2016/2017

Velaquí tedes a recreación da inquietante presenza da Santa Compaña. Felicísima visión dun artista que nos vén de fóra de Galicia. Descubrimos a Sergio Núñez Montávez como un prometedor colaborador do Equipo de Dinamización da Lingua, pese a estar exento da materia de Lingua e Literatura Galegas. Non houbo máis que indicarlle mínimamente que era a Estadea para que a traducise a unha linguaxe universal.

O outono resistíase a chegar; xa estabamos no 27 de setembro de 2016. Un sol aínda tímido a aquelas horas acompañounos na nosa andaina desde o instituto ata o peirao de Cesantes. O mar deixara xa de devalar e as mariscadoras recollíanse pausadamente da súa marea na praia vella. Entre risos e verbas recedentes a mar, agardamos o barco que nos levaría ao Museo de Rande, primeiro e á  Illa de San Simón, despois. Na nosa volta ao centro e cun sol xa ben forte, comentabamos o contentos e contentas que estabamos por termos participado no I Concurso de Teatro Radiofónico, organizado polo Servizo de Normalización Lingüística do noso concello coa colaboración da Radio Redondela e do noso propio instituto. Porque a viaxe pagara a pena: contacto directo coa fermosa paisaxe da nosa enseada, coa nosa historia, coa nosa economía, co noso xeito de vivir, coa nosa cultura...

Os nosos parabéns para o grupo de 4º de ESO do curso pasado, dirixidos pola súa profesora Catalina Míguez , que obtiveron o 1º Premio á calidade lingüística pola interpretación do lance I de Os vellos non deben namorarse, de A.D. Rodríguez Castelao.

Mágoa que esta saída cultural non se fixese extensiva a todo o alumnado do centro! Sería un magnífico investimento cultural que o noso concello podía levar adiante e do que se beneficiaría todo o alumnado redondelán!

.