2014/2015

Hai un mes aproximadamente que na entrada da nosa biblioteca figuraba, como libro destacado,  a obra de James Joyce: Ulises traducida á nosa lingua, obra pola que lle concederon a Mª Alonso o Premio Nacional de Tradución.

E o venres, día 5 de decembro, tivemos a oportunidade de termos connosco a esta tradutora, que ten desenvolvido o seu labor non só no mundo literario senón tamén no mundo audiovisual, versionando ao galego películas, series… que tanto nos gustaron e nos gustan a moitos de nós, como o Sinchan, por exemplo.

O noso agradecemento para María Alonso e os nosos parabéns por ese extraordinario premio, que coidamos foi ben merecido.

O noso instituto asistiu o día 14 de novembro á representación teatral dun auto escrito por Eduardo Blanco Amor, que forma parte do seu libro Farsa para títeres. Trátase dunha farsa humorística, conceptual e crítica da sociedade, a través de  personaxes simbólicos como o Vicio, a Virtude, a Lei, o Capital, o Traballo, o Estado, o Amor...

A representación estivo a cargo do grupo IAD-12 (Iniciación Arte Dramática-12), da Universidade Laboral de Ourense, un grupo formado por alumnado de 4º de ESO e polas súas profesoras Matilde Vázquez e Carmen Senande. Conseguiron entusiasmar aos nosos rapaces e rapazas de 4º de ESO que asistiron a esta representación.

 A actividade foi posible grazas ao Servizo de Normalización Lingüística do noso concello e á colaboración co Equipo de Dinamización e Normalización Lingüística do noso centro .

O noso agradecemento para os organizadores e, moi especialmente, para os rapaces e rapazas do Grupo IAD-12, os cales, antes e despois de actuaren puxéronse coma pitos porque tiveron que carrexar as cousas do decorado a pé dado que o seu autobús non puido pasar ata o centro por mor dun coche mal aparcado. Xa que logo, o ben gañado agradecemento e os merecidos parabéns pola estupenda actuación destes rapaces e rapazas.

Premede na imaxe para velas todas.

Nesta ocasión tivemos a oportunidade de celebrarmos o Magosto no seu propio día, o de San Martiño. E mesmo tivemos sorte co tempo. Castañas, larpeiradas feitas con produtos destas datas, deporte, cinema (O noso Club de Lectura proxectou “El juego de Ender”), música  leda de gaitas e tambores … E o máis importante: alumnado e profesorado compartindo palabras, risos, castañas…

 Para ver imaxes desta festa, premede aquí.

O luns, 27 de outubro, o alumnado de 4º de ESO tivo a oportunidade de asistir a unha charla informativa sobre a “Lei do menor”, impartida por Ana Pérez, membro da Asociación  ARELA, en colaboración co Concello de Redondela.
 
Os nosos parabéns para a conferecenciante que, dun xeito claro e ameno, soubo captar a atención e o interese do alumnado polo tema . E o noso agradecemento ao Concello de Redondela por ofrecernos esta actividade tan necesaria e produtiva.

Inauguramos de novo este curso inzando de imaxinación e arte as paredes da nosa cafetaría.  O noso agradecemento aos nosos compañeiros Fon e Euxenio e ao colectivo Sengashoil.

Non deixedes de visitar esta orixinal, interesante e divertida exposición na cafetería do noso instituto. Gustaríanos aproveitar para animarvos a participar na vindeira edición. E, como petisco, vaian estas imaxes.

Premede na imaxe para velas todas.