Proxectos de vida activa e deportiva - PDC

O venres, 10 de xuño, os nenos/as de 5º EP, a súa titora e eu (profe de EF) partimos do centro algo antes das 11h, cara ao Club Náutico Francisco Rama Vázquez "Fufú" do Freixo. Alí tería lugar o seu bautismo en actividades náuticas para a case totalidade do alumnado, que ía entusiasmado e con facianas de ledicia... Porén, un dos nenos, manifestoume o seu nervosismo e preocupación pola actividade. Entón, falei con el tratando de animalo e expliqueille que ninguén o forzaría a realizar ningunha das actividades, se non mudaba de parecer durante a xornada. Afortunadamente, foi tranquilo na lancha a motor e, máis tarde, animouse a participar, coa condición de que eu o acompañase no kaiak. Así foi e logo estaba máis sosegado e contento.

Unha vez rematada a xornada, duchámonos e regresamos ao centro.

Por suposto, o vindeiro curso, trataremos de repetir a actividade. Pois, afortunadamente, ten moito éxito no noso centro.

Para ver as preciosas fotografías desta actividade, preme aquí.

O martes, 7 de xuño, o alumnado de 6º de EP, as súas titoras e a profesora de EF tiveron o bautismo na actividade de Xogade: "Piragüismo_Dragóns", nas inmediacións do Club Náutico de Portosín.

Malia que as actividades náuticas nos encantan, neste caso atopamos dous puntos débiles: por unha banda, pareciunos de moi curta duración (unha hora escasa) e por outra, ao seren embarcacións para 22 persoas (e quizais por sermos novatos/as), cando paleabamos tocabamos cunhas pas nas outras. Pero, aínda así, o vindeiro ano procuraremos volver.

Para ver as fotografías desta nova actividade, preme aquí.

O alumnado de ambos cuartos de EP, os titores/as, a coidadora dun dos nenos e a profe de EF realizaron unha andaina, dende o porto do Freixo á praia de Broña. Ademais, foron recollendo canto lixo atopaban ao longo do percorrido e a verdade é que encheron varias bolsas. 

Unha vez en Broña, repuxéronse enerxías e realizáronse dous xogos populares na praia: o tiro da corda e o pano.

Se tes curiosidade, pola paisaxe do percorrido, o lixo que se recolleu, as facianas de nenos/as xogando, etc, preme aquí.

O alumnado de 3º EP e a súa titora están traballando o Camiño de Santiago e, xunto coa súa profe de EF, decidiron realizar un dos tramos. Pouco a pouco, foron dándolle forma á idea e chegaron á conclusión de que sería bonito percorrer un tramo do "Camiño de Santiago, da ría de Muros e Noia", posto que pasa polo noso Concello.

Acordaron convidar ás súas familias a percorrer o tramo do Freixo á Serra de Outes con eles/as, a súa titora e a súa profe de EF.

Dende o centro, falouse con Protección Civil para que algunha das persoas que compoñen tal entidade nos acompañase e así o fixeron, polo que queremos darlle as grazas.

Xa  no propio día, saímos en autobús cara á contorna da Igrexa de San Xoán de Sabardes e dende alí fomos camiñando por diversas zonas do Freixo (parando a merendar e repoñer forzas nunha zona limpa do monte). Logo, continuouse coa ruta cara á parroquia de San Xoán de Roo, ata chegar ás instalacións do antigo "Emilio de Navasqüés", onde xa estaba revisto realizar a seguinte parada e aproveitar para xantar. Unha vez alí, comeuse á sombra do patio cuberto. Un pouco despois, realizáronse algúns xogos populares: brilé, tiro da corda, pilla-pilla e algo máis tarde emprendeuse a marcha cara á Serra.

En canto ás familias, agradecerlles o seu esforzo por participar na actividade, pois houbo quen tivo que cambiar a quenda de traballo, quen se incorporou tras rematalo, etc. Pero, coidamos que mereceu a pena e agardamos as familias tamén o pensen.

Para poder ver as imaxes desa magnífica xornada, preme aquí.

O 3 de decembro é o "Día Internacional da Diversidade Funcional" e no noso centro conmemorouse, grazas á colaboración da Cruz Vermella de Noia.

Realizáronse diversas actividades, nas que o alumnado foi tomando contacto con diferentes discapacidades (cegueira, coxeira, paraplexia, etc), ao levar á práctica actividades físicas coma: subir, desprazarse e baixar dun banco sueco cos ollos vendados, grazas á axuda dun/ha compañeiro/a; percorrer un circuíto empregando muletas, sen poder apoiar un dos pés; realizar percorridos en cadeiras de rodas (por un/ha mesmo/a ou coa colaboración dalgún/ha compañeiro/a), nos que incluso debían salvar algún pequeno desnivel. Tamén puideron empregar un carriño, co que levan a persoas (que padecen importantes discapacidades) para que poidan bañarse no mar. Ademais, tamén puideron comprobar como son as ambulancias adaptadas. Estas actividades organizáronse, dende o Equipo de Convivencia, empregando para algunhas delas material de EF. Non debemos esquecer que, en boa medida, as actividades dos centros educativos son interdisciplinares.

Evidentemente, un día non chegaba para que participase todo o alumnado do centro. Así que, houbo que levar a cabo ditas actividades, por quendas de grupos burbulla, o 2 e o 3 de decembro.

Pincha aquí, se desexas ver diversas imaxes desta actividade.