actividades!

O xoves 25 de novembro todo o alumnado pasará pola biblioteca para traballar esta temática durante unha sesión.

Á parte das sesións na biblioteca tamén elaboramos un breve listado de lecturas que tratan esta temática e que podedes ver aquí.

Se queredes saber máis aquí tedes unha amplísima selección de materiais relacionados co tema que recollemos do blogue Trafegando ronseis. Grazas a todas as bibliotecas que comparten!!

Coma cada ano planificamos unha primeira visita á biblioteca de
todos os grupos  en colaboración coas titorías.

Comezamos cos grupos de 1º da ESO, na semana do 4 ao 8 de outubro, por seren os alumnos que acaban de incorporarse ao centro e queremos que coñezan canto antes o
funcionamento da mesma, as normas, os servizos ofrecidos... Nesta
sesión entregarémoslles o tríptico coas normas da biblioteca e o carné de usuarios. Ademais, farán unha actividade á que lle chamamos Mergullámonos na biblioteca.

Na semana do 18 ao 22 de outubro faremos esta actividade co alumnado de 2º da ESO, concretamente, o xoves 21. Cos grupos de 3º e 4º realizaremos unha actividade distinta, centrada na busca de información no portal de Meiga. Esta actividade será o martes 19 para os de 3º e o mércores 20 para o alumnado de 4º de ESO.

Ao longo do mes, coincidindo co Mes das Bibliotecas Escolares, faremos acticividades variadas  para animar a todo o alumnado a coñecer mellor a biblioteca, aproveitar os seus recursos e a facer un bo uso dos mesmos.

O venres 12 de marzo realizarase na biblioteca un Obradoiro sobre poesía. Participará nel o alumnado de 1º da ESO durante unha sesión de clase, 4ª h, e será impartido pola poeta Estíbaliz Espinosa. Para saber máis da autora podedes facelo no seu blogue ou tamén aquí.

Queremos agraceder a colaboración da Biblioteca Municipal de Carnota que nos ofreceu a posibilidade de realizar esta actividade.