Unha das novidades do plan anual de formación do profesorado de FP para a familia de Informática e Comunicacións é o curso en rede Programación orientada a obxectos para plataformas web con PHP e MySQL.

O obxectivo deste curso é profundar na linguaxe PHP, empregando un estilo de programación orientado a obxectos, tendo en conta as tecnoloxías máis empregadas na elaboración de páxinas web dinámicas e aplicacións online, coma son o motor de bases de datos de código aberto MySQL e a linguaxe XML.

Como novidade o titor irá actualizando os apuntamentos nunha wiki externa á aula virtual, de xeito que poidan facerse cambios e incluír as suxestións dos participantes. Ao remate da actividade, colgarase na Aula Virtual a documentación elaborada na wiki en forma de varios documentos pdf.

A actividade estenderase durante 6 semanas. Durante ese tempo deberanse completar as tarefas que o titor propoña. Como axuda estará dispoñible a través do email e dos foros para contestar dúbidas e resolver problemas, e ademais haberá documentación de axuda colgada na wiki. Para recibir a certificación correspondente, debe facerse correctamente o mínimo das tarefas que o titor estableza.
Como é un curso en rede, cada participante pode conectarse á aula virtual no tempo e horario que considere oportuno: o importante é entregar as tarefas correctas e en tempo.

Contidos do Curso

1. Fundamentos da linguaxe PHP: sintaxe, tipos de datos, variables, operadores,  estruturas de control, funcións, arrays.
2. Programación orientada a obxectos en PHP: modelo de obxectos, atributos e métodos, membros da clase, construtores e destrutores, herdanza, clases abstractas, interfaces, métodos máxicos, trazos, excepcións, espazos de nomes.
3. PHP e bases de datos MySQL.
4. Definición de documentos XML: XML Schemas.
5. Expresións XPath.
6. Transformacións XSLT.

G1301006: Programación orientada a obxectos para plataformas web con PHP e MySQL

Data de comezo: 28 de outubro de 2013
Data de finalización: 8 de decembro de 2013
Lugar de celebración: PLATEGA
Número de horas totais: 30 horas
Ligazón a fprofe: https://www.edu.xunta.gal/fprofe/procesaConsultaPublica.do?DIALOG-EVENT-ver=ver&cod_actividade=54376
Ligazón á aula virtual: http://www.edu.xunta.es/platega/course/view.php?id=2228

Aínda que en cursos anteriores xa houbera cursos de formación do profesorado de FP sobre Hidráulica e Pneumática, esta nova actividade xorde tras detectar a necesidade entre o profesorado da familia de Transporte e Mantemento de Vehículos de afondar na teoría básica da Hidráulica.

Os titores, que teñen unha ampla experiencia tanto na formación presencial e a distancia de profesorado, deseñaron unha actividade cunha parte inicial teórica e completada con prácticas de simulación de circuítos hidráulicos cun software especializado. A intención é que as actividades e materiais que estarán dispoñibles na aula virtual poidan ser de proveito para os participantes para trasladalo á aula.

A actividade estenderase durante 6 semanas. Durante ese tempo deberanse completar as tarefas que os titores propoñan. Como axuda estarán dispoñibles a través do email e dos foros para contestar dúbidas e resolver problemas, e ademais haberá documentación de axuda colgada na mesma aula virtual. Para recibir a certificación correspondente, debe facerse correctamente o mínimo das tarefas que os titores establezan.
Como é un curso en rede, cada participante pode conectarse á aula virtual no tempo e horario que considere oportuno: o importante é entregar as tarefas correctas e en tempo.

G1301012: Fundamentos de hidráulica convencional.

Data de comezo: 14 de outubro de 2013
Data de finalización: 20 de novembro de 2013
Lugar de celebración: PLATEGA
Número de horas totais: 30 horas
Ligazón a fprofe: https://www.edu.xunta.gal/fprofe/procesaConsultaPublica.do?DIALOG-EVENT-ver=ver&cod_actividade=54384
Ligazón á aula virtual: http://www.edu.xunta.es/platega/course/view.php?id=2227