En novembro e decembro de 2017 faise un estudo do reparto de función entre os docentes nas distintas áreas e coordinacións existentes no noso centro. Este estudo vainos permitir ter datos obxectivos sobre as docentes e os docentes e o resto do persoal que traballa no centro. Tomamos este estudo como partida para a posta en marcha das actividades do programa Donas de si.
Este ano a árbore de Nadal foi decorada coa participación de todos os alumnos do centro, pertencentes a todos os ciclos formativos e a FP Básica. Implicouse a toda a comunidade educativa, alumnado e profesorado. Tradicionalmente a decoración de Nadal era cousa das alumnas do CS de Educación Infantil, maioritariamente mulleres. Este ano implícanse tamén o resto dos ciclos formativos, maioritariamente masculinos na súa composición. A decoración de Nadal faise con material de refugallo dos talleres, con pezas que sexan representativas de cada unha das Familias Profesionais. A actividade foi exitosa e acádase un alto grao de participación do alumnado.
Club de Lectura: Faise a lectura, no segundo trimestre, do libro “Persépolis”, seguindo o procedemento de actuación habitual neste club: Escolla do libro, reunión do grupo e comentario guiado.
Club de cine: Este club desenvolve no segundo trimestre do curso un ciclo de cine sobre mulleres. As películas escollidas foron: “Agora”, sobre a figura da científica e filósofa Hipatia; “Figuras ocultas”, sobre as científicas afroamericanas da NASA, tratándose temas relacionados co racismo e os dereitos civís das mulleres; “Persépolis”,onde se abordan temas relacionados coas tradicións e as diferenzas de xénero en Irán na década dos anos 70. O procedemento seguido por este club é o visionado da película cunha ficha guiada, reunión do club e posta en común e reflexión sobre os aspectos propostos.
Videoconferencia coa neurocientífica coruñesa Susana Martínez Conde: Aproveitando a exposición de mulleres no ámbito STEM “Maria Josefa Wonenburger” celebramos o día 16 de marzo no centro unha videoconferencia coa neurocientífica coruñesa Susana Martínez Conde dende a Universidade de Nova York, onde traballa e dirixe un equipo de científicos que estudian a percepción do ollo humano e como se pode enganar o cerebro.Para preparar esta videoconferencia a propia Susana Martínez Conde remite ao centro uns videos dos seus traballos para que os alumnos dos CS de Educación Infantil e Automatización e Robótica Industrial preparen esta sesión.Tamén son invitados a participar os alumnos que pertencen ao Club de ciencias do CIFP Ferrolterra. Os alumnos visionan previamente os videos e preparan preguntas e cuestións na aula para o debate coa ponente Susana Martínez Conde. Os alumnos de Educación Infantil teñen un interese especial no desenvolvemento cognitivo dos nenos. Os alumnos de Robótica, a súa vez, están a desenvolver un proxecto de visión artificial e recoñecemento facial nun PIT desnvolvido neste centro.
Faise a solicitude de inclusión da neurocientífica Susana Martínez Conde, polo seu currículo, carreira profesional e súa dispoñibilidade para a colaboración neste e noutros proxectos educativos, no Listado de Protagonistas da Consellería de Presidencia. Administracións Públicas e Xustiza; Subsecretaría de Igualdade, polos membros do grupo de traballo do proxecto “Donas de si”. Solicítase tamén a posibilidade de presentar a súa candidatura os premios “María Josefa Wonenburger”.
Exposición fotográfica premios científicos “María Josefa Wonenburger”.No mes de marzo chega ao noso centro esta exposición fotográfica de mulleres que dedican a súa vida profesional a algún campo específico do ámbito STEM. Os alumnos e alumnas do centro son invitados a exposición e a coñecer máis de preto as mulleres de ciencia, tecnoloxía, enxeñería e matemáticas galegas e as súas achegas. Mulleres que souberon adiantarse ao seu tempo e que abriron camiños a outras mulleres
Día do Libro: O día 23 de Abril celebramos no centro o Día do Libro cunha exposición de carteis, proposta e preparada polas alumnas do CS Educación Infantil, de escritoras de literatura infantil e xuvenil. Este día os alumnos e alumnas do centro e varios profesores fan lectura de fragmentos de obras de mulleres escritoras para conmemorar a data.
Exposición “Mulleres con historia”. O grupo de traballo prepara unha exposición con carteis para visibilizar as achegas de mulleres científicas, políticas, filósofas, educadoras,…no mes de abril. Esta exposición ten o claro obxectivo de visibilizar a mulleres de todos os tempos, pasadas e presentes, as súas achegas a innovación, a cultura, a sociedade, os avances en todos os eidos como iguais aos homes. Mulleres que en moitas ocasións non foron recoñecidas ou que quedaron a sombra dos homes malia seren as artífices dos éxitos acadados.
Tríptico “Donas de si”. Faise unha publicación en formato de tríptico onde se recolle a evolución da loita das mulleres pola igualdade de dereitos dende os anos trinta ata a actualidade, pasando pola revolución do feminismo no sesenta e oito. Faise unha mención expresa das mulleres en datos (traballo, corresponsabilidade, conciliación, maternidade, sanidade, educación,...) e das leis que recoñecen os dereitos das mulleres para a igualdade.
