2014/2015

Outro ano máis, a nosa profesora de Música Josefa levou o alumnado de 2º e 3º de ESO a un estupendo concerto do grupo de percusión ODAIKO, o 16 de abril. Pero que ninguén pense que era o mesmo do ano pasado; era outro diferente pero igual de interesante.

O noso alumnado veu encantado e con ganas de volver o ano próximo.

Aproveitamos para dicirvos que xa están a preparar o concerto co que nos agasallarán o día 15 de maio, porque xa sabedes que este ano o 17 cadra en domingo. Tamén haberá algún recitado ou algunha teatralización. Unha vez máis a música e a palabra xunguidas.

É esta a segunda vez que o escritor Francisco Castro está no noso centro compartindo o seu tempo co alumnado de 1º de ESO que leu a súa novela Chamádeme Simbad. E é tamén esta a segunda vez que causa unha moi boa sensación no noso alumnado e no profesorado que asistiu ao encontro. Foi enxeñoso, simpático, familiar... na súa exposición. Soubo captar a atención dos nosos rapaces e rapazas; soubo escoitar atentamente o que lle preguntaron e soubo contestar atinadamente ás cuestións que lle presentaron.

Chamádeme Simbad é unha interesante e fermosa historia na que Francisco Castro nos achega a esa terrible enfermidade que é o alzheimer da man dun neno inocente, tenro, cariñoso e soñador. A realidade e a fantasía unidas nas mans dun neno e dun avó. E deixando o seu pouso triste unhas veces e divertido outras no pensamento e no corazón do noso alumnado de 1º de ESO.

Os noso agradecemento para Francisco Castro, de quen tamén recomendamos a novela que xa lemos O corazón da Branca de neve.

O escritor Pedro Feijoo mantivo, o 27 de marzo, un encontro co alumnado de 1º de Bacharelato, que leu a súa novela A memoria da choiva. Os nosos rapaces e rapazas, e tamén o profesorado, compartiu co autor diferentes cuestións sobre do seu libro, sobre do acto de escribir, sobre do gusto por contar historias... Pedro Feijoo soubo captar a atención do seu auditorio, soubo motivalo e foi quen de sementar en quen o escoitaba a curiosidade, a reflexión e, por veces, o riso. Sorprendeunos gratamente con esta novela que moitos de nós lemos gustosamente e agardamos ansiosos pola próxima, que parece ser está en proceso.

Xa que logo, o noso agradecemento por compartir con nós o seu tempo e a súa palabra e agardamos lelo e velo de novo no noso centro ben axiña.

O catedrático da Facultade de Química Gumersindo Feijoo estivo no noso centro compartindo co alumnado de 2º de Bacharelato, o 16 de marzo, o seu saber e a súa concienciación a respecto da necesidade de consumir de xeito razoable; procurando na medida do posible respectar o medio ambiente e sendo conscientes da importancia que isto ten sobre nós e sobre xeracións futuras.
Queremos desde esta nosa páxina, e no nome do noso alumnado, felicitar ao profesor Feijoo pola súa claridade nas exposicións e polo ben que deu contactado cos rapaces e rapazas asistentes á charla.

Marzo é un mes que leva nome de Muller. Daquela, o alumnado de Relixión Católica de 3º de ESO púxose mans á obra e realizou un magnífico traballo sobre mulleres senlleiras e loitadoras en diferentes eidos para acadaren unha igualdade coa que a moitas persoas se lles enche a boca, pero logo están ben lonxe de faceren realidade na súa vida. A exposición que podedes admirar na cafetería recolle fotografías e biografías destas mulleres, organizadas de xeito que deu lugar a un concurso a realizar entre o alumnado “E ti quen vés sendo?” do que, en breve, daremos conta aquí dos gañadores ou gañadoras.

Preme na foto para velas todas.